Dịrị Umeala n’Obi ma E Nwee Ihe Ị Na-amaghị

1. Olee otú Jehova si kee anyị? Maka gịnị?

JEHOVA kere anyị ka anyị nwee ike ịna-eche echiche, na-amatakwu ihe, na-aghọta ihe, ma na-egosi na anyị ma ihe. Gịnị mere o ji si otú a kee anyị? Ọ chọrọ ka anyị ‘mụta banyere ya,’ jirikwa echiche anyị na-ejere ya ozi.​—Ilu 2:1-5; Rom 12:1.

2. (a) Gịnị ka anyị kwesịrị ịmata gbasara onwe anyị? (Job 37:23, 24) (Kọwaakwa foto.) (b) Olee uru ọ na-abara anyị ma anyị dịrị umeala n’obi ma mata na anyị amaghị ihe niile?

² Ọ bụ eziokwu na anyị nwere ike ịmụta ihe, mana ọ bụghị ihe niile ka anyị ma. (Gụọ Job 37:23, 24.) Chegodị gbasara Job. Jehova jụrụ ya ọtụtụ ajụjụ nyeere ya aka ịghọta na e nwere ọtụtụ ihe ọ na-amaghị. Ihe a nyeere Job aka ịdị umeala n’obi, meekwa ka ọ gbanwee otú o si eche echiche. (Job 42:3-6) Anyịnwa kwa na-erite uru ma ọ bụrụ na anyị adịrị umeala n’obi, mata na anyị amaghị ihe niile. Ịdị umeala n’obi na-enyere anyị aka ịtụkwasị Jehova obi na ọ ga-eme ka anyị mata ihe ọ dị mkpa ka anyị mata iji mee ezigbo mkpebi.​—Ilu 2:6.

3. Gịnị ka anyị ga-amụ n’isiokwu a?

³ N’isiokwu a, anyị ga-ekwu gbasara ụfọdụ ihe anyị na-amaghị nakwa otú o nwere ike isi kpaa anyị aka. Anyị ga-elebakwa anya n’ihe mere o ji dị mma na e nwere ihe ndị anyị na-amaghị. Ileba anya n’ihe ndị a ga-eme ka obi sikwuo anyị ike na Jehova, “Onye ma ihe niile,” na-agwa anyị ihe niile ọ dị mkpa ka anyị mara.​—Job 37:16.

ANYỊ AMAGHỊ MGBE ỌGWỤGWỤ GA-ABỊA

4. Dị ka e kwuru na Matiu 24:36, olee otu ihe anyị na-amaghị?

⁴ Gụọ Matiu 24:36. Anyị amaghị mgbe ọgwụgwụ ụwa ochie a ga-abịa. Mgbe Jizọs nọ n’ụwa, ọ madịghị “ụbọchị na awa ọ ga-abụ.”a O mechara gwa ndịozi ya na e nwere ụfọdụ ihe ọ bụ naanị Jehova, bụ́ Onye Ukwu Na-edebe Oge, “nwere ikike ikpebi oge na mgbe” ha ga-eme. (Ọrụ 1:6, 7) Jehova ekpebiela mgbe ọ ga-ebibi ụwa ochie a. Mana, anyị agaghị amatali oge ọ ga-abụ.

5. Ebe ọ bụ na anyị amaghị ụbọchị ọgwụgwụ ga-abịa, olee otú o nwere ike isi akpa anyị aka?

⁵ N’ihi ihe Jizọs kwuru, anyị amaghị mgbe anyị ga-echeru tupu ọgwụgwụ abịa. Ihe a nwere ike ime ka anyị ghara inwe ndidi ma ọ bụkwanụ ka anyị daa mbà, karịchaa ma ọ bụrụ na o teela anyị chewere ka ụbọchị Jehova ruo. O nwekwara ike isiri anyị ike idi emo ndị ezinụlọ anyị na ndị ọzọ na-akwa anyị. (2 Pita 3:3, 4) Anyị nwere ike iche na ọ bụrụ na anyị amata kpọmkwem ụbọchị ọgwụgwụ ga-abịa, ọ ga-adịkwuru anyị mfe inwe ndidi chere ụbọchị Jehova, ya adịkwuokwara anyị mfe idi emo a na-akwa anyị.

