Olee Nsogbu Ekwentị Nwere Ike Ịkpatara Ụmụ Gị?
O nwere ike isiri ndị dimkpa na ndị agadi ike ịpị ekwentị na ihe ndị yiri ya. Ma, ọ naghị esiri ụmụaka ndị a na-amụ n’oge a ike.
Ma, ụfọdụ ndị ekwuola na ụmụaka ndị na-ejikarị oge buru ibu apị ekwentị nwere ike . . .
ịghọ ndị aka na-atọ n’ekwentị.
ịna-achọ ndị ọzọ okwu n’Ịntanet ma ọ bụkwanụ ndị ọzọ ana-achọ ha okwu.
ịhụ foto ma ọ bụ vidio ndị gba ọtọ ma hà chọrọ ya ma ha achọghị ya.
IHE NDỊ I KWESỊRỊ ỊMA
AKA ỊTỌ MMADỤ N’EKWENTỊ
Ihe ụfọdụ a na-eme n’Ịntanet, dị ka ịgba gem, anaghị ara ahụ́ ya erie mmadụ ahụ́. Otu akwụkwọ aha ya bụ Reclaiming Conversation kwuru, sị: “A haziri ihe ndị dị n’ekwentị anyị ka ha mee ka aka ghara ịpụ anyị apụ n’ekwentị.” Ka anyị na-ele ngwá ahịa ndị a na-akpọsa n’ihe ndị ahụ, ka ndị na-akpọsa ha na-enwetakwu ego.
IHE Ị GA-ECHEBARA ECHICHE: Aka ọ̀ na-atọkarị ụmụ gị n’ekwentị? Olee otú ị ga-esi nyere ha aka ka ha jiri oge ha na-eme ihe bara uru?—NDỊ EFESỌS 5:15, 16.
ỊCHỌ NDỊ ỌZỌ OKWU N’ỊNTANET
Ụfọdụ ndị nọrọ n’Ịntanet, ha na-ejikarị iwe ekwu okwu, na-ekwu okwu rụrụ arụ, na-agwakwa ndị ọzọ okwu ọjọọ. Ndị na-eme ihe ndị a na-aghọkarị ndị ọchọ okwu.
Ihe mere ụfọdụ ndị ji eme ihe ndị a bụ ka a mara ndị ha bụ ma na-anụ aha ha. Mmadụ nwekwara ike ịna-ewe iwe ma na-eche na ndị ọzọ kpọrọ ya asị n’ihi na ha akpọghị ya ka o soro ha n’oriri ha mere.
IHE Ị GA-ECHEBARA ECHICHE: Ụmụ gị hà na-akparị ndị mmadụ ma ha nọrọ n’Ịntanet? (Ndị Efesọs 4:31) Obi ọ̀ na-ajọ ha njọ n’ihi na ndị ọzọ akpọghị ha ka ha soro ha mee ihe ha na-eme?
ILE NDỊ GBA ỌTỌ
Ịntanet emeela ka ọ dịrị ndị mmadụ mfe ịna-ele foto ndị gba ọtọ. E nwere ihe ndị nne na nna nwere ike itinye n’ekwentị ụmụ ha nke ga-eme ka ha ghara ịhụ foto ma ọ bụ vidio ndị gba ọtọ. Ma, ndị nne na nna kwesịrị icheta na ihe ndị a nwere ike ịgharịpụ.
N’obodo ụfọdụ, iji ekwentị ezigara ndị ọzọ foto ndị gba ọtọ ma ọ bụ ile ụdị ozi ndị ahụ megidere iwu. Dabere n’iwu obodo ụfọdụ, nakwa afọ ole ndị mere ụdị ihe a dị, e nwere ike ikpe ha ikpe n’ihi na ha na-egosi ụmụaka foto ndị gba ọtọ.
IHE Ị GA-ECHEBARA ECHICHE: Olee otú ị ga-esi nyere ụmụ gị aka ka ha ghara izigara ndị ọzọ foto ndị gba ọtọ n’Ịntanet ma ọ bụ lee ụdị foto ndị ahụ?—NDỊ EFESỌS 5:3, 4.
IHE I NWERE IKE IME
ZỤỌ ỤMỤ GỊ NKE ỌMA
Ọ bụ eziokwu na ọtụtụ ụmụaka ndị a mụrụ n’oge a ma otú e si apị ekwentị nke ọma, ma ọ ka dị mkpa ka a na-eduzi ha. Otu akwụkwọ aha ya bụ Indistractable kwuru na inye ụmụaka ekwentị ma ọ bụ ihe ndị yiri ya mgbe ha na-amatabeghị otú ha ga-esi zere nsogbu ndị dị na ya “dị ka ịhapụ ụmụaka ka ha maba n’ime mmiri mgbe ha na-amabeghị mmiri egwu.”
AMAOKWU BAỊBỤL GA-ENYERE GỊ AKA: “Zụọ nwata ka o soro ụzọ o kwesịrị iso. Ọ bụrụgodị na o mee okenye, ọ gaghị ahapụ ụzọ ahụ.”—ILU 22:6.
Họrọ ihe ndị dị n’okpuru ebe a ị ga-achọ ime ma ọ bụkwanụ gị edee ihe ndị gịnwa chọrọ ime.
Mụ na nwa m ga-ekwurịta otú ọ ga-esi na-akpa àgwà ọma ma ọ nọrọ n’Ịntanet
M ga-enyere nwa m aka ma obi jọwa ya njọ n’ihi na ndị ọzọ akpọghị ya ka o soro n’ihe ha na-eme
M ga-agbalị igbochi nwa m ịhụ ihe ndị na-adịghị mma n’Ịntanet ruo otú m nwere ike
M ga na-eme m gụrụ gụrụ, mụ elee ekwentị nwa m mara ihe ndị o ji ya na-eme
M ga-ekpebi awa ole nwa m ga-eji na-apị ekwentị n’ụbọchị
Agaghị m ekwe ka nwa m jiri ekwentị ya laba ụra
M ga-eme iwu na e nweghị onye ga na-apị ekwentị mgbe anyị na-eri nri