Baịbụl Ga-akacha Enyere Anyị Aka Ikpebi Ihe Bụ́ Ihe Ọma na Ihe Ọjọọ

Ọ bụrụ ihe anyị chere ma ọ bụ ihe ndị ọzọ chere ka anyị na-agbakwasị ụkwụ na ya ekpebi ụdị àgwà anyị ga na-akpa, anyị agaghị ejideli n’aka na àgwà anyị na-akpa agaghị aghọ anyị ahịa. Baịbụl kwuru ihe mere o ji dị otú ahụ, gwakwa anyị ihe ndị ọzọ. Ọ na-eme ka anyị mata ihe bụ́ ihe ọma na ihe ọjọọ. Anyị mata ya, ndụ anyị na-aka mma, anyị na-enwekwa obi ụtọ.

ANYỊ KWESỊRỊ IKWE KA CHINEKE NA-EDUZI ANYỊ

Na Baịbụl, Jehovaa Chineke kwuru na o kere ụmụ mmadụ ka yanwa na-eduzi ha, ọ bụghị ka ha na-eduzi onwe ha. (Jeremaya 10:23) Ọ bụ ya mere o ji si na Baịbụl na-agwa anyị àgwà ndị dị mma na ndị nke na-adịghị mma. Ọ hụrụ ụmụ mmadụ n’anya, chọọkwa ka ha ghara ime mkpebi na-adịghị mma nke ga-akpatara anyị nsogbu na ahụhụ. (Diuterọnọmi 5:29; 1 Jọn 4:8) Ihe ọzọ bụ na ebe ọ bụ ya kere anyị, o nwere amamihe ọ ga-ejili enye anyị ndụmọdụ ga-akacha abara anyị uru. (Abụ Ọma 100:3; 104:24) Mana, Chineke anaghị amanye ndị mmadụ ka ha na-eme ihe o kwuru.

Jehova nyere nwoke na nwaanyị mbụ bụ́ Adam na Iv ihe niile ga-eme ka ha na-enwe ezigbo obi ụtọ. (Jenesis 1:28, 29; 2:8, 15) Ọ gwakwara ha ihe ha kwesịrị ime na ihe ha na-ekwesịghị ime, tụọkwa anya na ha ga-erubere ya isi. Ma, ọ hapụrụ ha ka ha jiri aka ha kpebie ma hà ga-eme ihe o kwuru ma ọ bụ na ha agaghị eme. (Jenesis 2:9, 16, 17) Ọ dị mwute na Adam na Iv họọrọ ime ihe hanwa chọrọ kama ime ihe Chineke chọrọ. (Jenesis 3:6) Gịnị mechara mee? Mkpebi ụmụ mmadụ kpebiri ime ihe dị ha mma ò mere ka ihe kara ha mma? Mba. Ihe ndị merela kemgbe ọtụtụ afọ gosiri na ileghara iwu Chineke anya anaghị eme ka mmadụ nwee udo na obi ụtọ na-adịgide adịgide.—Ekliziastis 8:9.

N’agbanyeghị ebe anyị bi ma ọ bụ ezinụlọ anyị si, Baịbụl na-enye anyị ntụziaka ka anyị nwee ike ikpebi àgwà dị mma anyị ga na-akpa na ndị nke anyị na-ekwesịghị ịkpa. (2 Timoti 3:16, 17; gụọ igbe isiokwu ya bụ “Akwụkwọ E Dere Maka Mmadụ Niile.”) Ka anyị leba anya n’otú Baịbụl si eme ya.

Mụtakwuo ihe mere e kwesịrị iji kpọọ Baịbụl “okwu Chineke.”—1 Ndị Tesalonaịka 2:13. Lee vidio bụ́ Uche Ònye Ka E Dere na Baịbụl? Ọ dị na jw.org.

