Cɛtra Ujehofa Abɔ A Wɛ Ɔcɛ Ō Gbɔbu Ɔna Ō Ta A

Ācɛ Isrɛlu lɛ ɔdā alɛwa néē cika ō cɛtra Ujehofa ohigbu nu. Ó bi uwa bɛɛcɛ ŋma ajɛ ku Ijipiti klla hɛ uwa ta ŋma abɔ ku aicɔɔja ku Ufero! (Oyɛb. 15:1, 2) Ujehofa kē yɔ i ya ɔdā olɔhi alɛwa lɛ ācɛ ɔlɛ nu. Ɛgɛnyá nɛ alɔ géē mafu ka ɔdā nɛ Ujehofa ya a jɛ alɔ eyī a?—Aíjē 116:12.

Ɔwɛ éyi nɛ alɔ géē ya ɛnyā wɛ ō kwu piya ɔcɛ ō gbɔbu ɔna ō ta ŋma eko ta eko amāŋ ɔcɛ ō gbɔbu ɔna ō ta eko doodu. A lɔfu gbɔɔkɔ ku Ujehofa kóō je ɔtu mɛmla ɔfu gā uwɔ ku a kwu piya ɔcɛ ō gbɔbu ɔna ō ta. (Ufíl. 2:13) Aflɛyi, ācɛ alɛwa gbɔɔ mla ō kwu piya ɔcɛ ō gbɔbu ɔna ō ta ŋma eko ta eko. Eko nɛ a kwu piya ɔcɛ ō gbɔbu ɔna ō ta ŋma eko ta eko, a lɔfu miya ō yuklɔ awa ofu ce igwo (30) amāŋ awa ofu ɛpa ce igwo (50) ipu ɔya ɔmɛta, ɔya ɔmɛnɛ mla ɔya nɛ ɔcɛ ō leyi kwu usɛkut gē wa a. Eko nɛ a lɛ eeye nɛ a lɛ abɔ a wɛ ɔcɛ ō gbɔbu ɔna ō ta ŋma eko ta eko a má, á jé ŋ, a géē dɔka ō kwu piya ɔcɛ ō gbɔbu ɔna ō ta eko doodu. Ó lɛ ācɛ ōhī nōo gē yuklɔ eko doodu amāŋ lɛ unwalu ku ōcē nōo je piya ɔcɛ ō gbɔbu ɔna ō ta eko doodu duu ɛ. (mwb16.07 8) Ó teyi peee ka Ujehofa cika lɛ ɔfu duuma ɛ̄nɛ̄ alɔ le tu iyē o ya ɛɛ ku alɔ cɛtra ɔ a!—1 Uklɔ. 16:25.

LƐ UVIDIO NYĀ MAFU NŌO KAHINII: AYINƐ ALƆ NƆNYA ƐTA IPU ÉWO KU UMONGOLIA, CƐƐ AA LƐ ƆKA NŌO BA NYĀ CILA:

• 

  Unwalu nyá nɛ ayinɛ alɔ nɔnya ɛta a má a, ɔdi néē kéē ya lɛyikwu ɔ o ya ɛɛ kóō tɔɔtɛ lɛ uwa ō kwu piya ācɛ ō gbɔbu ɔna ō ta eko doodu a?

• 

  Aɔhā nyá néē kē má ɛ ma?

• 

  Ɛga ku uklɔ nyá yɔ lɛ uwa igbihaajɛ ipu ɛ̄gbā ō gba ku Ujehofa abɔ é wɛ ācɛ ō gbɔbu ɔna ō ta eko doodu a?

• 

  Ɛgɛnyá nɛ ocabɔ ku uwa lɛ abɔ kwu ācɛ ɔhá iyē a?