‘Gosinụ na Unu Bụ Ndị Nwere Ekele’

¹ Mgbe Jizọs gwọrọ ndị ekpenta iri, ọ bụ naanị otu n’ime ha lọghachiri iji kelee ya. Jizọs jụrụ, sị: “Ọ́ bụghị mmadụ iri ka e mere ka ha dị ọcha? Oleekwanụ mmadụ itoolu ndị ọzọ?” (Luk 17:11-19) Ọ dị nnọọ mkpa ka anyị na-enwe ekele, na-egosikwa na anyị ji ezi onyinye ọ bụla na onyinye ọ bụla zuru okè Nna anyị nke eluigwe na-ahụ n’anya ma na-emesapụ aka, bụ́ Jehova Chineke, nyere anyị, kpọrọ ihe!—Kọl. 3:15; Jems 1:17.

² Olee ụfọdụ n’ime ihe ndị anyị kwesịrị ikele Chineke maka ha? Anyị ji ihe mgbapụta ahụ, bụ́ onyinye kasịnụ Chineke nyere ụmụ mmadụ, kpọrọ ihe. (Jọn 3:16) Anyị na-ekelekwa Jehova maka ịdọta anyị n’ebe ọ nọ. (Jọn 6:44) Ihe ọzọ anyị kwesịrị ikele Chineke maka ya bụ ịdị n’otu anyị dị ka Ndị Kraịst. (Ọma 133:1-3) O doro anya na i nwere ike icheta ọtụtụ onyinye ndị ọzọ Jehova nyerela anyị. Anyị agatụghị achọ ịdị ka ndị Izrel na-enweghị ekele bụ́ ndị chefuru ọrụ ndị Jehova rụụrụ ha!—Ọma 106:12, 13.

³ Gosi Ekele Gị: Ọ bụ ezie na o nwere ike ịbụ na ndị ekpenta iri ahụ nwechara ekele maka ihe Jizọs meere ha, ọ bụ naanị otu n’ime ha gosiri na o nwere ekele. (Luk 17:15) N’otu aka ahụ, anyị na-egosi ekele anyị site n’ịnụ ọkụ n’obi n’ozi. Ọ bụrụ na anyị nwere ekele n’ezie maka ihe niile Nna anyị na-ahụ n’anya meerela anyị, ọ ga-akpali anyị igosi ndị ọzọ ụdị ịhụnanya ahụ ọ na-egosi anyị na imesapụrụ ha aka otú o si emesapụrụ anyị site n’ịgwa ha banyere Chineke. (Luk 6:45) Ka anyị na-agwakwa ndị ọzọ banyere ‘ọrụ ndị dị ebube Jehova na-arụrụ anyị na ihe ndị ọ na-eche banyere anyị,’ ịhụnanya na ekele anyị nwere n’ebe Jehova nọ ga-amụba.—Ọma 40:5.

⁴ Mee Ka Ndị Ọzọ Nwee Ekele: Anyị kwesịrị ịdị na-achọ ụzọ ndị anyị ga-esi nyere ụmụ anyị na ndị anyị na-amụrụ Baịbụl aka ịdị na-ekele Chineke. Ndị nne na nna nwere ọtụtụ ohere iji mee nke a, dị ka mgbe ha na ụmụ ha na-ekiri ihe ndị Jehova kere. (Rom 1:20) Mgbe anyị na-eduzi ọmụmụ Baịbụl, anyị nwere ike ịjụ onye anyị na-amụrụ ihe, sị, “Gịnị ka ihe a anyị na-amụ na-akụziri anyị banyere ụdị onye Jehova bụ?” Ka onye ahụ ị na-amụrụ ihe na-enwekwu ekele, otú ahụ ka ọ ga na-ahụkwu Chineke n’anya ma na-enwekwu mmasị ime ihe na-atọ ya ụtọ.

⁵ N’oge ikpeazụ a, ọtụtụ ndị anaghị eji ihe ọma e meere ha akpọrọ ihe, ha enwekwaghị ekele. (2 Tim. 3:1, 2) Obi na-adị nnọọ Jehova ụtọ ma ọ hụ ka ndị ji obi ha niile na-ejere ya ozi na-egosi ekele ha site n’iji ịnụ ọkụ n’obi na-ekwusa ozi ọma!—Jems 1:22-25.