Bịaruo Chineke Nso

Ọ “Na-ahụ Ihe Dị n’Obi”

1 SAMUEL 16:1-12

ỌDỊDỊ mmadụ nwere ike imegharị anyị anya. Ihe mmadụ bụ n’elu ahụ́ anaghị egosicha ihe ọ bụ n’ime, n’ime ime obi ya. Ụmụ mmadụ na-ejikarị ọdịdị mmadụ ekpebi ụdị onye ọ bụ. Obi dị anyị ụtọ na Jehova Chineke na-ahụ karịa ihe mmadụ bụ n’elu ahụ́. Ihe e kwuru na 1 Samuel 16:1-12 mere ka nke a doo anya.

Chegodị echiche otú ihe ahụ si mee. Jehova na-achọ ite eze ọhụrụ ga-achị mba Izrel mmanụ. Chineke gwara Samuel onye amụma, sị: “M ga-edunye gị ka ị gakwuru Jesi onye Betlehem, n’ihi na esiwo m n’etiti ụmụ ya ndị ikom họtara onwe m eze.” (Amaokwu nke 1) Jehova agwaghị ya aha onye ọ bụ, naanị ihe ọ gwara ya bụ na onye ahụ ya họọrọ bụ otu n’ime ụmụ ndị ikom Jesi. Ka Samuel na-aga Betlehem, o nwere ike ịbụ na ọ nọ na-eche, sị, ‘Olee otú m ga-esi mara onye Jehova họọrọ n’etiti ụmụ ndị ikom Jesi?’

Mgbe Samuel rutere Betlehem, o mere ndokwa ka ya na Jesi na ụmụ ya ndị ikom rikọọ nri e ji chụọrọ Jehova àjà. Mgbe Elayab, bụ́ ọkpara Jesi, batara, ọdịdị ya masịrị Samuel ozugbo. Samuel chere na ọdịdị Elayab bụ nnọọ ọdịdị onye eze, ya agwakwa onwe ya, sị: “N’ezie, onye Jehova tere mmanụ guzo n’ihu ya.”—Amaokwu 6.

Ma, ọ bụghị otú ahụ ka Jehova si lee ya anya. Ọ gwara Samuel, sị: “Elela anya n’ọdịdị ya na ogo ya, n’ihi na ajụwo m ya.” (Amaokwu 7) Otú Elayab si too ogologo ma maa mma abụghị ihe bụ́ mkpa Jehova. Anya Jehova nke na-ahụ ihe niile na-ahụ ihe karịrị ọdịdị elu ahụ́ ma na-aga n’ebe a na-ahụ ezi ịma mma.

Jehova kọwaara Samuel, sị: “N’ihi na ọ bụghị otú mmadụ si ahụ ihe ka Chineke si ahụ, n’ihi na mmadụ na-ahụ ihe anya na-ahụ; ma Jehova na-ahụ ihe dị n’obi.” (Amaokwu 7) Ee, ọ bụ obi—ihe mmadụ bụ n’ime, bụ́ nke na-ekpebi otú onye ahụ si eche echiche, akpa àgwà, na ihe na-amasị onye ahụ—bụ ihe dị Jehova mkpa. Onye “na-enyocha obi” jụrụ Elayab—jụkwa ụmụ ndị ikom Jesi isii ndị ọzọ bịara n’ihu Samuel.—Ilu 17:3.

Jesi nwere nwa nwoke ọzọ, Devid, bụ́ ọdụ nwa ya, onye “na-azụ atụrụ.” (Amaokwu 11) N’ihi ya, a gara kpọọ Devid n’ebe ọ na-azụ atụrụ, ya abịakwutekwa Samuel. Jehova gwaziri Samuel, sị: “Bilie, tee ya mmanụ, n’ihi na ọ bụ onye a!” (Amaokwu 12) O doro anya na Devid bụ “nwa okorobịa anya ya mara mma, nke makwara mma ile anya.” Ma, ọ bụ otú obi ya dị mere o ji nnọọ bụrụ onye obi Chineke nabatara.—1 Samuel 13:14.

N’ụwa nke ji mma elu ahụ́ kpọrọ ihe gabiga ókè, ọ na-akasi anyị obi ịmara na ọdịdị elu ahụ́ anaghị emegharị Jehova Chineke anya. Ọ chọghị ịma otú i toruru n’ogologo ma ọ bụ ma ndị ọzọ hà na-ele gị anya ka onye mara mma. Ihe dị Jehova mkpa bụ ihe ị bụ n’ime, n’ime obi gị. Ịmata nke ahụ ọ̀ na-akpali gị ịchọ inweta àgwà ndị ga-eme ka ị maa mma n’anya Chineke?