Isi 109

Jisọs Akatọọ Ndị Na-emegide Ya

JISỌS emewo ka ndị okpukpe na-emegide ya nọrọ n’oké ihe ijuanya nke na egwu tụrụ ha ịjụ ya ihe ọ bụla ọzọ. O wee gaa n’ihu ikpughe amaghị ihe ha. Ọ jụrụ ha sị, “Gịnị bụ uche unu banyere Kraịst ahụ? Nwa ònye ka ọ bụ?”

Ndị Farisii ahụ zara sị, “Nwa Devid.”

Ọ bụ ezie na Jisọs agọpụghị na Devid bụ nna ochie nke Kraịst ahụ, ma ọ bụ Mesaịa n’anụ ahụ, ọ jụrụ, sị: “Devid sikwa aṅaa kpọọ ya Onyenwe ya n’ime mmụọ nsọ [n’Abụ Ọma 110], sị, Onyenwe anyị [“Jehova,” NW] sịrị Onyenwe m, Nọdụ ala n’aka nri m, ruo mgbe m ga-etinye ndị iro gị n’okpuru ụkwụ gị abụọ? Ya mere, ọ bụrụ na Devid akpọọ ya Onyenwe ya, ò si aṅaa bụrụ nwa ya?”

Ndị Farisii ahụ mechiri ọnụ ha, n’ihi na ha amaghị n’ezie ihe e ji amata Kraịst ahụ ma ọ bụ onye ahụ e tere mmanụ. Mesaịa ahụ abụghị nanị onye sitere n’usoro ọmụmụ Devid, dị ka ọ pụtara ìhè na ndị Farisii ahụ chere, kama ọ dịrị adị n’eluigwe dị ka onye dị elu karịa Devid, ma bụrụ Onyenwe ya.

N’ichigharịkwuru ìgwè mmadụ ahụ na ndị na-eso ụzọ ya ugbu a, Jisọs dọrọ aka ná ntị banyere ndị Farisii. Ebe ọ bụ na ndị a na-akụzi Iwu Chineke, ebe ha ‘nọdụworo n’oche Mosis,’ Jisọs gbara ume, sị: “Ihe nile, ka ha hà, bụ́ nke ha ga-asị unu mee, meenụ ihe ndị a, debekwa ha.” Ma o kwukwara, sị: “Ma unu emela dị ka ọrụ nile ha si dị; n’ihi na ha na-ekwu, ma ha adịghị eme.”

Ha bụ ndị ihu abụọ, Jisọs katọkwara ha n’otu ụzọ ahụ o si katọọ ha mgbe ọ na-eri nri n’ụlọ otu onye Farisii n’ọnwa ole na ole tupu mgbe ahụ. Ọ sịrị, “Ọrụ ha nile ka ha na-arụ ka mmadụ wee kirie ha.” O nyekwara ha ihe atụ dị iche iche, na-asị:

“Ha na-eme ka phylactery [“obere akpa akwụkwọ nsọ,” NW] nile ha dị obosara.” Ihe okike ndị a dị nnọọ nta, bụ́ ndị a na-ekekwasị n’egedege ihu ma ọ bụ n’ógwè aka, na-enwe akụkụ anọ nke Iwu ahụ n’ime ya: Ọpụpụ 13:​1-10, 11-16; na Deuterọnọmi 6:​4-⁠9; 11:​13-21. Ma ndị Farisii na-eme ka ihe okike ndị a buwanye ibu iji mee ka ọ dị ka à ga-asị na ha na-anụrụ Iwu ahụ ọkụ n’obi.

Jisọs gara n’ihu ikwu na ha ‘na-emekwa ka ọnụ ọnụ uwe ha dị ukwuu.’ N’Ọnụ Ọgụgụ 15:​38-40 e nyere ndị Israel iwu ka ha na-adụnye ihe n’ọnụ ọnụ ala uwe ha, ma ndị Farisii na-eme ka nke ha buo ibu karịa otú onye ọ bụla ọzọ na-eme. Ha na-eme ihe nile iji mee ngosi! Jisọs kwuru sị, ‘Ha na-ahụ isi ọnọdụ nile n’anya.’

