Mmụọ Nsọ Dakwasịrị Ndị Na-eso Ụzọ Jizọs

Abalị iri Jizọs laghachiri eluigwe, mmụọ nsọ dakwasịrị ndị na-eso ụzọ ya n’oge Ememme Pentikọst nke afọ 33. Ndị mmadụ si ebe dị iche iche bịa Jeruselem maka ememme a. Ndị na-eso ụzọ Jizọs, ndị dị ihe dị ka otu narị mmadụ na iri abụọ (120), zukọrọ n’otu ọnụ ụlọ dị n’elu otu ụlọ. Na mberede, ihe dị ịtụnanya mere. Ihe dị ka ọkụ bịara dịrị n’isi onye nke ọ bụla n’ime ha, ha niile ebido kwuwe okwu n’asụsụ dị iche iche. Ụzụ nke dị ka ụzụ oké ifufe nọ na-adasi ike n’ụlọ ahụ.

Ndị si ebe dị iche iche bịa Jeruselem nụrụ ụzụ a ma gbara gaa n’ụlọ ahụ ka ha mara ihe na-emenụ. O juru ha anya mgbe ha nụrụ ka ndị na-eso ụzọ Jizọs na-ekwu okwu n’asụsụ dị iche iche. Ha sịrị: ‘Ndị a niile bụ ndị Galili. Oleezi otú ha si na-asụ asụsụ anyị?’

Pita na ndịozi ndị ọzọ guzoro n’ihu ìgwè mmadụ ahụ. Pita gwara ha otú e si gbuo Jizọs nakwa na Jehova kpọlitere ya n’ọnwụ. Ọ sịrị: ‘Ugbu a, Jizọs nọ n’eluigwe, n’aka nri Chineke. Ọ wụsala anyị mmụọ nsọ a o kwere anyị ná nkwa. Ọ bụ ya mere unu ji nụ ma hụ ọrụ ebube ndị a.’

Ihe ndị ahụ Pita kwuru ruru ìgwè mmadụ ahụ n’obi, ha ajụọ, sị: “Gịnị ka anyị kwesịrị ime?” Ọ gwara ha, sị: ‘Chegharịanụ, ka e meekwa unu baptizim n’aha Jizọs. Unu ga-anatakwa mmụọ nsọ Chineke na-enye n’efu.’ N’ụbọchị ahụ, e mere ihe dị ka puku mmadụ atọ (3,000) baptizim. Si mgbe ahụ gawa, ndị na-eso ụzọ Jizọs malitere na-amụba n’ike n’ike na Jeruselem. Mmụọ nsọ mere ka ndịozi Jizọs malite ọgbakọ ọhụrụ dị iche iche nke mere ka ha nwee ike ịkụziri ndị na-eso ụzọ Jizọs ihe niile o nyere ha n’iwu.