Ahinya Lɛ Ɔwɔico Mla Ukraist Ohigbu Ohɛta Nōo I Wa Ɛcɔbu A

Ɔdi wɛ unwalu nɛ a gē má ɛ̄cī doodu a? A wɛ otrɛyi ku apɔlɛ nōo yɔ i ceyitikwu o ya ɛgbá ku apɔlɛ ku uwɔ? A wɛ adā amāŋ ɛ́nɛ́ nɛ awɔ foofu uwɔ yɔ i ceyitikwu ku a ya ɛgbá ku apɔlɛ ku uwɔ lɛ uwa a? A wɛ ɛdrɔ nōo yɔ inɔkpa nōo yɔ i má unwalu ŋma ɛgiyi ayipɛ inɔkpa ku uwɔ? A yɔ i má unwalu ku ōcē amāŋ yɔ i má unwalu ohigbu ku a le hilokplici? Ɔnyɔɔnyɛ lɛ unwalu éyi amāŋ ɔhá. Ācɛ O Yɛce Ukraist alɛwa kē yɔ i má unwalu ɛyɛɛyɛyi igbeekponu. Naana a, alɔ jé kóō gáā gboji gɛ ŋ, Ujehofa géē hɛ alɔ ta ŋma ɛjɛɛji unwalu nɛ alɔ yɔ i má a.—2 Ukɔ́r. 4:16-18.

Jaa gbeeko ɔɔma a, alɔ kóō yɔ i lɛ ɔtu ō tu kwu ɔtu ŋma ō jé ka Ujehofa jé lɛyikwu unwalu nɛ alɔ yɔ i má a, ɛgɛ nɛ alɔ yɔ i lé ɔtu klla yɔ kwu ɔ a jɛ ɔ eyī, ó klla géē hɔha ce alɔ nɛɛnɛhi. (Ujɛr. 29:11, 12) Ujisɔsi abɔyinu lɛ ɛlá wu ɔnyɔɔnyɛ ku alɔ duu. Abɔ alɔ yɔ i yuklɔ ku alɔ abɔ alɔ wɛ Ācɛ O Yɛce Ukraist a, alɔ lɛ ɔtu ō tu kwu ŋma ɛlā ku Ujisɔsi nōo kahinii: ‘N yɔ̄ mla aá.’ (Umát. 28:20) Eko duuma nɛ alɔ gbɛla lɔɔlɔhi tu ohɛta nōo i wa ɛcɔbu ɛhaajɛ ku Ajɔɔcɛ Ku Ɔwɔico a, ó géē lɔfu tu eyiyoce ku alɔ iyē klla ya ku alɔ le miya ō lé ɔtu ku unwalu ɛyɛɛyɛyi babanya.—Uróm 8:19-21.

LƐ UVIDIO NYĀ MAFU NŌO KAHINII: ABƆ EKO KU UNWALU YƆ I WA A, EYĪ KU UWƆ KÓŌ KWU UJISƆSI!—AƆHĀ KU ƐCƆBU A, CƐƐ AA LƐ ƆKA NŌO BA NYĀ CILA:

• Ɛgɛnyá nɛ alɛɛcɛ je kɔ hi Ɔwɔico ta a, ɔdi kē bɛɛcɛ ŋma anu a?

• Ɛcɔbu nyá yɔ lɛ ācɛ nōo hayi kpaakpa lɛ Ujehofa a?

• Ɛgɛnyá nɛ ɛnɛɛnɛ ɛcɔbu nyā tɔɔtɛ gla a?

• Ɔhā nyá ipu ɛcɛ ɛyipɛ nɛ Ujehofa cokonu nu a nɛ a yɔ i leyice ō má a?