“Na-echenụ Nche”

N’OGE ochie, ndị nche ọnụ ụzọ na-anọ n’ọnụ ụzọ obodo na nke ụlọ nsọ, mgbe ụfọdụkwa, n’ọnụ ụzọ ụlọ ndị mmadụ. E wezụga ịhụ na e mechiri ọnụ ụzọ ámá n’abalị, ndị nche ọnụ ụzọ na-arụkwa ọrụ dị ka ndị nche. Nke a bụ nnukwu ibu ọrụ n’ihi na, ka obodo ahụ wee nọrọ ná nchebe, ha ga-adọrịrị ndị mmadụ aka ná ntị banyere ihe ize ndụ ọ bụla na-abịanụ.

Jizọs Kraịst maara ọrụ ndị nche ọnụ ụzọ nke ọma. N’otu oge, o ji ndị na-eso ụzọ ya tụnyere ndị nche ọnụ ụzọ ma gbaa ha ume ịdị na-eche nche banyere ngwụsị nke usoro ihe ndị Juu. O kwuru, sị: “Nọgidenụ na-ele anya, nọgidenụ na-amụ anya, n’ihi na unu amaghị mgbe oge ahụ a kara aka bụ. Ọ dị ka nwoke na-eje mba ọzọ nke hapụrụ ụlọ ya wee . . . nye onye nche ọnụ ụzọ iwu ka ọ nọgide na-eche nche. Ya mere nọgidenụ na-eche nche, n’ihi na unu amaghị mgbe nna nwe ụlọ na-abịa.”—Mak 13:33-35.

N’otu aka ahụ, ruo ihe karịrị otu narị na iri afọ abụọ na ise ugbu a, magazin a bụ́ Ụlọ Nche, anọwo na-enye ndị mmadụ agbamume Jizọs nke ‘iche nche.’ N’ụzọ dị aṅaa? Dị ka peeji nke 2 nke magazin a si kwuo, “Ọ na-eche nche banyere ihe na-eme n’ụwa ka ihe ndị a na-emezu amụma Bible. O ji ozi ọma akasi mmadụ nile obi, na mgbe na-adịghị anya, Alaeze Chineke ga-ebibi ndị na-emegbu mmadụ ibe ha, na ọ ga-agbanwe ụwa ịghọ paradaịs.” N’ịbụ nke a na-ekesa ihe karịrị nde iri abụọ na isii n’otu narị asụsụ na iri ise, Ụlọ Nche bụ magazin okpukpe a kasị ekesa n’ụwa nile. Dị ka ndị nche ọnụ ụzọ nke oge ochie, Ndịàmà Jehova na-eji ya agba ndị mmadụ ume n’ebe nile ka ha ‘mụrụ anya’ n’ụzọ ime mmụọ n’ihi na Onyenwenụ ahụ, bụ́ Jizọs Kraịst, ga-alaghachi n’oge na-adịghị anya ma mezuo ihe e kpere n’ikpe n’isi usoro ihe a.—Mak 13:26, 37.