Ozizi nke Na-eduba ná Ndụ
1 Lee ihe na-enye afọ ojuju ọ bụ ịhụ ka ihu ndị mmadụ na-egbukepụ ka ha na-aghọta eziokwu nke Okwu Chineke! Ime ka ndị ọzọ mara Chineke na nzube ya banyere ihe a kpọrọ mmadụ bụ n’ezie ihe na-enye afọ ojuju. Ozizi dị otú ahụ pụrụ ime ka mmadụ nweta ndụ ebighị ebi.—Jọn 17:3.
2 Ihe Mere O Ji Kara Mma: A na-eji ihe fọrọ nke nta ka ọ bụrụ ụzọ ọ bụla kwere omume akụziri ndị mmadụ ihe taa, a na-akụzikwara ndị mmadụ banyere ihe ọ bụla a pụrụ ichetụ n’echiche. (Ekli. 12:12) Ma, a pụghị iji ihe ndị ahụ a na-akụziri ha tụnyere “ihe ndị dị ebube nke Chineke” ma a bịa n’ịba uru. (Ọrụ 2:11) Ihe ụwa na-akụzi ò nwewo ike ime ka ihe a kpọrọ mmadụ bịaruo Onye Okike nso nakwa ka ha mara nzube ya? Ò nyeworo ndị mmadụ aka ịghọta ihe na-eme anyị mgbe anyị nwụrụ ma ọ bụ ihe mere ọtụtụ mmadụ ji na-ata ahụhụ? Ò mewo ka ndị mmadụ nwee olileanya? Ò nyewo aka mee ka udo na-adị n’ezinụlọ? Ee e. Ọ bụ nanị site n’ozizi Chineke ka anyị pụrụ isi chọta azịza bụ́ ezigbo ya nye ajụjụ ndị kasị mkpa ná ndụ.
3 Ozizi Chineke na-eme ka e nwee otu ihe dị nnọọ ụkọ n’ụwa taa—omume ọma. Okwu Chineke na-eme ka ndị nabatara ya ma na-etinye ihe ndị ọ na-ekwu n’ọrụ wepụ ịkpọasị agbụrụ na ịhụ mba n’anya n’obi ha. (Hib. 4:12) Ọ kpaliwo ndị mmadụ ịkwụsị ụdị ime ihe ike nile ma ‘yikwasị onwe ha ụdị mmadụ ọhụrụ ahụ.’ (Kọl. 3:9-11; Maị. 4:1-3) Ọzọkwa, ozizi Chineke emewo ka ọtụtụ nde mmadụ nwee ike ịhapụ omume na àgwà ndị ririla ha ahụ́ bụ́ ndị na-adịghị eme Chineke obi ụtọ.—1 Kọr. 6:9-11.
4 Ihe Mere O Ji Dị Ngwa Ugbu A: Onye Nkụzi Ukwu anyị na-eme ka anyị mara ụdị oge anyị bi na ya. N’ikpe ya e buru n’amụma, e kwuru ihe ndị oge ha na-agafebeghị bụ́ ndị a na-aghaghị ime ka ụwa nile mara. (Mkpu. 14:6, 7) Kraịst na-achị achị n’eluigwe, a ga-ebibi alaeze ụwa nke okpukpe ụgha n’oge na-adịghị anya, Alaeze Chineke adịwokwa njikere ibibi ọchịchị nile nke ụwa. (Dan. 2:44; Mkpu. 11:15; 17:16) N’ihi ya, ọ dị ngwa ka ndị mmadụ mara onye Chineke chiri Eze bụ́ onye maliterela ọchịchị, ọ dịkwa ngwa ka ha si na Babilọn Ukwu ahụ pụta, nakwa ka ha jiri okwukwe kpọkuo aha Jehova. (Ọma 2:11, 12; Rom 10:13; Mkpu. 18:4) Ka anyị kere òkè ruo ókè o kwere mee n’ịkụziri ndị ọzọ ozizi na-eduba ná ndụ.