Isi 1

Ozi Ndị Sitere n’Eluigwe

N’EZIE, Bible nile bụ ozi sitere n’eluigwe, ebe ọ bụ Nna anyị nke eluigwe nyere ya maka inye anyị ntụziaka. Otú ọ dị, ọ dị ozi abụọ e ziri ihe fọrọ nke nta ka ọ bụrụ 2,000 afọ gara aga site n’ọnụ otu mmụọ ozi, onye “na-eguzo n’ihu Chineke.” Aha ya bụ Gebriel. Ka anyị tụlee ọnọdụ metụtara ọbịbịa abụọ ndị ahụ dị mkpa ọ bịara n’ụwa.

Afọ ahụ bụ 3 T.O.A. N’ugwu Judea, ma eleghị anya n’ebe na-adịchaghị anya site na Jerusalem, ka otu onye nchụàjà Jehova a na-akpọ Zekaraịa bi. O mewo agadi, otú ahụ ka ọ dịkwa nwunye ya, bụ́ Elizabet. Ha enweghị ụmụ. Ọ bụ Zekaraịa ka o ruuru ịrụ ọrụ onye nchụàjà n’ụlọ nsọ Chineke dị na Jerusalem. Na mberede, Gebriel pụtara n’akụkụ aka nri nke ebe ịchụ àjà nsure ọkụ na-esi ísì ụtọ.

Zekaraịa tụrụ egwu nke ukwuu. Ma Gebriel mere ka obi dajụọ ya, na-asị, “Atụla egwu, Zekaraịa: n’ihi na a nụrụ arịrịọ gị, nwunye gị Elizabet ga-amụkwara gị nwa nwoke, ị ga-akpọkwa aha ya Jọn.” Gebriel gara n’ihu ikwupụta na Jọn “ga-abụ onye ukwu n’anya Onyenwe anyị [“Jehova,” NW]” nakwa na ọ ‘ga-edoziri Jehova otu ndị nke a kwadebeworo.’

Otú ọ dị, Zekaraịa ekweghị ihe ọ nụrụ. O yiri ihe na-apụghị ime eme na ya na Elizabet ga-amụtali nwa n’afọ ndụ ha. N’ihi ya, Gebriel sịrị: “Ị ga-ekpuchi ọnụ, ị gaghị apụkwa ikwu okwu, rue ụbọchị ahụ mgbe ihe ndị a ga-eme, n’ihi na i kweghị okwu m ndị a.”

Ma, mgbe ihe ndị a na-eme, ndị nọ n’èzí nọ na-eche ihe mere Zekaraịa ji anọ ọdụ otú a n’ime ụlọ nsọ ahụ. Mgbe o mesịrị pụta, ọ pụghị ikwu okwu, kama ọ pụrụ nanị imegharị aka ya, ha wee mata na ọ hụwo ihe ebube.

Mgbe Zekaraịa jezuru ozi ya n’ụlọ nsọ ahụ o wee laa. N’oge na-adịghị anya, o mere n’ezie​—⁠Elizabet wee dị ime! Mgbe ọ na-echere ịmụ nwa ya, Elizabet nọpụrụ iche n’ebe ndị mmadụ nọ ruo ọnwa ise.

Ka oge na-aga, Gebriel bịaghachiri ọzọ. Ònyekwa ka ọ na-agwa okwu? Ọ bụ nwa agbọghọ na-alụbeghị di nke a na-akpọ Meri, onye Nazaret. Ozi dị aṅaa ka ọ na-ezi ugbu a? Gee ntị! Gebriel gwara Meri sị, “Chineke meere gị amara. Leekwa, ị ga-atụrụ ime, mụta nwa nwoke, kpọọ aha ya Jisọs.” Gebriel kwukwara, sị: “Nwa nwoke ahụ ga-abụ onye ukwu, a ga-akpọkwa ya Ọkpara nke Onye Kachasị Ihe Nile Elu: . . . Ọ ga-abụkwa eze ụlọ Jekọb ruo mgbe nile ebighị ebi; alaeze ya agaghị agwụkwa agwụ.”

Anyị pụrụ iji n’aka na Gebriel ga-agụworị ya n’ihe ùgwù izite ozi ndị a. Ka anyị na-agụkwa banyere Jọn na Jisọs na-aga n’ihu, anyị ga-ahụ n’ụzọ ka pụta ìhè, ihe mere nnọọ ozi ndị a sitere n’eluigwe ji dị mkpa otú a. 2 Timoti 3:16; Luk 1:​5-33.

▪ Ozi abụọ dị aṅaa ndị dị mkpa ka e si n’eluigwe zite?

▪ Ònye zitere ozi ndị ahụ, oleekwa ndị e ziteere ha?

▪ Gịnị mere o ji sie oké ike ikwere ozi ndị ahụ?