AKWỤKWỌ E DERE MAKA MMADỤ NIILE

Onye ọ bụla ga-ekweta na ebe Onye kere anyị ma ihe, hụkwa anyị n’anya, ọ ga-eme ka ntụziaka o nyere gbasara ihe dị mma na ihe na-adịghị mma ruo mmadụ niile aka. Ka anyị leba anya n’ihe ụfọdụ e kwuru gbasara Baịbụl:

3,500 na ụma Asụsụ ole a sụgharịrị Baịbụl ma ọ bụ akwụkwọ ụfọdụ dị na ya, nke mere o ji bụrụ akwụkwọ a kacha sụgharịa n’ọtụtụ asụsụ.
5,000,000,000 na ụma Baịbụl ole e bipụtarala, nke mere o ji bụrụ akwụkwọ a kacha kesaa n’ụwa.

Baịbụl ekwughị na e nwere agbụrụ, mba, ebo, ma ọ bụ omenala ka ibe ya mma. N’ihi ya, Baịbụl bụ akwụkwọ e dere maka mmadụ niile.

Nọrọ n’Ịntanet na jw.org gụọ Baịbụl (n’ihe karịrị narị asụsụ abụọ na iri ise [250])

IHE MERE ỤFỌDỤ NDỊ JI ECHE NA BAỊBỤL AGAGHỊ ENYELIRI HA AKA

Ụfọdụ ndị na-asị na Baịbụl agaghị enyeli ha ezigbo ndụmọdụ gbasara ihe bụ́ ihe ọma na ihe ọjọọ. Lee ihe ụfọdụ ha nwere ike ikwu.

Ihe Ha Nwere Ike Ikwu: “Baịbụl na-emegide onwe ya.”

Nke Bụ́ Eziokwu: Amaokwu ole na ole ndị yiri ka hà na-emegide onwe ha na-edo anya ma e leba anya n’ihe e kwuru n’amaokwu ndị gbara ha gburugburu, n’ihe ndị mere eme, n’omenala ndị a kọrọ akụkọ ha, n’otú onye dere ya si eche echiche, nakwa n’ihe ndị yiri ha.

Ị chọọ ịhụ ụfọdụ ihe atụ, gaa na jw.org gụọ isiokwu Bekee bụ́ “Are There Contradictions in the Bible?”

Ihe Ha Nwere Ike Ikwu: “Ndị sịrị na ha na-eme ihe Baịbụl kwuru na-arụ ala epu ezé elu. N’ihi ya, Baịbụl agaghị enyeliri mmadụ aka ịkpa ezigbo àgwà.”

Nke Bụ́ Eziokwu: Ọ bụghị Baịbụl ka ụta dịịrị maka àgwà ọjọọ ndị na-anaghị eme ihe e kwuru na ya na-akpa. E buru n’amụma na ọtụtụ ndị, ma ndị isi okpukpe ma ndị sịrị na ha na-eme ihe Baịbụl kwuru, ga na-eme ihe Baịbụl sịrị anyị emela. Baịbụl kwukwara na ihe a ga-eme ka a malite “ịkatọ eziokwu” ndị dị na Baịbụl.—2 Pita 2:1, 2.

Ị chọọ ịhụ otu ihe atụ gosiri ụzọ dị iche iche ọtụtụ ndị isi okpukpe si hapụ ihe Baịbụl na-akụzi mewe ihe ọzọ, gaa na jw.org gụọ isiokwu Bekee bụ́ “Is Religion Just Another Big Business?”

Ihe Ha Nwere Ike Ikwu: “Ndị kweere ihe Baịbụl kwuru anaghị akwanyere ndị kweere ihe dị iche ùgwù.”

Nke Bụ́ Eziokwu: Baịbụl na-agba ndị mmadụ ume ka ha na-akwanyere ndị ọzọ ùgwù. O kwuru na anyị ekwesịghị . . .

iwere na anyị ka ndị ọzọ.—Ndị Filipaị 2:3.
ịkparị ndị ọzọ maka na otú ha si ele ihe anya na ihe ha kweere dị iche na nke anyị.—1 Pita 2:17.
Ịmanye ndị ọzọ ka ha kweta ihe anyịnwa kweere.—Matiu 10:14.

