OTÚ NDỊ KRAỊST SI EBI NDỤ
Jehova Na-enyere Anyị Aka Mgbe Nsogbu Bịaara Anyị
N’oge ikpeazụ a, ọtụtụ nsogbu na-abịara anyị. Mgbe ụfọdụ, o nwere ike ịna-adị anyị ka anyị agaghịzi edili nsogbu ndị na-abịara anyị. Ma ọ bụrụ na anyị anọgide na-abịaru Jehova nso, ọ ga-enyere anyị aka idi nsogbu ndị siiri anyị ezigbo ike. (Aịza. 43:2, 4) Olee otú anyị ga-esi bịaruo Jehova nso mgbe nsogbu bịaara anyị?
Ekpere. Ọ bụrụ na anyị akọọrọ Jehova otú ọ dị anyị n’obi, ọ ga-enye anyị udo na ume anyị ga-eji edi nsogbu anyị.—Fil. 4:6, 7; 1 Tesa. 5:17.
Ọmụmụ ihe. Okwu si na Baịbụl a na-agwa anyị n’ọmụmụ ihe na otú anyị na ụmụnna anyị si akparịta ma na-ekelerịta n’ọmụmụ ihe dị anyị mkpa ugbu a karịa mgbe ọ bụla ọzọ. (Hib. 10:24, 25) Ọ bụrụ na anyị ana-akwadebe ọmụmụ ihe, na-aga ọmụmụ ihe, na-azakwa ajụjụ, ọ pụtara na anyị na-anabata aka Jehova ji mmụọ nsọ ya na-enyere anyị.—Mkpu. 2:29.
Ozi ọma. Ọ bụrụ na anyị agbaa mbọ na-ekwusasi ozi ọma ike, ọ ga-adịrị anyị mfe ịna-eche banyere ihe ọma ndị Jehova na-emere anyị. Ọ ga-emekwa ka anyị na Jehova na ndị ọzọ anyị na ha na-arụkọ ọrụ dịkwuo ná mma.—1 Kọr. 3:5-10.
LEENỤ VIDIO BỤ́ JEHOVA GA-AKPỌRỌ GỊ, ZAAKWANỤ AJỤJỤ NDỊ A:
Gịnị nyeere Malu aka ịnọgide na-efe Jehova mgbe nsogbu bịaara ya?
Olee otú ihe e dere n’Abụ Ọma 34:18 ga-esi kasie anyị obi mgbe nsogbu bịaara anyị otú ahụ ọ kasiri Malu?
Olee otú ihe mere Malu si gosi na Jehova na-enye anyị “ike karịrị ike mmadụ” mgbe nsogbu bịaara anyị?—2 Kọr. 4:7