Ọ bụ ihe mwute ịhụ na ọchịchọ nke a nke ịbụ ndị a ma ama emetụtawokwa ndị na-eso ụzọ ya. Ya mere, o nyere ndụmọdụ, sị: “Ma ka a ghara ịkpọ unu onwe unu, Rabaị: n’ihi na otu onye bụ onye ozizi unu, ma unu onwe unu nile bụ ụmụnna. Unu akpọkwala onye ọ bụla nna unu n’elu ụwa: n’ihi na otu onye bụ Nna unu, ya bụ onye nke eluigwe. Ka a gharakwa ịkpọ unu ndị ndú, n’ihi na otu onye bụ onye ndú unu, ya bụ Kraịst ahụ.” Ndị ahụ na-eso ụzọ aghaghị iwepụ n’ime onwe ha ọchịchọ nile nke ịbụ onye mbụ! Jisọs kwuru n’ụzọ inye ndụmọdụ sị, “Onye dịkarịrị ukwuu n’etiti unu ga-abụ onye na-ejere unu ozi.”

Ihe ọzọ o mere bụ ikwupụta ọtụtụ ahụhụ n’isi ndị odeakwụkwọ na ndị Farisii, na-akpọ ha ndị ihu abụọ ugbo ugbo. Ọ sịrị na ha “na-emechi ụzọ alaeze eluigwe n’ihu mmadụ,” ọ bụkwa ha “na-eripịa ụlọ ndị inyom di ha nwụrụ, na-ekpekwa ogologo ekpere ka mmadụ wee hụ ha.”

Jisọs sịrị, “Ahụhụ ga-adịrị unu, ndị ndú ìsì.” Ọ katọrọ ojiji ndị Farisii ahụ na-ejighị ihe ime mmụọ kpọrọ ihe, bụ́ nke pụtara ìhè site n’ịkpa ókè ndị na-enweghị isi ha na-eguzobe. Dị ka ihe atụ, ha na-asị, “Onye ọ bụla nke ga-eji ụlọ nsọ Chineke ṅụọ iyi, ọ bụghị ihe; ma onye ọ bụla nke ga-eji ọlaedo nke ụlọ nsọ ahụ ṅụọ iyi, o ji ụgwọ.” Site na ha ime ka ọlaedo nke ụlọ nsọ ahụ bụrụ ihe dị mkpa karịa abamuru ime mmụọ nke ebe ahụ a nọ efe ofufe, ha na-egosipụta ọnọdụ ha nke ịbụ ndị kpuru ìsì n’omume.

Ya mere, dị ka o mere tupu mgbe ahụ, Jisọs katọrọ ndị Farisii n’ihi ịhapụ “ihe ka arọ n’Iwu, bụ́ ikpe, na ebere, na okwukwe,” ma na-elekwasịkarị anya n’ịkwụ otu ụzọ n’ụzọ iri nke ahịhịa na-esi ísì ụtọ bụ́ ndị na-abaghị uru.

Jisọs kpọrọ ndị Farisii ahụ “ndị ndú ìsì, ndị na-azapụ anwụnta, ma unu na-eloda kamel.” Ha na-azapụ anwụnta site ná mmanya ha, ọ bụghị nanị n’ihi na ọ bụ ahụhụ, kama n’ihi na ọ bụ ihe na-adịghị ọcha dị ka usoro ihe omume ha si dị. Ma, nhapụ ha hapụrụ ihe ndị ka arọ n’Iwu bụ ihe a pụrụ iji tụnyere iloda kamel, nke bụkwa anụ na-adịghị ọcha dị ka usoro ihe omume ha si dị. Matiu 22:⁠41–23:⁠24; Mak 12:​35-40; Luk 20:​41-47; Levitikọs 11:​4, 21-⁠24.

▪ N’ihi gịnị ka ndị Farisii ahụ ji mechie ọnụ mgbe Jisọs jụrụ ha ajụjụ banyere ihe Devid kwuru n’Abụ Ọma 110?

▪ N’ihi gịnị ka ndị Farisii ji mee ka obere akpa akwụkwọ nsọ na ọnụ ọnụ uwe ha bukarịa nke ndị ọzọ n’ibu?

▪ Ndụmọdụ dị aṅaa ka Jisọs nyere ndị na-eso ụzọ ya?

▪ Ịkpa ókè dịgasị aṅaa ndị na-enweghị isi ka ndị Farisii na-eme, oleekwa ụzọ Jisọs si katọọ ha maka ịhapụ ihe ndị ka arọ?