Ndị Nne na Nna Kụzierenụ Ụmụ Unu Ihe Ndị Ha Kwesịrị Ịma

Anyị bi n’ụwa ọtụtụ ndị na-ewere ihe ọma ka ihe ọjọọ, na-ewerekwa ihe ọjọọ ka ihe ọma. (Aịza. 5:20) Ọ dị mwute na ụfọdụ ndị na-eme ihe Jehova kpọrọ asị, ma nwoke na nwoke ibe ya na nwaanyị na nwaanyị ibe ya ime omume rụrụ arụ. Ụmụ akwụkwọ ma ọ bụ ndị ọzọ nwere ike ịchọ ịrata ụmụ anyị ka ha soro ha mewe omume rụrụ arụ. Olee otú unu ga-esi kwadebe ụmụ unu maka ụdị ihe a na ihe ndị ọzọ?

Kụzierenụ ụmụ unu iwu Jehova. (Lev. 18:3) Na-akụziri ha ihe Baịbụl kwuru banyere mmekọahụ. Ihe ị ga-akụziri ha ga-abụ ihe kwesịịrị afọ ole ha dị na ihe ha ga-aghọtali. (Diut. 6:7) Jụọ onwe gị, sị: ‘M̀ kụzierela ụmụ m ụzọ kwesịrị ekwesị e si egosi ịhụnanya, ihe mere anyị ji kwesị ịna-eyi uwe dị mma, na ihe mere ndị ọzọ ekwesịghị imetụ ha aka n’ebe na-ekwesịghị ekwesị? Ụmụ m hà ma ihe ha ga-eme ma mmadụ chọwa igosi ha ndị gba ọtọ ma ọ bụkwanụ chọwa ka ha mee ihe ọzọ Jehova kpọrọ asị?’ Ibu ụzọ mee ka ha mara ihe ndị a ga-enyere ha aka izere ọtụtụ nsogbu. (Ilu 27:12; Ekli. 7:12) Ị kụziere ụmụ gị ihe ndị i kwesịrị ịkụziri ha, ọ ga-egosi na ị hụrụ ihe nketa na-enweghị atụ Jehova nyere gị n’anya.—Ọma 127:3.

LEENỤ VIDIO BỤ́ WUO ỤLỌ NA-AGAGHỊ ADA ADA—CHEBE ỤMỤ GỊ KA ‘IHE ỌJỌỌ’ GHARA IME HA, ZAAKWANỤ AJỤJỤ NDỊ A:

• 

  Gịnị mere o ji esiri ụfọdụ ndị ike ịkụziri ụmụ ha banyere mmekọahụ?

• 

  Gịnị mere ndị nne na nna ji kwesị ịna-azụlite ụmụ ha “n’ọzụzụ na nduzi echiche nke si n’aka Jehova”?—Efe. 6:4

• 

  Olee ihe ndị nzukọ Jehova wepụtarala iji nyere ndị nne na nna aka ịkụziri ụmụ ha gbasara mmekọahụ?—w19.05 12, igbe dị na peeji ahụ

• Gịnị mere o ji dị mkpa ka gị na ụmụ gị na-ekwurịta okwu nke ọma tupu nsogbu abịa?