Ncheta Ọnwụ Kraịst n’Ụwa Nile
1 Jehova enyewo anyị ọtụtụ onyinye n’ụba. A kọwara ihe nile si n’ịdị mma na ebere ịhụnanya ya pụta nke ọma dị ka “onyinye Ya nke a na-apụghị ịkọ akụkọ ya.” Ee, “amara Chineke” magburu onwe ya nke na anyị apụghị ịkọwa ya.—2 Kọr. 9:14, 15.
2 Onyinye Ya Kasị Ukwuu: Jisọs Kraịst, dị ka Onye Mgbapụta nke ihe a kpọrọ mmadụ, bụ onyinye kasị ukwuu. N’igosipụta oké ịhụnanya o nwere maka ụwa nke ihe a kpọrọ mmadụ, Jehova nyere Ọkpara ọ mụrụ nanị ya, nke ọ hụkwara n’anya. (Jọn 3:16) Ngọzi dị otú ahụ na-erughịrị anyị nke sitere n’aka Chineke kwesịrị ka e cheta ya n’ụwa nile. Olee mgbe, ọ̀ bụkwa n’ụzọ dị aṅaa? N’uhuruchi Thursday, April 1, 1999, ndị Kraịst n’ụwa nile ga-eme ememe ncheta Nri Anyasị nke Onyenwe anyị, na-eme Ememe Ncheta nke àjà kasị àjà nile.—1 Kọr. 11:20, 23-26.
3 Kraịst nwụrụ n’ihi anyị ọbụna “mgbe anyị nọ na-abụ ndị mmehie,” anyị pụkwara igosi ekele anyị site n’ime Ememe Ncheta nke ọnwụ ya nakwa site n’ịkpọ ndị ọzọ ka ha soro anyị nọrọ n’oge ahụ dị oké mkpa.—Rom 5:8.
4 Ihe Omume Kasị Mkpa: Ncheta nke ọnwụ Kraịst na-eme ka ọ pụta ìhè n’ụzọ bụ́ isi na ọ kwadoro ọbụbụeze Chineke n’ụzọ na-enweghị ntụpọ. Ọ na-echetakwara anyị na anyị pụrụ inwe nguzo dị ọcha n’ihu Jehova site n’inwe okwukwe n’àjà Jisọs, si otú a bụrụ ndị ji nzọpụta n’aka. (Ọrụ 4:12) N’eziokwu, nke a bụ ihe omume kasị mkpa n’afọ!
5 Anyị na-egosipụta ịhụnanya maka ndị agbata obi anyị site n’ịkpọ ha òkù iso anyị mee ememe ncheta Nri Anyasị nke Onyenwe anyị. Ọtụtụ nde ndị matara ọnụ ahịa ya kasị elu ka pụrụ inweta uru nke ihe mgbapụta ahụ. (Fil. 3:8) Ndị nwere okwukwe n’àjà Kraịst pụrụ inweta olileanya e ji n’aka nke ndụ ebighị ebi.—Jọn 17:3.
6 Oge Ememe Ncheta na-enye anyị ohere ndị pụrụ iche iji gosi ekele maka obiọma kasị elu na-erughịrị anyị nke Chineke. Nke a bụ oge magburu onwe ya iji jiri ịnụ ọkụ n’obi kere òkè n’ikwusa ozi ọma Alaeze Chineke. Uru dị ukwuu na-echere ndị nile ji ekpere na-atụgharị uche n’onyinye Jehova nyere anyị n’efu nke karịrị nkọwa ma mee ndokwa ịnọ ya n’ememe Nri Anyasị nke Onyenwe anyị n’afọ a!