Ndị Mụrụ Ụmụ Ajụ Ajọ Mbunobi nke Otu Onye Nkụzi

Otu onye nkụzi ụlọ akwụkwọ praịmarị dị na Cassano Murge, Itali, nyere ụfọdụ n’ime ụmụ akwụkwọ ya mpempe akwụkwọ ndị a na-amapawa amapawa ka ha were laa n’ebe obibi ha. Mpempe akwụkwọ ndị a, bụ́ ndị e bu n’uche ka a mapawa n’ọnụ ụzọ nke ihu ụlọ, nwere ihe ịrịba ama, bụ́: “Anyị bụ ndị Katọlik. A na-agwa Ndịàmà Jehova ka ha ghara ịkụ aka n’ọnụ ụzọ a.”

Ụfọdụ n’ime ndị mụrụ ụmụ akwụkwọ ahụ, ọ bụ ezie na ha abụghị Ndịàmà Jehova n’onwe ha, anabatatụghị ihe onye nkụzi ahụ mere. Dị ka akwụkwọ akụkọ bụ́ Muoviti Muoviti si kwuo, ndị nne na nna ahụ kwuru na ‘izi ụmụaka ụdị ozi a na-atụnye ụtụ n’ime ka ha na-ajụ onye ọ bụla na-adịghị eche echiche otú ha si eche ma ọ bụ ghara ịnabata mmadụ n’ihi na okpukpe ya “dị iche” na nke ha.’ Otu nne nke degaara ndị na-ede akwụkwọ akụkọ ahụ akwụkwọ kpọrọ mpempe akwụkwọ ahụ “mkpụrụ nke na-emebi ihe, ihe sitere n’amaghị ihe na nzuzu.”

Dị ka akụkọ a na-egosipụta, ọtụtụ ndị obi ha ziri ezi maara ihe ize ndụ dị n’ịkụ mkpụrụ nke ajọ mbunobi. Ha na-akwanyekwara ozi ndị Kraịst nke Ndịàmà Jehova na-eje n’Itali nile nakwa n’ụwa nile ùgwù. Gịnị ma ị jụọ Ndịàmà Jehova ajụjụ ‘banyere olileanya ahụ nke dị n’ime ha’? Ha ga-enwe oké mmasị iso gị kwurịta ya, na-eji “nkwanye ùgwù miri emi” eme otú ahụ.—1 Pita 3:15, NW.