Mafu Ihɔtu Ipu Apɔlɛ

Ihɔtu lɛbɛɛka unɛ nōo gē bi apɔlɛ tɔha a. Ɔdaŋ ka ihɔtu i yɔ ipu apɔlɛ ŋ, ó géē lɔnɔ kéē piyatɔha klla ya odee mla iyi uwa. Ɛgɛnyá nɛ aɔba, anya, adā mla ɛ́nɛ́ lɔfu mafu ihɔtu ipu apɔlɛ a?

Ɔba nōo lɛ ihɔtu gē lɛ ɛlá wu ɛgbá ku ɔnyā nu, ɛgɛ nɛ ɔnyā a leyi má odee lɛ mla ɛgɛ nōó gē ya ɔ lɛ a. (Āfi. 5:28, 29) Ó géē ya ɛgbá ku ɔkpiye ku apɔlɛ ku nu lɛ uwa klla ta uwa abɔ tubla Ujehofa ajaajɛ. Ɛnyā kē lɛ ō ya mla Ɛ̄gbā Ō Gba Ku Apɔlɛ ɔnɔɔnɛ duu. (1 Utím. 5:8) Ɔnyā nōo lɛ ihɔtu géē lɛyitaajɛ lɛ ɔba nu klla géē mafu “ojīlīmā” lɛ ɔ. (Āfi. 5:22, 33; 1 Upít. 3:1-6) Uwa ɛplɛɛpa cika ō le tutu ō je ya iyi uwa ɛhi ŋma ɔtu. (Āfi. 4:32) Adā mla ɛ́nɛ́ nōo lɛ ihɔtu gē lɛ ɛlá wu ayipɛ ɔlɛ uwa eyeeye klla nwu uwa kéē yihɔtu ku Ujehofa. (Obla. 6:6, 7; Āfi. 6:4) Unwalu ɛyɛɛyɛyi nyá nɛ ayipɛ ɔlɛ uwa gē má ipu inɔkpa a? Ɛgɛnyá néē yɔ i ya unwalu néē yɔ i má ŋma ɛgiyi aɛgɔ ku uwa ipu inɔkpa lé a? Ɔdaŋ ka ihɔtu yɔ apɔlɛ, ɛjɛɛji ācɛ apɔlɛ a gē yɔ ɛbɔ klla lɛ ogbotu.

LƐ UVIDIO NYĀ MAFU NŌO KAHINII: Ō MAFU IHƆTU NŌÓ GĒ MƐ Ŋ IPU APƆLƐ, CƐƐ AA LƐ ƆKA NŌO BA NYĀ CILA:

• 

  Ɛgɛnyá nɛ ɔba nōo lɛ ihɔtu gē lɛ ɛlá wu ɔnyā nu klla má ɔ kóō cɛgbá lɛ ɔ nɛɛnɛhi a?

• 

  Ɛgɛnyá nɛ ɔnyā nōo lɛ ihɔtu gē mafu ojilima lɛ ɔba nu a?

• 

  Ɛgɛnyá nɛ adā mla ɛ́nɛ́ nōo lɛ ihɔtu gē nwu ayipɛ ɔlɛ uwa ɛlā ku Ɔwɔico a?