Àna M Eme Ike M Niile?

1. Olee ihe nwere ike ịna-echegbu Onye Kraịst kwesịrị ntụkwasị obi?

¹ Ị̀ jụtụla onwe gị ajụjụ ahụ? O nwere ike ị naghịzi aga ozi ọma otú i si agabu n’ihi nká, ọrịa, ma ọ bụ ibu ọrụ ezinụlọ ndị i nwekwuru, ya ana-emekwa gị obi ọjọọ. Otu nwanna nwaanyị nke nwere ụmụ atọ dere na mgbe ụfọdụ, obi ya na-ama ya ikpe n’ihi na ilekọta ezinụlọ ya anaghị ekwe ya gaa ozi ọma otú ọ gaara achọ ịga. Gịnị ga-enyere anyị aka ile ihe anya otú kwesịrị ekwesị?

2. Gịnị ka Jehova na-achọ n’aka anyị?

² Ihe Jehova Na-achọ n’Aka Anyị: O doro anya na anyị niile ga-achọ ịga ozi ọma karịa otú anyị si aga. Ma a na-enwekarị ezigbo ihe dị iche n’ihe anyị ga-achọ ime na ihe anyị ga-emeli. Na anyị ga-achọ ịga ozi ọma karịa otú anyị si aga gosiri na anyị ejighị ozi ọma egwu egwu. Anyị kwesịrị icheta na Jehova maara ókè anyị ga-emeli, ọ naghịkwa achọ ka anyị mee karịa ókè anyị ga-emeli. (Ọma 103:13, 14) Gịnị ka ọ na-achọ n’aka anyị? Ọ chọrọ ka anyị jiri mkpụrụ obi anyị dum na-ejere ya ozi, ya bụ, ka anyị na-enye ya ihe kacha mma anyị nwere.—Kọl. 3:23.

3. Olee otú anyị nwere ike isi ghọta otú anyị na-agbaru mbọ n’ozi ọma?

³ Gịnị ga-enyere anyị aka ịma ihe anyị ga-emeli? Anyị nwere ike ịrịọ Jehova ka o nyere anyị aka ịghọta ọnọdụ anyị nke ọma. (Ọma 26:2) Onye ọzọ nwekwara ike inyere anyị aka bụ ezigbo enyi anyị, bụ́ Onye Kraịst maara nke a na-akọ n’ọgbakọ, onye maara anyị nke ọma, na onye na-agaghị ezoro anyị ọnụ ma ọ gwawa anyị ebe anyị kwesịrị ịrụ ọrụ. (Ilu 27:9) Chetakwa na otú ihe dịịrị anyị taa nwere ike ịgbanwe echi, n’ihi ya, ọ ga-adị mma ma anyị nọtụ anyị elebagharịa anya n’ihe ndị anyị na-eme iji mara ma ànyị enwekwuola ohere maka ozi ọma.—Efe. 5:10.

4. Olee otú anyị kwesịrị isi were ihe ndị e si na Baịbụl na-echetara anyị banyere ozi ọma?

⁴ Otú Anyị Kwesịrị Isi Na-ele Ihe Ndị A Na-echetara Anyị Anya: N’ámá egwuregwu ebe a na-agba ọsọ, ndị enyi na ndị ikwu nke ndị na-agba ọsọ na-agwa ha gbasiwe ike. Ihe mere ha ji agwa ha ya bụ iji nyere ndị ahụ na-agba ọsọ aka ịgbata ihe, ọ bụghị ka ike gwụ ha. N’otu aka ahụ, agbamume ndị e ji Baịbụl na-enye anyị na ihe ndị a na-echetara anyị n’ọmụmụ ihe nakwa n’akwụkwọ anyị, ka anyị jiri ‘ịnụ ọkụ n’obi na-ekwusa okwu Chineke,’ na-abara anyị uru, ọ bụghị iji gwa anyị na anyị anaghị agbasi mbọ ike. (2 Tim. 4:⁠2) Obi kwesịrị isi anyị ike na ọ bụrụhaala na anyị na-eme ike anyị niile, Jehova ga-echeta ‘ọrụ anyị na ịhụnanya anyị gosiri’ ma gọzie anyị.—Hib. 6:10.