Ya Ku Ɔtu Okpoce Ku Uwɔ Lɛ Ujehofa Mla Ujisɔsi Kóō Lɔfu Ŋma Lɛ Ō Yuklɔ Mla Ɔkpá Ku “Jɔɔnyɛ Oyeeyi Nōó Gáā Mɛ Gboogboo Ŋ!

Gbɔbu ɛɛ ku ɔcɛ nēé yɔ i ya oklɔcɛ mla ɔ a kóō ya ɔdā nōo he Ɔwɔico ɔtu, ó cika ō lɛ ɔtu okpoce olɔfu. (Uhíb. 11:6) Alɔ lɔfu ta uwa abɔ ŋma lɛ ō bi ɔkpá ku Jɔɔnyɛ Oyeeyi Nōó Gáā Mɛ Gboogboo Ŋ! ma le yuklɔ. Ɔkpá ō le ya oklɔcɛ nyā lɛ aɛga ku Ubáyíbu nōo cɛgbá, ɛlā ō teyi peee, aɔka nōo i lɛ abɔ kwu ɔcɛ ɔtu, auvidio nōo gē lɛ abɔ kwu ɔcɛ ɔtu mla aifoto nōo heyifuu. Alɔ gē ta ɔcɛ nɛ alɔ gē klɔcɛ mla ɔ a abɔ kóō lɛ aɔdā nɛ ɔla i gáā yi taajɛ gla ŋ ma lɛ, eko duuma nɛ alɔ ta ɔ abɔ kóō lɛ auce ō ya ku Ācɛ Ō Yɛce Ukraist mla ō lɛ ɛma olɔhi mla Ɔwɔico.—1 Ukɔ́r. 3:12-15.

Ó gē lɔnɔ tu Ācɛ ōhī kéē kwu piya ɔya ku Ɔwɔico nɛ ɔcɛ i gē má eyī gla ŋ ma. Ohigbu ɛnyā, alɔ cɛgbá ō ta uwa abɔ jé ɛnɛɛnɛ auce ō ya ku Ujehofa kéē klla kpɔtuce ɔ.

LƐ UVIDIO NYĀ MAFU NŌO KAHINII: YA KU ƆTU OKPOCE KU UWƆ LƐ UJEHOFA KÓŌ LƆFU ŊMA LƐ Ō YUKLƆ MLA ƆKPÁ KU “JƆƆNYƐ OYEEYI NŌÓ GÁĀ MƐ GBOOGBOO Ŋ!” CƐƐ AA LƐ ƆKA NŌO BA NYĀ CILA:

• Ɛgɛnyá nɛ alɔ jé ku ɔyinɛ nɔnya a lɛ otutu ya lɔɔlɔhi ohigbu oklɔcɛ a?

• Ɛgɛnyá nɛ ó bi aɔka nōó yɔ ipu ɔkpá a ŋ ma le ta ɔcɛ nɛ ó yɔ i ya oklɔcɛ mla ɔ a abɔ, o ya ɛɛ ka ó ka ɔdā nɛ ó gbɛla mla ɛgɛ nɛ ɔtu ya ɔ lɛyikwu Ayisáya 41:10, 13 a?

• Ɛgɛnyá nɛ uvidio mla aɛga ku Ubáyíbu a lɛ abɔ kwu ɔcɛ nōó yɔ i ya oklɔcɛ mla ɔ a iyē a?

Ācɛ alɛwa i jé ɔdā nɛ ɛya ō gwo ku Ujisɔsi wɛ a ŋ, amāŋ é má ɔ kóō wɛ ɛhi nōo ŋma ɛgiyi Ɔwɔico lɛ uwa ŋ. (Ugal. 2:20) Ohigbu ɔɔma a, alɔ cika ō ta uwa abɔ kpɔtuce ɛya ō gwo ku Ujisɔsi.

LƐ UVIDIO NYĀ MAFU NŌO KAHINII: YA KU ƆTU OKPOCE KU UWƆ LƐ UJISƆSI KÓŌ LƆFU ŊMA LƐ Ō YUKLƆ MLA ƆKPÁ KU “JƆƆNYƐ OYEEYI NŌÓ GÁĀ MƐ GBOOGBOO Ŋ!” CƐƐ AA LƐ ƆKA NŌO BA NYĀ CILA:

• Ɛgɛnyá nɛ alɔ jé ku ɔyinɛ nɔnyilɔ a lɛ otutu ku oklɔcɛ a ya lɔɔlɔhi a?

• Ɛgɛnyá nōó bi aɔdā nōo yɔ aya ku “Jila Ɛlā Nyā Má Tōōtɔ̄ɔ̄” a le ta ɔcɛ nɛ ó yɔ i klɔcɛ mla ɔ a abɔ a?

• Ɔdiya nɛ ō gbɔɔkɔ kwɛyi ɔcɛ nɛ ó yɔ i klɔcɛ mla ɔ a cɛgbá nɛhi a?