Ɛnɛɛnɛ Uklɔ Ku Ɔna Ō Ta Ipu Ɔya Ɔmahaanɛ Nōo Géē Kɛla Lɛyikwu Ajɔɔcɛ Ku Ɔwɔico!

Ipu Ɔya Ɔmahaanɛ, alɔ géē ya ɛnɛɛnɛ uklɔ ku ɔna ō ta ō da ācɛ ku Ajɔɔcɛ Ku Ɔwɔico foofunu gáā ya ku unwalu ku alɛɛcɛ kóō mɛ gla a. (Umát. 24:14) Ɛgɛnyá nɛ a lɔfu lɛ abɔ ipu uklɔ a? Mafu ɛga ku Ubáyíbu nōo kɛla lɛyikwu Ajɔɔcɛ ku Ɔwɔico lɛ ācɛ alɛwa ɛgɛ nōó tɔɔtɛ lɛ gla a ipu ɔya ɔɔma. Ɔdaŋ ka ɔcɛ mafu ka Ɛlā Ɔwɔico nɛ a ka lɛ ɔ a he ɔ ɔtu, kwu public edition ku Watchtower No. 2 2020 a u lɛ ɔ. Ɔdaŋ kóō tɔɔtɛ, a hii kpo eko bonu ōcigbihi nyɔ ŋ, cɛɛ ku a ceyitikwu bi ubrociɔ ku Jɔɔnyɛ Oyeeyi Nōó Gáā Mɛ Gboogboo Ŋ! ma le gbɔɔ oklɔcɛ mla ɔcɛ a. Ɛjɛɛji ācɛ nōo wɛ ɔcɛ ō gbɔbu ɔna ō ta ŋma eko ta eko a lɔfu miya ō yuklɔ awa 15 amāŋ 30 ipu Ɔya Ɔmahaanɛ.

Ó gáā gboji gɛ ŋ, Ajɔɔcɛ ku Ɔwɔico géē ca ɛjɛɛji aigɔmɛnti nōo gē nuunu ta ɔ a taajɛ. (Udán. 2:44; 1 Ukɔ́r. 15:24, 25) Alɔ bi ɛnɛɛnɛ ɛga nōo yɔ nyā le mafu ku Ujehofa mɛmla Ajɔɔcɛ ku nu he alɔ ɔtu a!