6. Gịnị mere o ji dị mma na anyị amaghị mgbe Chineke ga-ebibi ụwa ochie a?

⁶ Nke bụ́ eziokwu bụ na ebe ọ bụ na Jehova agwaghị anyị ụbọchị ọ ga-ebibi ụwa ochie a, o nyere anyị ohere igosi na ihe mere anyị ji na-efe ya bụ na anyị hụrụ ya n’anya ma tụkwasị ya obi. Anyị anaghị efe Jehova n’ihi na e nwere ụbọchị anyị bu n’obi, dị ka à ga-asị na e nwere oge ọ ga-eru anyị akwụsị inwe okwukwe na ya. Kama ịna-eche naanị gbasara oge “ụbọchị Jehova” ga-abịa, anyị kwesịrị ilekwasị anya n’ihe ga-eme ma ụbọchị ahụ gachaa. Anyị mee otú ahụ, ọ ga-eme ka anyị bịarukwuo Jehova nso, tụkwasịkwuo ya obi ma mee ihe niile anyị ga-emeli iji mee ihe dị ya mma.​—2 Pita 3:11, 12.

7. Gịnị ka anyị ma?

⁷ Ọ dị mkpa ka anyị lekwasị anya n’ihe anyị ma. Anyị ma na oge ikpeazụ a malitere n’afọ 1914. Jehova mekwara ka e buo amụma ndị dị na Baịbụl ndị mere ka anyị mata afọ oge ọgwụgwụ malitere nakwa ihe ndị ga-eme n’ụwa ma afọ ahụ gachaa. Ihe a mere ka obi sie anyị ike na “oké ụbọchị Jehova dị nso.” (Zef. 1:14) Anyị makwa ọrụ Jehova chọrọ ka anyị rụọ, ya bụ, izi ọtụtụ ndị “ozi ọma Alaeze Chineke.” (Mat. 24:14) A na-ekwusa ozi ọma a n’ihe dị ka narị mba abụọ na iri anọ (240) nakwa n’ihe karịrị otu puku (1,000) asụsụ. Ọ dịghị mkpa ka anyị mata “ụbọchị na awa ọ ga-abụ” tupu anyị ejiri ịnụ ọkụ n’obi na-arụ ọrụ a dị mkpa.

ANYỊ AMAGHỊ OTÚ JEHOVA GA-ESI ENYERE ANYỊ AKA

8. Gịnị bụ “ọrụ ezi Chineke”? (Ekliziastis 11:5)

⁸ Ọ bụghị mgbe niile ka anyị na-ama “ọrụ ezi Chineke.” (Gụọ Ekliziastis 11:5.) “Ọrụ ezi Chineke” bụ ihe Jehova na-eme ma ọ bụ ihe o kwere ka o mee ka uche ya nwee ike imezu. Anyị agaghị amatali kpọmkwem ihe mere Jehova ji kwe ka ihe mee ma ọ bụ otú ọ ga-esi enyere anyị aka. (Ọma 37:5) Anyị agaghị aghọtachali ihe a otú ahụ a na-enweghị ike ịghọtacha otú nwa nọ n’afọ si eto. Ndị sayensị aghọtachabedịghị ya ruo taa.

9. Ebe ọ bụ na anyị amaghị kpọmkwem ihe Jehova ga-eme iji nyere anyị aka, olee ihe o nwere ike ime ka anyị na-eche?

⁹ Ebe ọ bụ na anyị amaghị kpọmkwem ihe Jehova ga-eme iji nyere anyị aka, o nwere ike isiri anyị ike ime ụfọdụ mkpebi. O nwere ike isiri anyị ike ịhapụ ihe ụfọdụ iji jekwuoro Jehova ozi, dị ka iselata aka n’oge anyị ji arụ ọrụ ego ma ọ bụ ịkwaga n’ebe a chọkwuru ndị na-ekwusa ozi ọma. Anyị nwekwara ike ịna-eche ma ihe anyị ọ̀ dịkwa Jehova mma ma ọ bụrụ na e nwere ihe anyị bu n’obi ime n’ofufe ya anyị na-emelighị. O nwekwara ike ịbụ na anyị na-agachi ozi ọma anya, mana e nweghị ndị anyị na-amụrụ Baịbụl, ma ọ bụkwanụ na e nwere ihe pụrụ iche anyị so na-arụ ná nzukọ Jehova ma ihe ana-esiri anyị ike. Ihe ndị a nwere ike ime ka anyị chee na ihe anyị adịghị Jehova mma.

