Ha Na-ekwusara Ndị Ogbi Ozi Ọma

“HA NA-AKỤZIRI gị ihe ime mmụọ!” Nke ahụ bụ otú onyeisi nke ebe a na-elekọta ndị agadi nke dị n’obodo Navalcarnero, Madrid, Spen, si kọwaa na nso nso a ọbịbịa Ndịàmà Jehova na-abịa n’ebe ahụ. Gịnị kpaliri ya ikwu nke ahụ?

Ụfọdụ ndị bi n’ebe ahụ nke a na-akpọ Rosas del Camino dara ogbi. Otú ọ dị, ebe ọ bụ na Ndịàmà agbalịwo ịmụta Ụdị Asụsụ Ogbi nke Spen, ha na-enwe ike ịgwa ndị a bi n’ebe ahụ okwu. Onyeisi ahụ toro Ndịàmà maka ịdị na-ewepụta oge ha iji kụziere ndị nọ ná mkpa ihe ndị sitere na Bible. O kwuru mmetụta dị mma ozi ọma Alaeze ahụ a na-akụziri ndị ahụ nwerela n’ahụ́ ha. Ndị bikwanụ ebe ahụ—karịsịa ndị nwere nsogbu ịnụ ihe ma ọ bụ ịhụ ụzọ—jikwa nnọọ nleta Ndịàmà na-eleta ebe ahụ kpọrọ ihe.

Eulogio, bụ́ onye bi ebe ahụ nke kpuru ìsì ma daa ogbi, so Ndịàmà Jehova na-amụ Bible ugbu a. Otu ụbọchị ka ọmụmụ ihe ahụ nọ na-aga n’ihu, otu agadi nwoke bịara nye Onyeàmà na-eduzi ya uri nke ndị bi ebe ahụ dere iji gosi ekele ha. Isiokwu uri ahụ bụ “Ịbụ Onyeàmà.” Akụkụ ya ụfọdụ kwuru, sị: “Ha na-ebi ndụ obi ụtọ na nke e ji ụkpụrụ achịkwa, Jehova na-enyekwa ha amamihe na-enye ha ọṅụ. Ha na-aga n’ụlọ ndị mmadụ ugboro ugboro n’ihi na ha tụkwasịrị Jehova obi.”

Ọ bụ kpọmkwem obi a ha tụkwasịrị Jehova mere ọtụtụ Ndịàmà gburugburu ụwa jiworo mụọ asụsụ ndị ogbi nọ ná mba ha. N’ụzọ dị otú a, ha na-ezi ndị mmadụ ozi na-agba ume na nke na-enye olileanya a na-achọta na Bible.