Ihe Anyị Ga-amụta n’Aka Maịka Onye Amụma
1. Olee ajụjụ o yiri ka Maịka ọ̀ jụrụ? Gịnị gosiri na ozi ọma o ziri alaghị n’iyi?
1 Ndị mmadụ na-ajụkarị ajụjụ, sị: ‘Oleedị mgbe a ga-ebibi ụwa ọjọọ a?’ Ọ ga-abụ na Maịka onye amụma jụrụ ụdị ajụjụ a mgbe ọ na-agwa ndị Izrel na a ga-ebibi Izrel na Juda. N’agbanyeghị na ọ jụrụ ụdị ajụjụ a, ozi ọma o ziri alaghị n’iyi. Ihe ndị ahụ o buru n’amụma mezukwara. Dị ka ihe atụ, mgbe ọ ka nọ ndụ, e bibiri Sameria n’afọ 740 Tupu Oge Ndị Kraịst. (Maị.1:6, 7) Ka oge na-aga, e bibikwara Jeruselem n’afọ 607 Tupu Oge Ndị Kraịst. (Maị. 3:12) N’oge na-adịghị anya, Jehova ga-ebibi ụwa Setan. Tupu mgbe ahụ, olee otú anyị ga-esi na-eme ka Maịka?
2. Olee otú anyị ga-esi nwee ndidi ka anyị na-echere ụbọchị Jehova? Gịnịkwa mere anyị ji kwesị inwe ndidi?
2 Nwee Ndidi: Na Maịka 7:7, onye amụma ahụ dere, sị: “M ga na-ele anya Jehova. M ga-echere Chineke nke nzọpụta m.” Nke bụ́ eziokwu bụ na Maịka afanyeghị aka n’ụkwụ na-eche mgbe a ga-ebibi Izrel na Juda. Ọ nọ na-ebu amụma n’adaghị mbà. N’ihi ya, ka ụbọchị Jehova ga-ebibi ụwa a na-eru nso, anyị kwesịrị ịna-akpa ‘agwa dị nsọ,’ na-emekwa ‘omume ịsọpụrụ Chineke.’ (2 Pita 3:11, 12) Ndidi Jehova nweere anyị na-enye ndị mmadụ ohere ka ha chegharịa. (2 Pita 3:9) N’ihi ya, anyị kwesịrị ime ihe Baịbụl gwara anyị, ya bụ, ka anyị na-enwe ndidi ka ndị amụma.—Jems 5:10.
3. Gịnị mere anyị ji kwesị ịna-arịọ Jehova ka o nye anyị mmụọ nsọ?
3 Tụkwasị Jehova Obi: Maịka nọ na-agwa ndị mmadụ na a ga-ebibi obodo ha. Ịgwa ha ụdị ihe a adịghị mfe. Ọ bụ ya mere o ji tụkwasị Jehova obi. (Maị. 3:8) Ozi anyị na-ejere Jehova adịghịkwa mfe. Ọ bụ ya mere Baịbụl ji gwa anyị ka anyị tụkwasị Jehova obi. Ọ na-enye ndị ike gwụrụ ume ka ha nwee ike ịrụ ọrụ o nyere ha. (Ọma 84:5, 7; Aịza. 40:28-31) Ò nwetụla mgbe ị dara mbà, Jehova emee ka inwetaghachi ume? Ị̀ na-arịọ Jehova ka mmụọ nsọ ya nyere gị aka n’ozi gị?—Luk 11:13.
4. Gịnị ka anyị mụtara ná ndụ Maịka?
4 Ihe kacha Maịka mkpa ná ndụ bụ ime uche Chineke. N’agbanyeghị na ọtụtụ ndị na-ebi ndụ rụrụ arụ n’oge ahụ, ọ nọgidere na-erubere Chineke isi. Taakwa, e nwekwara ọtụtụ ihe Ekwensu ji anwa anyị. N’ihi ya, ka anyị gbaa mbọ “na-ejegharị n’aha Jehova bụ́ Chineke anyị ruo mgbe ebighị ebi.”—Maị. 4:5.