Ihe Osise Ọ Na-apụghị Ichezọ

KAREN, onye bụworo otu n’ime Ndịàmà Jehova ruo ihe karịrị afọ iri abụọ, chọpụtara na papa ya enwetụghị mmasị n’iso ya kwurịta banyere okpukpe. Otú ọ dị, na nso nso a, nke ahụ gbanwere. Ọ nọrọ n’ụlọ ọgwụ, na-agbake n’ahụ a wara ya. Otu ụbọchị, n’ihi oké ịtụ ọ̀bọ̀, ọ gụchara otu akwụkwọ akụkọ. Akpata oyi wụrụ ya n’ahụ. Ka e mesịrị, mgbe ọ lọtasịrị ụlọ, ọ kpọrọ nwa ya nwanyị. Karen na-akọ, sị: “Papa m gwara m na fon, sị, ‘Karen, ụwa emebiwo.’ Ihe kpasukarịsịrị ya iwe bụ ụzọ e si emeso ụmụaka.

“Ọbụna tupu m nwee ohere ịgba ya ume, o kwuru na mberede, sị: ‘Ụmụ nwanyị abụọ bịara n’ụlọ m taa. Ana m anọkarị n’ubi dị n’azụ ụlọ m, ma ha hụrụ m mgbe m pụtara n’ihu èzí. Otu nwanyị gosiri m otu ubi mara mma e sere ese. Achọrọ m ịgwa ya, sị, “Echere m na i kwesịrị ịhụ azụ ụlọ m—ọ bụ ubi mara mma,” ma agwaghị m ya. O kwuziri na n’oge na-adịghị anya ụwa nile ga-enwe udo. O kwuru na ọ ga-adị ka ubi ahụ, nke onye ọ bụla ga-anụ ụtọ ya. Ewereghị m akwụkwọ ahụ. Ma mgbe ha lara, apụghị m ichezọ ihe osise ahụ. Anọgidela m nnọọ na-eche banyere ya na echiche nke onye ọ bụla ịnọ n’udo. Ị̀ maara akwụkwọ m na-ekwu? Ị̀ pụrụ iwetara m otu?’”

Obi tọrọ Karen ụtọ ime nke ahụ. Ihe osise papa ya zoro aka na ya bụ nke ahụ ị na-ahụ n’ebe a. Isiokwu akwụkwọ ahụ bụ Ihe Ọmụma nke Na-eduba ná Ndụ Ebighị Ebi. Ọ̀ ga-amasị gị ịmatakwu banyere nkwa Bible na n’oge na-adịghị anya Chineke ga-eme ka ụwa ghọọ ubi zuru ụwa ọnụ bụ́ ebe ụmụ mmadụ ga-ebi n’udo? Ị pụrụ ịmata otú ị ga-esi nweta akwụkwọ a site n’idejupụta ma zite akwụkwọ na-esonụ a pụrụ ịdọkapụta adọkapụta n’adres e depụtara na ya ma ọ bụ n’adres kwesịrị ekwesị e depụtara na peji nke 5 na magazin a.

□ Gwanụ m otú m pụrụ isi nweta akwụkwọ bụ́ Ihe Ọmụma nke Na-eduba ná Ndụ Ebighị Ebi.

Kwuo asụsụ nke ọ bụ.

□ Biko kpọtụrụnụ m maka ọmụmụ Bible ebe obibi n’efu.