Udo Ụwa—Site N’ole Ebe?

IME ka agụmakwụkwọ na okpukpe gbasaruo n’ụwa dum ọ̀ ga-eweta udo ụwa? Nke a bụ atụmanya Dr. Robert Muller, onye bụbu osote odeakwụkwọ ukwu nke Mba Ndị Dị n’Otu na onye nwetara Onyinye Maka Agụmakwụkwọ Udo nke 1989 nke UNESCO. Dị ka a kọrọ n’akwụkwọ akụkọ bụ́ The Vancouver Sun, Dr. Muller “kwenyesiri ike na a ghaghị ịkụziri ụmụ akwụkwọ nile nke ụwa usoro ihe ọmụmụ ndị bụ́ eziokwu banyere mbara ụwa, ụmụ mmadụ na emeghị ihe ike.” O chere n’echiche ụbọchị ụlọ akwụkwọ nile dị gburugburu ụwa ga-akụziri ụmụaka banyere òtù UN dị ka olileanya kasị mma maka udo. O kwenyekwara na “okpukpe nile nke ụwa ga-aghọ òtù ọhụrụ yiri òtù UN nke a kpọrọ Okpukpe Ndị Dị n’Otu,” ka Sun kọrọ. Mgbe ahụ “ozizi okpukpe nile ga-akwalite emeghị ihe ike.”

Udo ụwa ọ̀ ga-aghọ ihe dị adị n’ezie? Kpọmkwem! Ma ọ bụghị site n’aka òtù ọ bụla nke mmadụ. Ihe karịrị afọ 2,700 gara aga, otu nwoke bụ́ onye edemede e nyere ike mmụọ nsọ kọwara ebe dị elu e si enweta ihe ọmụmụ maka udo mgbe o buru n’amụma na ndị obi ha ziri ezi ga-abụ ndị “mmụta Jehova,” na udo ha “ga-abakwa ụba.”—Aịsaịa 54:13.

Chineke bụ onye “na-enye udo,” ka Bible na-ekwu. (Ndị Rom 16:20, NW ) Ọbụna ugbu a, ọmụmụ ihe magburu onwe ya nke zuru ụwa ọnụ na-aga n’ihu ka Jehova na-enye ndị ya ntụziaka ka ha “chọọ udo, gbasookwa ya,” ‘kpụgharịa mma agha ha nile ka ha bụrụ mma ogè,’ gharakwa ‘ịmụta agha ọzọ.’—1 Pita 3:11; Aịsaịa 2:2-4.

Ofufe nke hiwere isi n’eziokwu, nke ihu abụọ na aghụghọ na-adịghị na ya, ka Chineke na-anabata ma na-agọzi. (Matiu 15:7-9; Jọn 4:23, 24) Nanị ezi ofufe, nke kwekọrọ n’ụzọ zuru ezu n’Okwu Chineke, pụrụ ime ka e nwee ndị mmadụ na-ebi n’udo ma dịrị n’otu, nweekwa ezi ịhụnanya maka ibe ha.—Jọn 13:35.

Iji mụtakwuo banyere ihe Okwu Chineke na-ekwu banyere udo ụwa, anyị na-akpọ gị òkù ịkpọtụrụ ndị na-ebipụta magazin a.