“Naanị Otu Iko Mmanya”

ALEN malitere ịṅụbiga mmanya na-aba n’anya ókè mgbe ọ dị afọ iri na otu.a Ya na ndị enyi ya na-egwuri egwu n’ọhịa, na-ejije ndị ha na-ahụ na fim. Ndị ahụ Alen na ndị enyi ya na-ejije bụ ndị na-eme ihe egwuregwu, ma, mmanya ahụ ha na-aṅụ abụghị mmanya egwuregwu.

Toni dị afọ iri anọ mgbe o ji nwayọọ nwayọọ si n’ịṅụ otu iko mmanya ma ọ bụ abụọ kwa mgbede gaa n’ịṅụ iko ise ma ọ bụ isii. Ka oge na-aga, ọ naghịzi agụtali iko mmanya ole ọ na-aṅụ n’ụbọchị.

Alen chọwara enyemaka maka nsogbu mmanya ya. Toni ekweghị ka ndị ikwu na ibe ya ihe banyere ya na-emetụ n’obi nyere ya aka. Alen dị ndụ taa ịkọ ihe mere ya; Toni nwụrụ afọ ole na ole gara aga n’ihe mberede ụgbọala mgbe ọ ṅụbigachara mmanya ókè.

Ya bụrụgodị na mmadụ na-aṅụbiga mmanya ókè mgbe naanị ya nọ, ọ na-emetụtarịrị ndụ ndị ọzọ, mgbe mgbe, na-akpatara ha oké nsogbu.b Ịṅụbiga mmanya ókè na-esokarị akpata ikwu okwu ọjọọ na iti ihe, ime ihe ike na igbu ọchụ, ihe mberede ụgbọala na inwe mmerụ ahụ́ n’ebe ọrụ, nakwa ọtụtụ ọrịa ndị ọzọ. Ịṅụbiga mmanya ókè na-efu ụmụ mmadụ ọtụtụ ijeri naịra kwa afọ, n’agụnyeghị obi mgbawa ọ na-akpatara ndị mmadụ n’otu n’otu, ezinụlọ dị iche iche, na ụmụaka.

N’agbanyeghị nke ahụ, Ụlọ Ọrụ Na-ahụ Maka Ahụ́ Ike nke Mba Yunaịted Stets kwuru na “ọ bụghị onye ọ bụla na-aṅụ mmanya mgbe niile nwere nsogbu mmanya, ọ bụghịkwa ndị niile nwere nsogbu mmanya na-aṅụ mmanya kwa ụbọchị.” Ọtụtụ ndị na-abụghị ndị aṅụrụma amalitela ịṅụbiga mmanya ókè n’amaghị ama. Ndị ọzọ na-aṅụ mmanya naanị mgbe ụfọdụ, ma ha na-aṅụ ihe karịrị iko ise n’otu oge.

Ọ bụrụ na i kpebie ịṅụ mmanya na-aba n’anya, iko ole ka ị ga-aṅụ, ya abụrụ na ị ṅụbigala ya ókè? Olee otú i nwere ike isi mara mgbe ị ga-ajụ ịṅụkwu “naanị otu iko mmanya”? (Ilu 23:29, 30, Contemporary English Version) Isiokwu ndị na-esonụ ga-atụle ihe ndị ga-enyere anyị aka n’okwu a.

[Ihe ndị e dere n’ala ala peeji]