Ɛgɛ Nɛ A Géē Bi Ocabɔ Ku Ɔka O Ka A Le Yuklɔ

Ŋmiifi Ɔya Aflɛyi ku 2018 a, ocabɔ ku ɔka o ka gē bɛɛcɛ iyɔbu ku Ɔkpá Ku Ōjila ku Oyeeyi Ku Alɔ Ācɛ O Yɛce Ukraist mla Uklɔ Ku Alɔ. Ɛgɛnyá nɛ alɔ gáā bi uwa le yuklɔ a?

Eko Néē Le Uklɔ Je Gā Uwɔ Ka Ya Ɛyi Ede: A géē bi ɔka, ubáyíbu, mla ɛlā nɛ a géē ka igbɔha nōo yɔ iyɔbu ku ɔkpá a le yuklɔ. Naana kpɔ a, ɛnyā i wɛ ka géē yɛce ɛlā néē ka ipu uvidio ku ocabɔ a yiili ŋ. A lɔfu bi āhɔ̄ ɛyɛɛyɛyi, aɛlā ō bi gbɔɔ ŋma ajɛ mla ɔwɛ ɛyɛɛyɛyi ō lɛ ɛlā ta ɔcɛ eyī peee le yuklɔ. A lɔfu je ɔkpá duuma lɛ ɔcɛ a ŋma ipu Aɔdā Nɛ Alɔ Gē Bi Le Ya Oklɔcɛ Mla Ācɛ a, ɔdaŋ nōó kóō wɛ ipu aya nɛ a yɔ i ya ŋ.

Eko Nɛ A Yɔ I Tɔɔna: Ocabɔ ku ɔka o ka a gē mafu ɔwɛ nɛ alɔ géē bi le tɔɔna a lɛ alɔ. Ɔdaŋ ka ɔcɛ nɛ a ka Ɛlā Ɔwɔico lɛ ɔ a dɔka ō jé gɔbu kpɔ, a lɔfu bi ōcigbihi nyɔ nōo yɔ ipu ocabɔ ku ɔka o ka a le yuklɔ. A lɔfu lɛ ocabɔ ku ɔka o ka a piyabɔ amāŋ bi ɔdā ɛyɛɛyɛyi kpanaa le yuklɔ gla. Ikpɛyi ɛlā ŋma ɔya éyi nōo gā yɛ amāŋ ɛga ku Ubáyíbu éyi lɔfu wɛ ɔdā nōo gē he ācɛ ɔtu ɔwɛ ɛga nɛ a gē tɔɔna a? Ɔwɛ ɛga nɛ a lā a, ɔdā nōo le ya gā yɛ ɛ amāŋ ɔdā nōo yɔ i ya a gē he ācɛ nōo lā abɔɔ a ɔtu? Ɔwɛ duuma nɛ a dɔka ō bi ocabɔ ku ɔka o ka a le yuklɔ, ɔdā nōo cika ō yɔ ipu ɔtu ku uwɔ a wɛ “o yá ɛ́ɛ́ kú ɔ̄kōōlɔhi ā kóō le nyīla ga ɛga dóódu, cɛ́ɛ́ kú [a] mīyɛ ɔhā kú nū.”—1 Ukɔ́r. 9:22, 23.