Ndị Nkwusa Alaeze Na-akọ

Ike Nsachapụ nke Okwu Chineke

A NA-AKỌ na ihe ka n’ọnụ ọgụgụ ná ndị ọgwụ ọjọọ riri ahụ na-alaghachi n’àgwà ha mgbe a tọhapụsịrị ha site n’ogige mkpụzigharị uche. Ma Okwu Chineke pụrụ imezu ihe ụlọ ahụ ike na-adịghị enwekebe ike ime. (Ndị Hibru 4:12) Okwu na mmụọ nke Chineke enyeworo ọtụtụ ndị aka imeri iri ahụ nke ọgwụ ọjọọ na itinye ndụmọdụ a n’ọrụ: “Ka anyị sachapụ n’onwe anyị mmerụ nile nke ahụ na nke mmụọ, na-emezu ịdị nsọ n’egwu Chineke.”—2 Ndị Kọrint 7:1.

Ahụmahụ sitere Myanmar na-enye ihe atụ nke a. Otu nwoke onye ya na iri ahụ nke ọgwụ ọjọọ gbara mgba ruo ọtụtụ afọ na-akọ, sị: “Aghọrọ m onye ọgwụ ọjọọ riri ahụ ka m nọ n’afọ iri na ụma m. Ọtụtụ ugbo agbalịrị m inwere onwe m, ma apụghị m. Iji kwadoo àgwà ịṅụ ọgwụ ọjọọ m, abanyere m n’izu ohi. N’ihi nke a, na 1988, e zigara m ụlọ mkpọrọ ịnọ otu afọ.

“Mgbe a tọhapụsịrị m site n’ụlọ mkpọrọ, amaliteghachiri m iso ndị enyi m ochie na-akpakọ. N’oge na-adịghị anya nke ahụ gasịrị alaghachiri m n’àgwà ịṅụ ọgwụ ọjọọ. Omume ibibi onwe onye a dujere ndị òtù ezinụlọ m n’igbubi mmekọrịta nile n’ebe m nọ. Tụkwasị na nke ahụ, àgwà nnupụisi m kpataara ọtụtụ n’ógbè ahụ ịdị na-atụ m ụjọ, ha onwe ha malitekwara ize m eze.

“E mesịa otu ụbọchị ihe a na-apụghị izere ezere mere—aṅụbigara m ọgwụ ọjọọ ókè. E zigaghachiri m ụlọ mkpọrọ, n’oge a ịnọ afọ atọ. Ọ bụ ezie na ndụ n’ime ụlọ mkpọrọ siri oké ike, ejisiri m ike lanarị.

“Mgbe m lọtasịrị site n’ụlọ mkpọrọ, arịọrọ m ezinụlọ m mgbaghara maka ihie ụzọ m ndị gara aga. Ha ji amara nabataghachi m, ma ọzọkwa, ndị enyi dujere m n’ịlaghachi n’ụzọ ochie m.

“N’ikpeazụ, nne m ochie tụụrụ otu pastọ nọ n’ógbè anyị aro ka m gaa otu ụlọ akwụkwọ Bible. Pastọ ahụ kwetara. Otú ọ dị, tupu m malite ịga, nwanne nna m, onye bụ otu n’ime Ndịàmà Jehova, kwuru na ọ bụrụ n’ezie na m chọrọ ịmụ Bible, na m kwesịrị isoro Ndịàmà mụọ ihe.

“Agara m n’Ụlọ Nzụkọ Alaeze, e wee mee ka otu nwoke mata m bụ́ onye kwetara ịmụrụ m Bible. Ọtụtụ ndị bịaranụ kelere m n’ụzọ na-ekpo ọkụ ma mee ka ahụ ruo m ala.

“Mgbe m malitesịrị ịmụ Bible na ịga nzukọ ndị Kraịst, ọchịchọ ịbịaru Chineke nso nọchiri agụụ ịṅụ ọgwụ ọjọọ. Otu afọ n’ihu enwewo m ọganihu ruo n’ókè nke ịrara ndụ m nye Jehova Chineke, egosikwara m nraranye ahụ site na baptism ime mmiri.

“N’oge na-adịbeghị anya, ka m na-aga site n’ụlọ ruo n’ụlọ, ezutere m otu n’ime ndị bụbu ndị enyi m n’ịṅụ ọgwụ ọjọọ. Ọ pụghị ịghọta mgbanwe m dị ịrịba àmà. Nke a meghere ụzọ maka ịgba àmà, enwekwara m ike ịgwa ya okwu banyere olileanya Alaeze ahụ.

“N’ikpeazụ achọtawo m ezi nzube na ezi ihe ná ndụ. N’ihi enyemaka nke Chineke na ndụmọdụ sitere n’Okwu ya, enwere m ike ugbu a inyere ndị ọzọ aka iwepụ site n’ebe ha nọ àgwà na-emerụ emerụ nke ịṅụ ọgwụ ọjọọ.”