À Pụrụ Ịnụ Ụtọ Oge Agadi?

O JIRILA ọkara gafee elekere isii nke ụtụtụ n’otu ụtụtụ oké oyi na-atụ na Soweto, nke dị na South Africa. Oge eruola ka Evelyn bilie n’ihe ndina ya.a Ahụhụ ọ na-ata n’ụlọ ya n’ihi enweghị ihe na-eme ka ime ụlọ kporo ọkụ, abụghị ihe e ji ọnụ ekwu.

O jisiri nnọọ ike si n’ihe ndina ya ahụ chịtuo ụkwụ ya nke ogbu na nkwonkwo na-akpa aka ọjọọ. Ya anọdụzie ọdụ ma chere. Ụkwụ na-egbu ya mgbu ejiri nnọọ nwayọọ nwayọọ belata. Evelyn ejisizie ike bilie ọtọ. Ya asụọ ude n’ihi ihe mgbu. Dị nnọọ ka ‘ụkpala nke ghọọrọ onwe ya ibu,’ ma ọ bụ nke dọkpụụrụ onwe ya na-aga, Evelyn ejide aka n’úkwù ya ma jiri nwayọọ nwayọọ mara jijiji gawa ebe ọ na-anọ asa ahụ́.—Eklisiastis 12:5.b

Evelyn agwa onwe ya, sị, ‘Agbalịala m!’ Ọ bụghị nanị na ọ bọọla chi, kama o jisiekwala ike mee ka ahụ́ ya na-egbu ya mgbu malite ọrụ.

Ma, o nwere ihe ọzọ na-enye ya nsogbu n’obi. “Ọ bụ na m ga-amalite inwe ‘uche mkpasasị,’” ka Evelyn kwuru. Ọ naghị ama ebe o debere mkpịsị ugodi ya mgbe ụfọdụ, ma ụbụrụ ya ka na-arụ ọrụ nke ọma. Evelyn kwuru, sị: “Ekpere m bụ ka m ghara inwe uche mkpasasị dị ka ụfọdụ ndị agadi na-enwe.”

Mgbe Evelyn ka bụ agbọghọ, ọ dịtụghị eche banyere ihe na-eme mmadụ ma o mee agadi. Na mberede, ya adị ka afọ ọ̀ gbara ọsọ, ahụ́ ya ana-echetazikwara ya mgbe nile na ọ gbaala afọ 74.

Ụfọdụ ndị ọnọdụ ha ka nke Evelyn mma na ndị na-anaghị arịakarị ọrịa ma ọ bụ na-enwe nchegbu nwere ike ile oge a ha bụ agadi anya dị ka oge ha na-anụ ụtọ ndụ. Dị ka ọ dị nna ochie ahụ bụ́ Ebreham, ha nwere ike ịdịgide ndụ ruo ‘ezi isi awọ, bụrụ agadi, ndụ ha ejukwa ha afọ.’ (Jenesis 25:8) Ndị ọzọ na “ụbọchị ihe ọjọọ” na-alụ, nanị ihe ha nwekwara ike ikwu bụ: ‘Ndụ atọghị m ụtọ.’—Eklisiastis 12:1.

Olee otú i si ele oge agadi anya? Olee ụfọdụ ihe ịma aka ndị agadi na-enwe? Ọ̀ bụ iwu na mmadụ ga-enwerịrị uche mkpasasị ma o mee agadi? Gịnị ka a pụrụ ime iji mee ka obi na-eru ndị mmadụ ala n’oge agadi ha?

[Ihe ndị e dere n’ala ala peeji]