NKEBI NKE 5

Lọghachikwute ‘Onye Ọzụzụ Atụrụ na Onye Nlekọta nke Mkpụrụ Obi Gị’

Na broshọ a, anyị ekwuola ihe ụfọdụ nwere ike ime ka o siere mmadụ ike ịlọghachikwute Jehova. Ọ̀ bụ ụdị ihe ndị ahụ na-emekwa ka o siere gịnwa ike ịlọghachikwute Jehova? Ọ bụrụ na ọ bụ ụdị ihe ndị ahụ, broshọ a ga-enyere gị aka. Ọtụtụ ndị fere Chineke n’oge ochie nakwa ọtụtụ ndị na-efe ya taa nwechara ihe ndị mere ka o siere ha ike ịlọghachikwute Jehova. Ma, Jehova nyeere ha aka imeri ihe ndị ahụ. Ọ ga-enyekwara gịnwa aka.

Jehova ga-enyere gị aka ná mbọ ị na-agba ịlọghachikwute ya

KA OBI sie gị ike na Jehova ga-enyere gị aka ná mbọ ị na-agba ịlọghachikwute ya. Ọ ga-enyere gị aka ịkwụsị ịna-echegbu onwe gị, ịkwụsị ịna-ewe iwe maka ihe nwanna gị mere gị. Ọ ga-enyekwara gị aka ka obi gị kwụsị ịna-ama gị ikpe. O nweziri ike ibidokwa gụwa gị agụụ isoro ụmụnna gị fewe Jehova. E nwere ike ikwu na otú a ọ dị gị ka ọ dị ụfọdụ Ndị Kraịst oge mbụ. Pita onyeozi gwara ha, sị: “Unu dị ka atụrụ ndị na-akpafu akpafu; ma ugbu a, unu alaghachikwuruwo onye ọzụzụ atụrụ na onye nlekọta nke mkpụrụ obi unu.”—1 Pita 2:25.

O doro anya na ịlọghachikwute Jehova bụ ihe kacha mma i kwesịrị ime. Gịnị mere anyị ji kwuo otú ahụ? Ọ bụ n’ihi na ọ ga-eme ka obi Jehova ṅụrịa. (Ilu 27:11) Ị manụ na ihe anyị mere nwere ike iwute Jehova ma ọ bụkwanụ mee ya obi ụtọ. Ma, Jehova anaghị amanye anyị ịhụ ya n’anya na ife ya. (Diuterọnọmi 30:19, 20) Otu ọkà mmụta Baịbụl kwuru, sị: “Obi mmadụ dị ka ọnụ ụzọ na-enweghị onye ọzọ ga-emegheli ya. Ọ bụ naanị onye nwe ya ga-emegheli ya.” Ma, mmadụ nwere ike ikpebi imeghe obi ya, jiri obi ya niile na-efe Jehova n’ihi na ọ hụrụ ya n’anya. Anyị mee otú ahụ, ọ ga-egosi na anyị dịnyeere Jehova, obi ga-abụkwa Jehova sọ aṅụrị. Nke bụ́ eziokwu bụ na o nweghị ihe a ga-eji tụnyere obi ụtọ anyị ga-enwe ma anyị na-efe Jehova.—Ọrụ Ndịozi 20:35; Mkpughe 4:11.

Ebe ụmụnna ji obi ụtọ na-anabata otu nwanna nwaanyị maliteghachiri ịbịa ọmụmụ ihe n’ọgbakọ

Ihe ọzọ bụ na ị maliteghachi iso ụmụnna gị na-efe Chineke, obi ga-eru gị ala n’ihi na i gboola mkpa ime mmụọ gị. (Matiu 5:3) Gịnị mere anyị ji kwuo otú ahụ? Ọ bụ n’ihi na ọtụtụ ndị nọ n’ebe dị iche iche n’ụwa na-ajụ, sị, ‘Oleedị isi ndụ a anyị dị?’ Ọ na-agụsi ha agụụ ike ịmata azịza ajụjụ ndị ha na-ajụ gbasara ihe Chineke bu n’obi kee anyị. Ihe mere o ji na-agụ ndị mmadụ agụụ ịmata ihe ndị a bụ n’ihi na ọ bụ otú Jehova si kee anyị. O kere anyị ka anyị na-efe ya, na-enwekwa obi ụtọ na anyị na-efe ya. O nweghị obi ụtọ karịrị obi ụtọ anyị ga-enwe n’ihi na anyị ma na anyị na-efe Jehova maka na anyị hụrụ ya n’anya.—Abụ Ọma 63:1-5.

