Jehoshafat Atụkwasị Jehova Obi

Ị̀ MA ndị ndị a bụ na ihe ha na-eme? Ha na-eje ịlụ agha. Ndị ikom nọ ha n’ihu na-abụ abụ. Ma ị pụrụ ịjụ, sị: ‘Olee ihe mere ndị ahụ na-abụ abụ ejighị mma agha na ube ha ga-eji lụọ agha?’ Ka anyị hụ.

Jehoshafat bụ eze nke ebo abụọ nke alaeze Izrel. Ọ dịrị ndụ n’otu oge ahụ Eze Ehab na Jezibel nke alaeze ebo iri dịrị ndụ. Ma Jehoshafat bụ eze ọma, nna ya bụ́ Esa bụkwa eze ọma. N’ihi ya, ndị nọ n’ebo abụọ nke alaeze dị n’ebe ndịda nwere obi ụtọ na udo ruo ọtụtụ afọ.

Ma, ọ dị otu ihe merenụ nke mere ka egwu jide ha. Ndị ozi gwara Jehoshafat, sị: ‘Oké ìgwè ndị agha si ná mba Moab, Amọn, na Ugwu Sia na-abịa ibuso gị agha.’ Ọtụtụ ndị Izrel zukọrọ na Jeruselem iji chọọ enyemaka Jehova. Ha gara n’ụlọ nsọ Chineke, Jehoshafat wee nọrọ n’ebe ahụ kpegara Jehova ekpere, sị: ‘O, Jehova Chineke anyị, anyị amaghị ihe anyị ga-eme. Ike anyị na ìgwè ndị agha a ahaghị. Biko nyere anyị aka.’

Jehova ṅara ntị wee mee ka otu n’ime ndị ozi ya gwa ha, sị: ‘Ọ bụghị unu nwe agha ahụ, ọ bụ nke Chineke. Unu agaghị alụ ọgụ. Cherenụ ma hụ ka Jehova ga-esi zọpụta unu.’

N’ụtụtụ echi ya, Jehoshafat gwara ha, sị: ‘Tụkwasịnụ Jehova obi!’ O wee debe ndị na-abụ abụ n’ihu ndị agha ya. Ka ha na-agakwa, ha na-abụku Jehova abụ otuto. Ị̀ ma ihe mere mgbe ha ruru ọgbọ agha ahụ nso? Jehova mere ka ụsụụ ndị agha nke ndị iro ha lụrịta ọgụ n’etiti onwe ha. Mgbe ndị Izrel rutere, nke ọ bụla n’ime ndị agha ahụ bụ́ ndị iro ha anwụwo!

Ọ̀ bụ na amamihe adịghị ná ntụkwasị obi Jehoshafat nwere n’ebe Jehova nọ? Anyị ga-abụkwa ndị maara ihe ma ọ bụrụ na anyị atụkwasị Jehova obi.