10. Olee àgwà ụfọdụ dị mkpa anyị na-amụta n’ihi na anyị amaghị kpọmkwem ihe Jehova ga-eme iji nyere anyị aka?

¹⁰ Ebe ọ bụ na anyị amaghị kpọmkwem ihe Jehova ga-eme iji nyere anyị aka, anyị ga-enwe ike ịmụta àgwà ndị dị mkpa, dị ka ịdị umeala n’obi na ịma ebe ike anyị ruru. Ọ na-eme ka anyị ghọta na echiche Jehova na ụzọ ya dị ezigbo elu karịa nke anyị. (Aịza. 55:8, 9) Anyị na-amụtakwa ịtụkwasịkwu Jehova obi, obi esie anyị ike na ọ ma ihe ga-akachara anyị mma. Ọ bụrụ na ihe agaziere anyị n’ozi anyị gara ma ọ bụ n’ọrụ anyị rụrụ ná nzukọ Jehova, anyị na-eto Jehova n’ihi na ọ bụ ya ka o ruuru. (Ọma 127:1; 1 Kọr. 3:7) Ọ bụrụ na ihe agaghị otú anyị tụrụ anya ya, anyị kwesịrị icheta na Jehova ma ihe niile. (Aịza. 26:12) Anyị ga-eme ihe anyị ga-emeli, tụkwasị Jehova obi na ọ ga-eme ihe o kwesịrị ime. Obi siri anyị ike na ọ ga-enye anyị ntụziaka dị anyị mkpa, ọ bụrụgodị na ọ rụghị ọrụ ebube otú ahụ o mere mgbe ụfọdụ n’oge gara aga.​—Ọrụ 16:6-10.

11. Olee ihe anyị ma ga-enyere anyị aka?

¹¹ Anyị ma na Jehova hụrụ anyị n’anya mgbe niile, na-ekpe ikpe ziri ezi, marakwa ihe. Anyị makwa na o ji ihe ndị anyị na-emere ya na ụmụnna anyị kpọrọ ezigbo ihe. Anyị makwa na Jehova na-akwụ ndị jisiri ya aka ike ụgwọ.​—Hib. 11:6.

ANYỊ AMAGHỊ IHE GA-EME ECHI

12. Dị ka e kwuru na Jems 4:13, 14, gịnị ka anyị na-amaghị?

¹² Gụọ Jems 4:13, 14. Otu eziokwu doro anya bụ na anyị amaghị ihe ndụ anyị ga-abụ echi. N’ụwa ochie a, anyị ma na ‘ọdachi na-abịara anyị niile n’oge anyị na-atụghị anya ya.’ (Ekli. 9:11) Ọ bụ ya mere na anyị amaghị ma ihe anyị mere atụmatụ ime ọ̀ ga-agaziri anyị ma ọ bụkwanụ ma ànyị ga-anọdị ndụ mechaa ihe anyị chọrọ ime.

13. Olee otú obi nwere ike ịdị anyị n’ihi na anyị amaghị ihe ga-eme echi?

¹³ O nwere ike isiri anyị ike ịtachi obi ebe ọ bụ na anyị amaghị kpọmkwem ihe ga-eme echi. Maka gịnị? Anyị nwere ike ịna-echegbu onwe anyị gbasara ihe ndị nwere ike ime, ya emee ka anyị ghara ịna-enwe ọṅụ. Ọdachi na ihe ndị anyị na-atụghị anya ha nwere ike ime ka anyị na-eru uju, gbawaakwa anyị obi. Ọ bụrụkwa na ihe anyị tụrụ anya ya emeghị, obi nwere ike ịjọ anyị njọ, anyị adaa mbà n’obi.​—Ilu 13:12.