N’eziokwu, Jehova chọrọ ka ị lọghachikwute ya. Olee ihe gosiri na ọ chọrọ ka ị lọghachikwute ya? Chebagodịrị ihe a echiche: Anyị kpesiri ekpere ike tupu anyị edee ihe ndị anyị dere na broshọ a. O nwere ike ịbụ okenye ma ọ bụ nwanna ọzọ nyere gị ya, gị agụọ ya, meekwa ihe ndị e kwuru na ya. Ihe a niile gosiri na Jehova echefubeghị gị. Kama, o ji nwayọọ na-adọghachi gị n’ebe ọ nọ.—Jọn 6:44.

Obi na-eru anyị ala ma anyị ghọta na Jehova anaghị echefu ndị ohu ya kpafuru akpafu. Otu nwanna nwaanyị aha ya bụ Donna ghọtara na Jehova anaghị eme otú ahụ. Ọ sịrị: “Eji m nwayọọ nwayọọ hapụ ọgbakọ. Ma, Abụ Ọma 139:23, 24 anaghị apụ m apụ n’obi. Ebe ahụ sịrị: ‘Chineke, biko, nyochaa m, marakwa obi m. Nyochaa m, marakwa nchegbu m, lee ma m̀ na-eje ije n’ụzọ ọ bụla nke na-eweta ihe mgbu, na-edukwa m n’ụzọ nke mgbe ebighị ebi.’ Ama m nke ọma na o nweghị ihe jikọrọ mụ na ndị ụwa. Amakwa m na ọ bụ n’ọgbakọ Jehova ka m kwesịrị ịnọ. M bịara chọpụta na Jehova ahapụbeghị m. Naanị ihe m kwesịrị ime bụ ịgbalị lọghachikwute ya. Obi dịkwa m ụtọ na m lọghachikwutere ya.”

“M bịara chọpụta na Jehova ahapụbeghị m. Naanị ihe m kwesịrị ime bụ ịgbalị lọghachikwute ya”

Ekpere anyị bụ ka ị lọghachikwute Jehova ma malitekwa nwewe “ọṅụ Jehova” na-enye. (Nehemaya 8:10) Ị gaghị akwa m̀ makwaara na ị lọghachikwutere Jehova.

Azịza Ajụjụ Ndị A Na-ajụkarị Banyere Ịlọghachikwute Jehova

OLEE IHE MBỤ M GA-EME?

Onye si n’ọrịa na-agbake na-eji nwayọọ nwayọọ bidokwa mewe ihe ndị ọ na-emebu. Otú ahụ ka ị ga-esikwa jiri nwayọọ nwayọọ na-amụ Okwu Chineke kwa ụbọchị ka okwukwe gị nwee ike isighachi ike. Echekwala na ị ga-emecha ihe niile otu mgbe. I nwere ike iji nkeji ole na ole gụọ Baịbụl ma ọ bụkwanụ gere nke a gụrụ agụ. I nwekwara ike ịmụ otu n’ime akwụkwọ anyị, lee ihe ndị dị na jw.org/ig, ma ọ bụkwanụ lee otu n’ime ihe ndị dị na tv.jw.org. Gbalịakwa gaa ọmụmụ ihe ozugbo. Ma, ihe kachanụ ị ga-eme bụ ịrịọ Jehova n’ekpere ka o nyere gị aka. ‘Tụkwasị ya nchegbu gị niile, n’ihi na ihe banyere gị na-emetụ ya n’obi.’—1 Pita 5:7.

Otu nwanna nwaanyị aha ya bụ Eeva sịrị: “Mgbe m lara azụ n’ofufe Jehova, ihere onwe m bịara na-eme m. Ihere anaghịdị ekwe m kpee ekpere. Ma, m mechara kata obi kpee ekpere. Mụ na otu okenye hụkwara, ya emesie m obi ike na Jehova ahapụbeghị m, na ọ ka chọrọ ka m lọghachikwute ya. Okenye ahụ gbaziri m ume ka m bido gụwa Baịbụl kwa ụbọchị. Mgbe m bidoro gụwa Baịbụl, m bịara kata obi bịawa ọmụmụ ihe. Obere oge, m bidokwara gawa ozi ọma. Obi bụ m sọ aṅụrị na Jehova ahapụghị m.”

ỤMỤNNA HÀ GA-ANABATAKWA M?

Ka obi sie gị ike na ụmụnna ga-anabata gị. Ha agaghị abịa katọwa gị ma ọ bụ mawa gị ikpe. Kama, ha ga-egosi gị na ha hụrụ gị n’anya, meekwa ihe ọ bụla ha nwere ike ime iji gbaa gị ume.—Ndị Hibru 10:24, 25.

