Ì Nwere Mmụọ nke Ịchụ Onwe Onye n’Àjà?

¹ Inwe ekele maka ihe Jisọs Kraịst ji achọghị ọdịmma onwe ya nanị rụzuoro ihe a kpọrọ mmadụ kwesịrị ịkpali anyị nile iji ikike, ike, na ume anyị mee ihe n’ụzọ ịchụ onwe onye n’àjà. Akwụkwọ Nsọ na-arịọ anyị, sị: “Ka unu chee ahụ unu n’ihu Chineke, dị ka àjà dị ndụ, dị nsọ, nke dị Chineke ezi ụtọ, bụ́ [ije ozi dị nsọ, NW].” (Rom 12:1) Inyocha onwe gị site n’oge ruo n’oge ga-enyere gị aka ịhụ ma ị na-egosi ụdị mmụọ ahụ n’ụzọ zuru ezu dị ka ọnọdụ gị nyere ohere ya.

² N’ịchụso Ihe Ọmụma Bible: Ì wepụtawo oge maka ịgụ na ịmụ Bible mgbe nile? Ị̀ na-agbasochi usoro ihe omume ahụ anya? Ị̀ na-akwadebe maka nzukọ ọgbakọ mgbe nile? Ọ bụrụ na ị bụ onyeisi ezinụlọ, ị̀ na-eso ezinụlọ gị amụchi Bible anya? Ime ihe ndị a pụrụ ịchọ ka ị chụọ oge ụfọdụ ị na-etinye n’ikiri telivishọn ma ọ bụ n’iji kọmputa eme ihe ma ọ bụ n’ịchụso ihe ndị ọzọ n’àjà. Otú ọ dị, lee àjà dị nta ị ga-achụ, na-amata na oge i tinyere n’inyocha Okwu Chineke ga-enye aka iduga gị ná ndụ ebighị ebi!—Jọn 17:3.

³ N’ịzụlite Ụmụ Gị: Oge kasị mma ịmalite ịmụ ụzọ ndụ nke ịchụ onwe onye n’àjà bụ na nwata. Kụziere ụmụ gị na ọ bụ ezie na e nwere oge maka igwu egwu, a ghaghịkwa inwe oge maka ọrụ nakwa maka ihe omume ọchịchị Chineke. (Efe. 6:4) Nye ha ọrụ ụfọdụ bara uru ịrụ n’ụlọ. Malite usoro ihe omume chịrị anya isoro ha kere òkè n’ozi. Jiri ezi ihe nlereanya nke gị onwe gị mee ka ntụziaka gị siwanye ike.

⁴ N’ihe Omume Ọgbakọ: A na-eme ka ọgbakọ dịkwuo mma mgbe onye ọ bụla nọ na ya dị njikere ịchụ àjà iji rụzuo ihe ga-abara mmadụ nile uru. (Hib. 13:16) Ọ̀ ga-ekwe gị omume itinyekwu oge n’ọrụ nkwusa Alaeze na nke ime ndị na-eso ụzọ? Ị̀ pụrụ inye onwe gị n’afọ ofufo iji nyere ndị ahụ na-esighị ike ma ọ bụ ndị agadi aka, eleghị anya na-enyere ha aka n’ime njem gaa nzukọ?

⁵ Tupu ya chụọ àjà ahụ kasị ukwuu nke o ji ndụ mmadụ ya chụọ, Jisọs dụrụ ndị na-eso ụzọ ya ọdụ ka ha lekwasị anya n’ọdịmma nke Alaeze ahụ, na-etinye ihe ọ bụla ọzọ ná ndụ n’ọnọdụ nke abụọ. (Mat. 6:33) Ịchụso mmụọ dị otú ahụ nke ịchụ onwe onye n’àjà ga-ewetara anyị obi ụtọ ka ukwuu ka anyị ji ọṅụ nọgide na-ejere Jehova ozi.