14. Olee ihe ga-eme ka anyị na-enwe ezigbo obi ụtọ? (Kọwaakwa foto.)

¹⁴ Ọ bụrụ na anyị edie nsogbu ndị na-abịara anyị, anyị na-egosi na n’agbanyeghị ihe ọ bụla merenụ, anyị na-efe Nna anyị nke eluigwe n’ihi na anyị hụrụ ya n’anya, ọ bụghị n’ihi uru ndị anyị ga-erite. Akụkọ ndị e dere na Baịbụl gosiri na anyị ekwesịghị ịtụ anya ka Jehova chebe anyị ka nsogbu ọ bụla ghara ịbịara anyị nakwa na ọ naghị ebu ụzọ ekpebi ihe niile ga-eme ná ndụ anyị. Ọ ma na ihe ga-eme ka anyị na-enwe obi ụtọ abụghị ịmara ihe niile ga-eme anyị n’ọdịnihu, kama ọ bụ ma anyị na-achọ ntụziaka ya ma na-erubere ya isi. (Jere. 10:23) Ọ bụrụ na anyị ana-achọ nduzi Jehova mgbe anyị na-eme mkpebi, ọ pụtara na anyị na-asị: “Ọ bụrụ uche Jehova, anyị ga-adị ndụ mee nke a ma ọ bụ nke ọzọ.”​—Jems 4:15.

15. Gịnị ka anyị ma gbasara ọdịnihu?

¹⁵ Ọ bụ eziokwu na anyị amaghị ihe ga-eme echi, anyị ma na Jehova kwere anyị nkwa ndụ ebighị ebi, ma ọ̀ bụ n’eluigwe ma ọ bụ n’ụwa. Anyị ma na ọ gaghị agha ụgha, nakwa na e nweghị ihe ọ bụla ga-egbochi ya imezu nkwa ya niile. (Taị. 1:2) “Tupu ihe ga-eme emee,” ọ bụ naanị ya ‘na-ekwu na ọ ga-eme. Ọtụtụ afọ tupu e mee ihe a na-emebeghị, ọ na-ekwu na a ga-eme ya.’ Amụma niile o buru ga-eme n’oge e dere Baịbụl mezuru. Ihe niile o kwuru ga-eme n’ọdịnihu ga-emekwa. (Aịza. 46:10) Obi siri anyị ike na o nweghị ihe ọ bụla ga-egbochi Jehova ịhụ anyị n’anya. (Rom 8:35-39) Ọ ga-enye anyị amamihe, kasie anyị obi, nyekwa anyị ike anyị ga-eji die nsogbu ọ bụla bịaara anyị. Ka obi sie anyị ike na Jehova ga-enyere anyị aka ma gọzie anyị.​—Jere. 17:7, 8.

ANYỊ AGAGHỊ AGHỌTACHALI OTÚ JEHOVA MARURU ANYỊ

16. Dị ka e kwuru n’Abụ Ọma 139:1-6, olee ihe Jehova ma gbasara anyị, oleekwa otú ihe a mere ka obi dịrị gị?

¹⁶ Gụọ Abụ Ọma 139:1-6. Onye kere anyị ma otú e si kee anyị nakwa ihe mere ka anyị dịrị otú anyị dị, obi ana-adị anyị otú ọ na-adị anyị, anyị ana-echekwa echiche otú anyị si eche. Ọ naghị agbanwe otú o si hụ anyị n’anya. Ọ ma ihe anyị na-ekwu na ihe anyị bu n’obi ekwu ya, ihe anyị na-eme na ihe mere anyị ji eme ya. Eze Devid kwuru na Jehova dị njikere mgbe niile inyere anyị aka nakwa na ọ ga-enyeliri anyị aka. Olee otú obi dị gị ịmara na Ọkaakaa Onyenwe anyị, bụ́ Chineke Pụrụ Ime Ihe Niile, na-eche banyere gị otú a? Devid kwuru, sị: “Enweghị m ike ịghọta ihe niile ị ma gbasara m. Ha karịrị m.”​—Ọma 139:6.

