Ndị Na-agụ Akwụkwọ Anyị Na-ajụ, Sị . . .

Gịnị Mere Ndịàmà Jehova Ji Ekwusa Ozi Ọma Site n’Ụlọ Ruo n’Ụlọ?

▪ Na Baịbụl, Jizọs nyere ndị na-eso ụzọ ya iwu, sị: ‘Gaanụ mee ndị mba niile ka ha bụrụ ndị na-eso ụzọ m. Na-ezi ha ihe.’ (Matiu 28:19, 20) Ọ̀ bụ Ndị Kraịst niile ka Jizọs nyere iwu a? Ndị mbụ soro ụzọ Jizọs ghọtara na ọ bụ Ndị Kraịst niile ka e nyere iwu a. Dị ka ihe atụ, Pita onyeozi kwuru, sị: “[Jizọs] nyekwara anyị iwu ikwusara ndị mmadụ ozi ọma na ịgba àmà nke ọma.” (Ọrụ 10:42) Pọl onyeozi dekwara, sị: “Ọ bụ mkpa nke dịịrị m. N’ezie, ahụhụ dịịrị m ma ọ bụrụ na ezisaghị m ozi ọma!”—1 Ndị Kọrịnt 9:16.

Ọ bụghị naanị Pọl na Pita mere ihe ahụ Jizọs kwuru, ndị niile bụ́ Ndị Kraịst n’oge gboo mekwara otú ahụ. Ihe e ji mara ha bụ ikwusa ozi ọma. (Ọrụ 5:28-32, 41, 42) Ndịàmà Jehova taa na-agbalịkwa ike ha niile ime ihe ahụ Jizọs kwuru. Ha na-ekwusa ozi ọma nke “alaeze eluigwe” otú ahụ Jizọs mere.—Matiu 10:7.

Ole ndị ka e kwesịrị ikwusara ozi ọma Alaeze ahụ? Jizọs kwuru na ndị a ga-ekwusara ya bụ ndị bi n’ebe niile n’ụwa. Ọ gwara ndị na-eso ụzọ ya, sị: ‘Unu ga-abụ ndị àmà m ruo n’ebe kasị anya n’ụwa.’ (Ọrụ 1:8) Jizọs kwudịrị na tupu Chineke ebibie ndị ajọ omume, ‘a ga-ekwusa ozi ọma nke a nke alaeze n’elu ụwa dum mmadụ bi ka ọ bụrụ àmà nye mba niile.’ (Matiu 24:14) Ọ bụ ya mere Ndị Kraịst oge gboo ji gbaa mbọ kwusaara mmadụ niile ozi ọma, ọ bụghị naanị ndị ha maara ma ọ bụ ndị na-enweghị okpukpe ha na-ekpe. (Ndị Kọlọsi 1:23; 1 Timoti 2:3, 4) Taa, Ndịàmà Jehova na-agbakwa mbọ ka ha kwusaara mmadụ niile ozi ọma.a

Olee otú kacha mma isi kwusaara ndị mmadụ ozi ọma Alaeze Chineke? Jizọs maara otú e nwere ike isi nweta ọtụtụ ndị a ga-ekwusara ozi ọma, ọ bụ ya mere o ji zipụ ndị na-eso ụzọ ya ka ha gaa n’obodo ukwu, n’obodo nta, nakwa n’ụlọ ndị mmadụ. (Matiu 10:7, 11, 12) Mgbe Jizọs laghachiri n’eluigwe, ndị na-eso ụzọ ya nọgidere na-ekwusa ozi ọma “site n’ụlọ ruo n’ụlọ.” (Ọrụ 5:42) Ha kwusakwaara ndị mmadụ ozi ọma n’ebe ọ bụla ha hụrụ ha, ha gakwara n’ebe ndị mmadụ na-anọkarị otú ahụ Jizọs mere. (Jọn 4:7-26; 18:20; Ọrụ 17:17) Taa, Ndịàmà Jehova sikwa otú ahụ ekwusara ndị mmadụ ozi ọma.

Jizọs kwuru na ọ bụghị mmadụ niile ga-ege ntị n’ozi ọma. (Matiu 10:14; 24:37-39) Nke a ò kwesịrị ime ka Ndị Kraịst kwụsị ikwusa ozi ọma? Legodị ihe atụ a: Ọ bụrụ na i so ná ndị gara ịzọpụta ndị mmadụ n’ebe e nwere ala ọma jijiji, ị̀ ga-akwụsị ịchọ ndị mmadụ maka na ọ bụ mmadụ ole na ole ka unu na-ahụzi? Mba. Ị gaghị akwụsị ịchọ ruo mgbe o doro gị anya na o nwekwaghị onye fọrọnụ. Jizọs gwara ndị na-eso ụzọ ya ka ha nọgide na-ekwusa ozi ọma Alaeze Chineke ma ọ bụrụhaala na a ka nwere ndị ga-ege ha ntị. (Matiu 10:23; 1 Timoti 4:16) Mgbe Ndịàmà Jehova na-aga site n’ụlọ ruo n’ụlọ na-achọ ndị ga-ege ntị, ha na-egosi na ha hụrụ Chineke na ndị agbata obi ha n’anya n’ihi na ha maara na ọ bụrụ na ndị mmadụ egee ntị n’ozi ọma ma mee ihe ha mụtara, ha ga-enweta ndụ.—Matiu 22:37-39; 2 Ndị Tesalọnaịka 1:8.

Magazin a ị na-agụ na-ekwu banyere Alaeze Chineke. Ọ bụrụ na o nwere ihe ndị ọzọ ị chọrọ ịmatakwu, biko jụọ ya Onyeàmà Jehova ọzọ bịara na nke gị, ma ọ bụ gị edetara ndị na-ebipụta magazin a akwụkwọ ozi.

[Ihe e dere n’ala ala peeji]