Okwu Bu Ụzọ

Ezi Onye Na-agụ Akwụkwọ A:

‘Bịa bụrụ onye na-eso ụzọ m.’ (Mak 10:21) N’ezie, mgbe Jizọs Kraịst kwuru okwu ndị a, ọ na-akpọ anyị òkù ka anyị soro ya. Ị̀ zawo òkù a ọ na-akpọ? Ịza òkù a ga-emetụta ndụ gị nke ukwuu. Ọ̀ bụ n’ihi gịnị?

Jehova zitere Ọkpara ọ mụrụ naanị ya n’ụwa ka o nye ndụ ya ka ọ bụrụ ihe mgbapụta. (Jọn 3:16) Ọ bụghị naanị na Ọkpara ahụ nwụrụ n’ihi anyị, kama, o gosikwara anyị otú anyị ga-esi na-ebi ndụ. N’ihe niile o mere, o guzosiri ike n’ezi ihe ma mee ka obi Nna ya ṅụrịa. Jizọs gosikwara anyị otú anyị ga-esi dị ka Nna ya. Okwu Jizọs na omume ya gosiri ihe bụ́ ụzọ Nna ya na uche Nna ya n’ụzọ zuru okè.—Jọn 14:9.

Baịbụl kwuru na Jizọs bụ ‘ihe nlereanya ka anyị wee sochie nzọụkwụ ya anya.’ (1 Pita 2:21) Ọ bụrụ na anyị chọrọ ịbịarukwu Jehova nso, ọ bụrụ na anyị chọrọ ibi ndụ dị mma n’ezie ugbu a, ọ bụrụkwa na anyị chọrọ ịnọgide na-eje ije n’ụzọ na-eduga ná ndụ ebighị ebi, anyị aghaghị isochi nzọụkwụ Kraịst anya.

Iji malite iso nzọụkwụ Jizọs, ọ dị anyị mkpa ịmata otú o si bie ndụ n’ụwa. Ya mere, anyị kwesịrị iji nlezianya mụọ ihe e kwuru banyere Jizọs. E dere ihe ndị a n’ime Baịbụl. Ichebara ihe Jizọs kwuru na ihe ndị o mere echiche, na ịtụle otú anyị pụrụ isi ṅomie ya n’okwu nakwa n’omume ga-enyere anyị aka ịhụkwu nke ọma otú anyị ga-esi na-eso ya.

Ka akwụkwọ a nyere gị aka ka ị hụkwuo Jizọs na Jehova n’anya. Ka ịhụnanya ahụ kpalie gị isochi nzọụkwụ Jizọs anya, ka i wee mee ka obi Jehova ṅụrịa ugbu a nakwa ruo mgbe ebighị ebi.