Otú Ndị Na-agba Ịnyịnya Anọ Si Gbasa Gị

E nwere nnukwu ịnyịnya anọ e kwuru okwu ha n’akwụkwọ Mkpughe. Ha na-awụ oké ọsọ, ụkwụ ha na-adakwa oké ụda ka ha na-agba. Ị gụọ otú Baịbụl si kọwaa nnukwu ịnyịnya anọ ahụ na ndị na-agba ha, ọ ga-adị gị ka ì ji anya gị na-ahụ ha ka ha na-agbafe. Ịnyịnya nke mbụ na-acha ọcha. Onye na-agba ya bụ onye dị ebube e chiri eze ọhụrụ. Ịnyịnya nke na-eso ya na-acha uhie uhie, e nyekwara onye na-agba ya ikike iwepụ udo n’ụwa. Ịnyịnya nke atọ sochiri ya na-eji ezigbo oji ka ọchịchịrị. Onye na-agba ya ji ihe e ji atụ ihe n’aka. A nụkwara ozi ọjọọ nke na-ekwu na nri ga-adị ụkọ. Ahụ́ ịnyịnya nke anọ chanwụrụ achanwụ. Onye na-agba ya bụ ọnwụ. Ọ ga-eji ọrịa na ihe ndị ọzọ dị njọ na-egbu ndị mmadụ. Ili sochiri ya, ọ na-elokwa ọtụtụ mmadụ.—Mkpughe 6:1-8.

“Ezigbo ụjọ tụrụ m mgbe mbụ m gụrụ gbasara ndị na-agba ịnyịnya anọ ahụ. Obi m gwara m na Ụbọchị Ikpe eruwela, nakwa na agaghị azọpụta m ebe ọ bụ na ejikerebeghị m.”—Crystal.

“Obi tọrọ m ezigbo ụtọ mgbe m gụrụ gbasara ndị na-agba ịnyịnya anọ ahụ ụcha ha dị iche iche. Mgbe m ghọtara ihe ọhụụ ahụ pụtara, m chọpụtara na ihe e kwuru banyere ha bụ eziokwu.”—Ed.

Mgbe ị gụrụ gbasara ndị na-agba ịnyịnya anọ ahụ, ọ̀ dị gị otú ahụ ọ dị Crystal, ka ọ̀ bụ otú ahụ ọ dị Ed? N’agbanyeghị otú ọ dị gị, akụkọ a so n’otu n’ime akụkọ ndị magburu onwe ya a kọrọ n’akwụkwọ ikpeazụ nke Baịbụl, bụ́ Mkpughe. Ị̀ ma na ịghọta ọhụụ a ga-abara gị uru? Olee otú ọ ga-esi bara gị uru? Chineke kwuru na ị ga-enwe ezigbo obi ụtọ ma ị gụọ akwụkwọ Mkpughe, mụọ ya nke ọma, ma na-eme ihe ndị e kwuru na ya.—Mkpughe 1:1-3.

Anyị ahụla na ụjọ na-atụ ụfọdụ ndị ma ha gụọ gbasara ndị na-agba ịnyịnya anọ ahụ e kwuru gbasara ha n’akwụkwọ Mkpughe, ma o kwesịghị ịtụ mmadụ ụjọ. Nke bụ́ eziokwu bụ na ọtụtụ nde mmadụ achọpụtala na ọhụụ a emeela ka okwukwe ha sikwuo ike, meekwa ka ha nwee ezigbo olileanya. O nwekwara ike imere gị otu ihe ahụ. Biko, gụọ isiokwu na-esonụ ka ị hụ otú ọ ga-esi mee.