OTÚ NDỊ KRAỊST SI EBI NDỤ

Lezie Anya Mgbe Ị Na-ahọrọ Ihe Ndị I Ji Atụrụ Ndụ

Olee ihe mere anyị kwesịrị iji lezie anya mgbe anyị na-ahọrọ ihe ndị anyị ji atụrụ ndụ? Ọ bụ n’ihi na ihe dị na fim anyị na-ele, egwú anyị na-ege, ebe anyị na-aga n’Ịntanet, akwụkwọ anyị na-agụ, ma ọ bụ egwuregwu vidio anyị na-egwu bụ ihe ga na-ejupụtazi anyị n’obi. Nke anyị họọrọ nwere ike ime ka anyị na-akpa àgwà ọma ma ọ bụ nke ọjọọ. Ọ dị mwute na ihe juru n’ọtụtụ n’ime ihe ndị e ji atụrụ ndụ taa bụ ihe ndị Jehova kpọrọ asị. (Ọma 11:5; Gal. 5:19-21) Ọ bụ ya mere Baịbụl ji na-agwa anyị ka anyị nọgide na-eche banyere ihe ndị ga-ewetara Jehova otuto.—Fil. 4:8.

LEENỤ VIDIO BỤ́ OLEE ỤDỊ IHE M GA-EJI ATỤRỤ NDỤ? ZAAKWANỤ AJỤJỤ NDỊ A:

Olee otú egwuregwu ịlụ ọgụ a na-eme n’ámá egwuregwu ndị Rom n’oge ochie si yie ụfọdụ ihe e ji atụrụ ndụ taa?
Olee otú ndị nọ n’ọgbakọ nwere ike isi nyere ndị na-eto eto aka ịhọrọ ntụrụndụ dị mma?
Olee otú Ndị Rom 12:9 ga-esi nyere anyị aka ma anyị chọwa ịhọrọ ihe anyị ga-eji atụrụ ndụ?
Olee ihe ụfọdụ dị mma e ji atụrụ ndụ n’ebe unu bi?

OLEE NTỤRỤNDỤ NKE NA-AKACHA ABA URU?

Ọtụtụ n’ime ihe e ji atụrụ ndụ taa na-akụziri ndị mmadụ ịnọrọ nnọọ na-agụ ma ọ bụ na-ele ihe ndị ọzọ na-eme, kama iji aka ha na-eme ihe ahụ n’onwe ha. Ọtụtụ fim, akwụkwọ na ihe omume tiivi na-akọ gbasara ihe onye ọzọ chepụtara; ọ bụghị nke gị. Ọ bụ eziokwu na ụdị ntụrụndụ ndị a dịkwa mma, ma, ọtụtụ ndị achọpụtala na ntụrụndụ kacha mma bụ nke ahụ i ji aka gị na-eme, dị ka, ịkpọ ngwá egwú ma ọ bụ ise ihe. O nwekwara ndị ọ na-atọ ụtọ ịpụ n’èzí mee ihe ndị dị ka, ịgba ọsọ, ịrị ugwu ma ọ bụ ime mkpapụ. N’agbanyeghị ntụrụndụ nke anyị họọrọ, ka anyị ‘na-eme ihe niile iji nye Chineke otuto.’—1 Kọr. 10:31.