Baịbụl gosiri na Chineke na-eji obiọma emeso mmadụ niile ihe n’eleghị onye ọ bụla anya n’ihu, gosikwa na ọ chọrọ ka anyị na-eme ka ya.—Ndị Rom 9:14.

Ị chọọ ịmatakwu gbasara ya, gaa na jw.org gụọ isiokwu Bekee bụ́ Tolerance—How the Bible Can Help.”

BAỊBỤL KWURU IHE CHINEKE CHỌRỌ KA ANYỊ NA-EME

Baịbụl kọọrọ anyị otú Jehova na ụmụ mmadụ sirila mekọrịta ihe kemgbe ụwa. Ihe ndị ọ kọrọ bụkwa eziokwu. Ihe ndị ahụ na-eme ka anyị ghọta ihe Jehova weere ka ihe ọma na ihe ọjọọ, ihe o weere ka ihe bara uru na ihe na-abaghị uru. (Abụ Ọma 19:7, 11) Baịbụl na-enyekwa anyị ndụmọdụ ndị na-enyere anyị aka ime mkpebi ndị dị mma kwa ụbọchị.

Dị ka ihe atụ, legodị ndụmọdụ dị n’Ilu 13:20: “Onye ya na ndị ma ihe na-akpa ga-ama ihe, ma ihe agaghị agaziri onye ya na ndị nzuzu na-emekọ ihe.” Ihe a Baịbụl kwuru bụ eziokwu n’oge anyị a otú ọ bụkwa eziokwu n’oge ochie. Ndụmọdụ ndị bara ezigbo uru juru eju na Baịbụl.—Gụọ igbe isiokwu ya bụ “Ndụmọdụ Baịbụl Na-aba Uru Mgbe Niile.”

Ma, i nwere ike ịna-eche, sị: ‘Olee otú m ga-esi jide n’aka na ndụmọdụ Baịbụl nyere gbasara ihe mmadụ kwesịrị ime na ihe ọ na-ekwesịghị ime ka bara uru n’oge anyị a?’ Isiokwu na-eso nke a ga-akọrọ anyị ihe ụfọdụ ndị chọpụtarala.

a Jehova bụ ezigbo aha Chineke.—Abụ Ọma 83:18.

NDỤMỌDỤ BAỊBỤL NA-ABA URU MGBE NIILE

Ọ bụ eziokwu na e dechara Baịbụl ihe fọrọ obere ka ọ bụrụ puku afọ abụọ (2,000) gara aga, ọ ka na-abara ndị mmadụ ezigbo uru taa. Kemgbe ụwa, ihe ụmụ mmadụ chọrọ ná ndụ bụ ka ihe dịrị ha ná mma nakwa ka obi na-atọ ha ụtọ. (Ekliziastis 1:9) Isoro ndụmọdụ ndị dị na Baịbụl ga-eme ka ihe a nwee isi n’ihi na ndụmọdụ ndị ahụ na-aba uru mgbe niile.

Ịkwụwa Aka Ọtọ

“Anyị chọkwara ịna-akwụwa aka ọtọ n’ihe niile.”—Ndị Hibru 13:18.
“Ka onye na-ezu ohi kwụsị izu ohi. Kama, ka ọ na-arụsi ọrụ ike.”—Ndị Efesọs 4:28.

Mmekọrịta Mmadụ na Ibe Ya

“Ka onye ọ bụla na-achọ ihe ga-abara onye ọzọ uru, ọ bụghị ihe ga-abara naanị yanwa uru.”—1 Ndị Kọrịnt 10:24.
“Na-edirinụ ibe unu ihe, na-agbagharakwanụ ibe unu kpamkpam.”—Ndị Kọlọsi 3:13.

Ime Mkpebi

“Onye na-amaghị ihe na-ekweta ihe niile e kwuru, ma onye ma ihe na-echebara ihe ọ bụla ọ chọrọ ime echiche.”—Ilu 14:15.
“Onye ma ihe hụ nsogbu, ọ na-aga zoo, ma ndị na-amaghị ihe na-agara banye ná nsogbu, ha na-atakwa ahụhụ ya.”—Ilu 22:3.