Otu nwanna aha ya bụ Javier sịrị: “Ihere nọ na-eme m ịga ọmụmụ ihe. M nọ na-eche otú ụmụnna ga-esi emeso m. Mgbe m mechara gaa ọmụmụ ihe, otu nwanna nwaanyị nọ́ mgbe m hapụrụ ọgbakọ afọ iri atọ gara aga sịrị m: ‘Nwa m, nnọọ.’ Ihe ahụ ọ gwara m ruru m n’obi. N’eziokwu, alọghachila m ebe m kwesịrị ịnọ.”

Otu nwanna aha ya bụ Marco sịrị: “Agara m ọmụmụ ihe ma nọrọ n’oche azụ ka a ghara inwe onye ga-ahụ m. Ma ọtụtụ ndị hụrụ m, matakwa m n’ihi na ha ma mgbe m na-abịabu ọmụmụ ihe mgbe m dị ntakịrị. Ha kelere m ma makụsie m ike. Ihe a mere ka obi ruo m nnọọ ala. Ọ dị m nnọọ otú ahụ ọ na-adị onye gachara ihe lọta n’ụlọ ya.”

OLEE OTÚ NDỊ OKENYE GA-ESI ENYERE M AKA?

Ndị okenye ga-eji obiọma nabata gị. Ha ga-aja gị mma maka igosi na ị chọrọ inwetaghachi “ịhụnanya ahụ i nwere na mbụ.” (Mkpughe 2:4) Ha ga-eji “mmụọ dị nwayọọ” nyere gị aka imezi ihe ọ bụla i mejọrọ. (Ndị Galeshia 6:1; Ilu 28:13) Ndị okenye nwere ike ịhazi ka otu nwanna na-abịa amụrụ gị ihe. Unu nwere ike iji akwụkwọ Bịaruo Jehova Nso ma ọ bụkwanụ “Nọrọnụ n’Ịhụnanya Chineke” na-amụ ya. Ka obi sie gị ike na ndị okenye ga-eme ka obi ruo gị ala. Ha ga-enyekwara gị aka n’ihe ọ bụla ị na-eme iji lọghachikwute Jehova.—Aịzaya 32:1, 2.

Otu nwanna aha ya bụ Victor sịrị: “N’ime afọ asatọ m kwụsịrị ịga ọmụmụ ihe, ndị okenye akwụsịghị ịna-abịa eleta m. Otu ụbọchị, otu okenye gosiri m foto ụfọdụ mụ na ya sere. Foto ndị ahụ mere ka m cheta ọtụtụ ihe mere n’oge gara aga. Ọ bịara gụwakwa m agụụ ịna-enwe ụdị obi ụtọ m na-enwebu mgbe m na-efe Jehova. Ndị okenye ji obiọma nyere m aka ibidoghachi fewe Jehova.”

“Ọ Ga-eme Ka I Sie Ike”

E nwere ọtụtụ ọmarịcha abụ ndị dị n’akwụkwọ abụ anyị bụ́ Bụkuo Jehova Abụ. Abụ ndị a nwere ike ịkasi gị obi ma nyere gị aka ná mbọ ị na-agba ibidokwa fewe Jehova otú i sibu efe ya. Iji maa atụ, legodị mkpụrụ okwu ndị dị n’abụ nke 60. Isiokwu ya bụ “Ọ Ga-eme Ka I Sie Ike.” O si na 1 Pita 5:10.

Ọ d’ihe mere Jaa ji zi gị eziokwu ya,

Mee k’i si n’ọchịchịrị baa n’ìhè.

Ọ hụrụ na ọ n’agụ gị agụụ n’obi

Ịchọ ya na ime ihe zir’ezi.

I kwere ya nkwa im’uche ya;

Ọ g’anọgide n’enyere gị aka.
Chineke nyere Ọkpara ya n’ihi gị;

Ọ chọrọ k’ihe n’agaziri gị.

Eb’O nyere Ọkpara y’ọ hụrụ n’anya,

K’obi sie g’ike n’ọ g’enye g’ike.

Ọ gaghị echefu okwukwe gị;

Ọ ga n’elekọta ndị ya niile.

(KORỌS)

Chineke ji ọbara Kraịst mee k’ị bụrụ nke ya.

Ọ g’eme k’i si’ike, mee k’i guzosi’ike.

Ọ g’edu ma chebe gị, dị k’ọ n’eme kemgbe.

Ọ g’eme k’i si’ike, mee k’i guzosi’ike.

Ọ bụrụ na ị chọrọ igere abụ a nke e ji ọnụ bụọ n’asụsụ Bekee nakwa abụ Alaeze ndị ọzọ e ji ọnụ bụọ, gaa n’ebe e dere PUBLICATIONS pịa ebe e dere MUSIC.