Ịkpa Ókè Agbụrụ na Okpukpe

“MGBE m bịara na United States na 1978, m kweere na America edoziwo nsogbu ịkpa ókè agbụrụ ya kemgbe, na ndị isi ojii bụ ụmụ amaala ha na ndị ọzọ ha nhata,” ka Mark Mathabane, bụ́ onye edemede a mụrụ na South Africa kwuru, n’oge magazin bụ́ Time na-agba ya ajụjụ ọnụ. “N’ọtụtụ ụzọ, achọpụtara m na nke ahụ bụ eziokwu. O yiri ka United States ọ̀ karịrị nnọọ South Africa. Mgbe ahụ, achọpụtara m, n’ụzọ wụrụ m akpata oyi, na e nwebeghị mgbanwe dị ukwuu n’obi ụmụ mmadụ.” Gịnị dugara ya ná nchọpụta ahụ na-eju anya?

“Otu n’ime awa ndị nkewa kasị apụta ìhè na ha n’America bụ elekere 11 n’ụtụtụ Sunday,” ka Mathabane kwuru. O kwuru na ọbụna n’ime chọọchị, ndị mmadụ adịghị enwe ọchịchọ iso ndị si n’agbụrụ ọzọ fee ofufe. “Olee mmetụta ha pụrụ inwe n’ụbọchị ndị ọzọ nke izu?” ka ọ jụrụ. N’ịkpọ òkù maka mmụta dị ka ihe ga-eweta mgbanwe, Mathabane kwuru, sị: “Site ná mmụta, a na-eme ka ị nabata ịha nhata nke ụmụ mmadụ.”

Ndịàmà Jehova kwenyere na mmụta bụ ihe ngwọta ya, ma ha na-atụ aro karịsịa banyere mmụta dabeere n’Okwu Chineke. Ee, Bible na-enyere ha aka itida ihe mgbochi nile nke ajọ mbunobi agbụrụ na-eweta—ọbụna n’ala ebe ịkpọasị agbụrụ jupụtara. Kwa izu n’Ụlọ Nzukọ Alaeze ha, ndị sitere n’agbụrụ na mba dị iche iche na-abịakọta ọnụ iji bụrụ ndị e ziri ihe n’iwu na ụkpụrụ dị iche iche nke Okwu Chineke, bụ́ Bible. A dịghị anakọta ụtụ ọ bụla ná nzukọ ndị a. A na-agba gị ume ịbịa!