Echi Ọ̀ Ga-aka Mma?

Ndị mmadụ na-enwe mmasị dị ukwuu banyere ọdịnihu. Olee onye n’ime anyị nke na-agaghị achọ ịma ihe anyị ga-eme n’ọnwa ọzọ, n’afọ ọzọ, ma ọ bụ ọbụna n’afọ iri na-abịa abịa? E lee ya anya n’ụzọ sakwuru mbara, olee ihe ụwa a ga-adị ka ya n’afọ 10, 20, ma ọ bụ afọ 30 na-abịa abịa?

Ì NWERE olileanya na ọdịnihu ga-adị mma? Ọtụtụ nde mmadụ nwere. A pụrụ ikewa ndị nwere olileanya dị otú a ụzọ abụọ: ndị nke sịrị na ha nwere ezi ihe mere ha ji nwee ya, na ndị nke nwere ya nanị n’ihi na ha achọtụghị ichewe echiche na ihe ga-adị njọ.

N’ezie, ụfọdụ ndị enweghị olileanya na ihe ga-aka mma n’ọdịnihu. Ụfọdụ n’ime ha bụ ndị e ji ibu amụma banyere ọdachi mara, bụ́ ndị o yiri ka ọ̀ na-atọ ụtọ ịkpọsa na a ga-ebibi ụwa. Dị ka ha si ele ọdịnihu anya, ọ bụrụ na o nwere ndị ga-alanahụ, ọ ga-abụ mmadụ ole na ole.

Olee otú i si ele ọdịnihu anya? Ihe ị na-ahụ ọ̀ bụ mbibi a ga-ebibi ụwa ka ọ̀ bụ ụwa nke ndị mmadụ ga-anọ n’udo nakwa ná nchebe? Ọ bụrụ na ọ bụ ụwa nke ndị mmadụ ga-anọ n’udo nakwa ná nchebe, gịnị mere i ji nwee olileanya dị otú ahụ—ì nwere ihe àmà kara gị obi, ka ihe mere i ji nwee ya ọ̀ bụ nanị n’ihi na ọ na-agụ gị agụụ ka ọ dị otú ahụ?

N’adịghị ka ndị ahụ e ji ibu amụma banyere ọdachi mara, ndị na-ebipụta Teta! ekwetaghị na a ga-ekpochapụ ihe nile a kpọrọ mmadụ. Kama nke ahụ, Bible na-enye ihe àmà gbara ọkpụrụkpụ mere a ga-eji kwere na ihe ga-amagbu onwe ya n’ọdịnihu.

[Ebe E Si Nweta Foto Dị na peeji 5]

Foto nke U.S. Department of Energy