Na Ntọala Dị Aṅaa Ka Ị Na-ewukwasị Ihe?

AFỌ ole ụlọ ga-anọru dabeere n’ụzọ bụ́ isi n’otú ntọala ya siruru n’ike. Mgbe ụfọdụ, Bible na-eji ụkpụrụ a eme ihe n’ụzọ ihe atụ.

Dị ka ihe atụ, Aịzaịa onye amụma na-ezo aka n’ebe Jehova Chineke nọ dị ka onye ‘tọrọ ntọala ụwa.’ (Aịsaịa 51:13) Ihe e ji tọọ ntọala a bụ iwu Chineke ndị a na-apụghị ịgbanwe agbanwe bụ́ ndị na-achịkwa mgbagharị nke ụwa ma na-ejigide ya n’ọnọdụ ya. (Abụ Ọma 104:5) Okwu Chineke, bụ́ Bible, kwukwara banyere “ide” nke e wukwasịrị ọha mmadụ na ya. Ha bụ ikpe ziri ezi, iwu na ịdị n’usoro. Mgbe e ji ikpe na-ezighị ezi, nrụrụ aka na ime ihe ike ‘kwada’ ha ma ọ bụ mee ka ha gharazie isi ike, ọha mmadụ anaghịzi adị n’usoro.—Abụ Ọma 11:2-6; Ilu 29:4.

Ụkpụrụ a metụtakwara ndị mmadụ n’otu n’otu. N’imechi Ozizi Elu Ugwu ya a ma ama, Jizọs Kraịst kwuru, sị: “Onye ọ bụla nke na-anụ okwu m ndị a ma na-eme ha, a ga-eji ya tụnyere nwoke nwere uche, bụ́ onye wuru ụlọ ya n’elu oké nkume. Mmiri wee zosie ike, idei mmiri abịakwa, ifufe efekwasịkwa ụlọ ahụ, ma ọ daghị, n’ihi na a tọrọ ntọala ya n’elu oké nkume. Ọzọkwa, onye ọ bụla nke na-anụ okwu m ndị a ma ghara ịdị na-eme ha, a ga-eji ya tụnyere nwoke nzuzu, bụ́ onye wuru ụlọ ya n’elu ájá. Mmiri wee zosie ike, idei mmiri abịakwa, ifufe efekwasịkwa ụlọ ahụ, o wee daa, ndakpọ ya dịkwa ukwuu.”—Matiu 7:24-27.

Na ntọala dị aṅaa ka ị na-ewukwasị ndụ gị? Ọ̀ bụ n’ájá na-esighị ike nke nkà ihe ọmụma ụmụ mmadụ na-adịghị asọpụrụ Chineke, bụ́ nke ihe ga-esi na ya apụta bụ ihe owuwu ahụ ịdakasị? Ka ị̀ na-ewukwasị ya n’elu oké nkume siri ike nke nrubeisi nye okwu Jizọs Kraịst, bụ́ nke ga-enyere gị aka ịlanahụ oké ifufe ihe atụ ná ndụ?