Isi 48

Ịhapụ Ụlọ Jaịrọs na Ijeghachi Nazaret

JISỌS ezughị ike n’ụbọchị ahụ​—⁠njem oké osimiri site na Dikapọlis, ịgwọ nwanyị ahụ nke nwere oruru ọbara, ịkpọlite ada Jaịrọs n’ọnwụ. Ma ụbọchị ahụ agafechabeghị. Ihe àmà na-egosi na mgbe Jisọs na-ahapụ ụlọ Jaịrọs, ndị ìsì abụọ sooro ya n’azụ, na-eti mkpu, sị: “Meere anyị ebere, Nwa Devid.”

Site n’ịkpọ Jisọs “Nwa Devid,” ndị ikom ndị a si otú a na-egosipụta na ha kwere na Jisọs bụ onye nketa nke ocheeze Devid, nke bụ na ọ bụ Mesaịa ahụ e kwere ná nkwa. Otú ọ dị, o yiri ka Jisọs lefuuru arịrịọ enyemaka ha anya, eleghị anya iji nwalee nnọgidesi ike ha. Ma ndị ikom ahụ akwụsịghị. Ha sooro Jisọs ruo ebe ọ nọ, mgbe ọ bakwara n’ụlọ, ha sooro ya banye.

N’ebe ahụ Jisọs jụrụ ha, sị: “Ùnu kwere na apụrụ m ime ihe a?”

Ha ji obi ike zaa, sị, “Ee, Onyenwe anyị.”

Ya mere, n’ịmetụ anya ha aka, Jisọs sịrị: “Dị ka okwukwe unu si dị ka e meere unu.” Ngwa ngwa, ha malitere ịhụ ụzọ! Mgbe ahụ Jisọs dọsiri ha aka ike ná ntị, sị: “Lezienụ anya ka onye ọ bụla ghara ịma ya.” Ma n’ihi oké obi ụtọ, ha lefuuru iwu Jisọs anya wee kọsaa akụkọ banyere ya n’ala ahụ nile.

Ngwa ngwa ndị ikom ahụ na-apụ, e kuteere ya onye mmụọ ji, nke mmụọ ọjọọ ahụ mewokwara ka ọ daa ogbi. Jisọs chụpụrụ mmụọ ọjọọ ahụ, ngwa ngwa, nwoke ahụ malitekwara ikwu okwu. Ibubo wee nwụọ ìgwè mmadụ ahụ n’ahụ n’ihi ọrụ ebube ndị a, ha wee sị: “Ọ dịghị mgbe ọ bụla e gosiri ya otú a n’Israel.”

Ndị Farisii nọkwa n’ebe ahụ. Ha apụghị ịgọnahụ ọrụ ebube ndị ahụ, ma n’ihi obi ọjọọ ha nke ekweghị ekwe, ha nọgidekwara n’ebubo ha banyere ebe Jisọs si nweta ike o ji arụ ọrụ ndị a siri ike, na-asị: “N’ike onyeisi ndị mmụọ ọjọọ ka ọ na-achụpụ ndị mmụọ ọjọọ.”

Ngwa ngwa ihe ndị a mesịrị, Jisọs na-alaghachi n’obodo ya bụ Nazaret, ya na ndị na-eso ụzọ ya so ugbu a. Ihe dị ka otu afọ tupu ugbu a, o jewo n’ụlọ nzukọ, ziekwa ihe n’ebe ahụ. Ọ bụ ezie na ná mmalite, ibubo nwụrụ ha n’ahụ n’ihi okwu ọma ndị ọ na-ekwu, ma ha mesịrị malite iwe iwe n’ozizi ya ma chọọkwa igbu ya. Ugbu a, site n’obi ebere, Jisọs gbakwara mbọ ọzọ inyere ndị agbata obi ya mbụ aka.

Ebe ndị mmadụ na-agbakọta ebe Jisọs nọ n’ebe ndị ọzọ, o doro anya na ọ dịghị otú ahụ n’ebe a. Ya mere, n’Ụbọchị Izu Ike, o jere ụlọ nzukọ izi ihe. Ibubo nwụrụ ọtụtụ n’ime ndị na-ege ya ntị n’ahụ. Ha jụrụ sị, “Ole ebe ka nwoke a nwere amamihe a na ọrụ ndị a dị ike? Nwoke a, ọ́ bụghị nwa onye ọkà anyị? Á dịghị akpọ nne ya Meri? na ụmụnne ya ndị ikom Jemes, na Josef, na Saịmọn, na Judas? Na ụmụnne ya ndị inyom, [ọ̀ bụ na] ha nile anọghị n’etiti anyị? Ole ebekwa [ka] nwoke a nwere ihe ndị a nile?”

Ha na-eche sị, ‘Jisọs bụ mmadụ nkịtị dị ka anyị onwe anyị. Anyị hụrụ mgbe ọ na-eto, marakwa ezinụlọ ya. Olee otú ọ ga-esi bụrụ Mesaịa ahụ?’ Ya mere, n’agbanyeghị ihe àmà nile ahụ​—⁠oké amamihe na ọrụ ebube ya​—⁠ha jụrụ ya. N’ihi na ha maara ya nke ọma, ọbụna ndị ikwu ya na-asụ ngọngọ n’ihi ya, nke mere Jisọs ji kwubie, sị: “Onye amụma abụghị onye a na-adịghị asọpụrụ, ma ọ bụghị n’ala nke aka ya, na n’ụlọ nke aka ya.”

N’ezie, enweghị okwukwe ha juru Jisọs anya. Ya mere, ọ rụghị ọrụ ebube ọ bụla n’ebe ahụ e wezụga ibikwasị mmadụ ole na ole ahụ na-esighị ike aka na ịgwọ ha. Matiu 9:​27-34; 13:​54-58; Mak 6:​1-⁠6; Aịsaịa 9:⁠7.

▪ Site n’ịkpọ Jisọs “Nwa Devid,” gịnị ka ndị ikom ahụ kpuru ìsì gosiri na ha kwere?

▪ Olee otú ndị Farisii ahụ si kọwaa ọrụ ebube ndị Jisọs rụrụ?

▪ N’ihi gịnị ka o ji bụrụ obi ebere Jisọs ịlaghachi nyere ndị ahụ nọ na Nazaret aka?

▪ Olee otú e si nabata Jisọs na Nazaret, n’ihi gịnịkwa?