‘Dị Nnọọ Ka Ígwè Na-amụcha Ígwè’

MGBE ọ na-eru n’ọgwụgwụ nke narị afọ nke atọ O.A., otu nwa okorobịa na-eji ihe a kpọrọ ihe aha ya bụ Anthony, onye a kọwara dị ka “Onye Kraịst nke Copt,” hapụrụ ụwa ma nọrọ n’ime ọzara nanị ya ruo 20 afọ. N’ihi gịnị? O chere na nke a bụ ụzọ kasị mma nye ya isi fee Chineke. Ọ bụ ya bụ onye mbụ na-anọ nanị ya a ma ama nke Krisendọm.

Taa, Krisendọm nwere ole na ole ndị na-anọ nanị ha. Ma ọnụ ọgụgụ ndị mmadụ na-ebuwanye ibu na-achọ ịnọ nanị ha n’ụzọ ọzọ. Ha adịghị ekwe ịgwa ndị ọzọ okwu banyere okpukpe, na-eche na ụdị okwu ahụ na-eduga ná nghọtahie na ịlụ ọgụ. Ofufe ha na-agụnye n’ụzọ bụ́ isi ịghara imerụ ndị agbata obi ha ahụ.

N’eziokwu, mmadụ ịghara imerụ onye agbata obi ya ahụ bụ otu akụkụ nke ezi okpukpe, ma a chọrọ ihe karịrị nke ahụ. Otu ilu oge ochie na-asị: “Ígwè na-amụcha ígwè; otú a ka mmadụ na-amụcha ihu enyi ya.” (Ilu 27:17) Eziokwu dị na ya bụ na Bible na-agba ndị Kraịst ume izukọ ọnụ, ọ bụghị ikewapụ onwe ha iche kpam kpam pụọ n’ụwa ma ọ bụ pụọ n’ebe ndị Kraịst ndị ọzọ nọ. (Jọn 17:14, 15) Ọ na-asị: “Ka anyị na-atụgharịtakwa uche n’ahụ ibe anyị ịkpasu ịhụnanya na ọrụ ọma dị iche iche; ka anyị gharakwa ịhapụ nzukọ nke onwe anyị.” (Ndị Hibru 10:24, 25) Ndịàmà Jehova na-agbaso ndụmọdụ ahụ. Ọtụtụ ugboro n’izu, ha na-ezukọ iji ‘mụchaa ihu ibe ha,’ na-ewulite okwukwe nke ndị kwere ekwe ibe ha. Ha na-achọpụta na iji ezi obi na-atụle Bible adịghị eduga n’ịlụ ọgụ. Kama nke ahụ, ọ na-eduga n’ịdị n’otu na udo. Ọ bụ akụkụ dị oké mkpa nke ezi ofufe.