Ihe Na-agụ Ya Agụụ Ma O Cheta New York City

E GOSIPỤTAWO ihe ịrịba ama ahụ dị n’ebe a n’ụzọ pụtara ìhè n’elu otu n’ime ụlọ obibi akwụkwọ Watchtower Society dị na Brooklyn, New York, kemgbe afọ ndị 1950. A na-echetara ndị njem, ndị na-eme nleta, na ndị ọzọ na-agafe n’ebe ahụ ịgụ Bible kwa ụbọchị. Akwụkwọ ozi na-esonụ, bụ́ nke sitere n’aka otu nwata nwanyị bụ́ Onyeàmà, na-egosi ịdị irè nke ihe ncheta a.

“Eso m nwa klas m na-ekwurịta ihe m chọrọ ime mgbe m gụsịrị kọleji. Amalitere m ikwu banyere Betel, isi ụlọ ọrụ nke Ndịàmà Jehova, o wee nwee nnọọ mmasị. Ọ gwara m na ya ebiwo na New York City ná ndụ ya nile. Ezinụlọ ya ejichaghị okpukpe kpọrọ ihe, ma kwa ụtụtụ, mgbe ọ bụla o lepụrụ anya na windo, ọ na-ahụ ihe ịrịba ama nke e dere ‘Na-agụ Okwu Chineke Bụ́ Bible Nsọ Kwa Ụbọchị,’ n’elu ya. Ya mere, kwa ụbọchị, ọ na-agụ Bible ya tupu ọ gaa ụlọ akwụkwọ.

“Mgbe ha kwapụsịrị n’obodo ahụ, ọ sịrị na ihe na-agụ ya agụụ ma o cheta New York City bụ ihe ahụ na-echetara ya ịgụ Bible mgbe ọ bụla o tetara ụra, bụ́ nke ọ na-adịghịzi ahụ. Ma n’ihi ihe ịrịba ama ahụ dị n’elu ụlọ Watchtower, ịgụ Bible aghọwo àgwà ya, ya mere ọ nọgidere na-agụ Bible kwa ụbọchị!”

Olee ụzọ pụrụ ịka mma isi malite ụbọchị karịa ịgụ akụkụ nke Okwu Chineke! N’ime otú ahụ, obi abụọ adịghị ya na ị ga-aghọta okwu Pọl onyeozi, bụ́: “Ihe dị nsọ nile e deworo n’akwụkwọ nsọ . . . pụrụ ime ka ị bụrụ onye amamihe ịnata nzọpụta site n’okwukwe nke i kwere na Kraịst Jisọs.”—2 Timoti 3:15-17.