17. Olee ihe ndị nwere ike ime ka o siere anyị ike ikweta na Jehova ma anyị nke ọma?

¹⁷ O nwere ike ịbụ na otú e si zụlite anyị, omenala anyị, ma ọ bụ ihe ndị anyị kweere n’oge gara aga mere ka o siere anyị ike iwere Jehova ka Nna hụrụ anyị n’anya, onye ihe gbasara anyị na-emetụ n’obi. O nwekwara ike ịbụ na anyị na-eche na mmehie ndị anyị mere n’oge gara aga dị oké njọ nke na Jehova agaghị achọ ịma gbasara anyị, nakwa na ọ nọ anyị n’ebe dị anya. O nwedịrị mgbe ụfọdụ ọ dị Devid otú ahụ. (Ọma 38:18, 21) Onye ji obi ya niile na-agba mbọ ịgbanwe otú o si ebi ndụ ma biwe ndụ otú Chineke chọrọ nwekwara ike ịna-eche, sị: ‘Ọ bụrụ na Chineke ghọtara m, gịnị mere o ji chọọ ka m hapụ otú m si ebi ndụ maara m ahụ́?’

18. Gịnị mere o ji dị mkpa ka anyị mata na Jehova ma anyị nke ọma karịa ka anyị ma onwe anyị? (Kọwaakwa foto.)

¹⁸ Anyị nwere ike ịmụta na Jehova ma anyị nke ọma karịa otú anyị ma onwe anyị nakwa na ọ na-ahụ àgwà ọma ndị anyị nwere anyịnwa na-anaghị ahụ. N’agbanyeghị na ọ na-ahụ ihe ndị anyị na-emejọ, na-aghọtakwa ihe mere obi ji adị anyị otú ọ na-adị anyị nakwa ihe mere anyị ji eme ihe ndị anyị na-eme, ọ hụrụ anyị n’anya. (Rom 7:15) Ọ bụrụ na anyị aghọta n’eziokwu na Jehova na-ahụ ụdị mmadụ anyị nwere ike ịbụ, ọ na-eme ka anyị nwee ike iji obi anyị niile na-efe ya ma na-enwe ọṅụ.

19. Olee ihe anyị ma nke ọma gbasara Jehova?

¹⁹ Anyị ma na Jehova bụ ịhụnanya. A naghị enyo ya enyo. (1 Jọn 4:8) Anyị ma na iwu ya na-egosi na ọ hụrụ anyị n’anya. Ọ chọrọ ka anyị bie ndụ kacha mma. Anyị makwa na Jehova chọrọ ka anyị nweta ndụ ebighị ebi. O nyere anyị ihe mgbapụta ka o nwee ike ikwe omume. Ihe mgbapụta ahụ na-eme ka obi sie anyị ike na anyị ga-efeli Jehova otú ọ chọrọ n’agbanyeghị na anyị ezughị okè. (Rom 7:24, 25) Anyị ma na “Chineke karịrị obi anyị, marakwa ihe niile.” (1 Jọn 3:19, 20) Jehova na-ahụ ihe niile gbasara anyị. Obi sikwara ya ike na anyị ga-emeli uche ya.

20. Gịnị ga-enyere anyị aka ka anyị ghara ịna-echegbu onwe anyị?

²⁰ Jehova na-agwa anyị ihe niile ọ dị anyị mkpa ka anyị mara. Ọ bụrụ na anyị aghọta ihe a, ọ ga-eme ka anyị ghara ịna-echegbu onwe anyị n’ihi ihe ndị anyị na-amaghị ma lekwasị anya n’ihe ndị ka mkpa. Anyị mee otú ahụ, anyị na-egosi na anyị tụkwasịrị Jehova obi anyị niile. Ọ bụ ya bụ “Onye ma ihe niile.” (Job 36:4) Ọ bụ eziokwu na e nwere ihe ụfọdụ anyị na-amachaghị ugbu a, anyị na-atụ anya mgbe anyị ga-adị ndụ ebighị ebi na-amụta ọtụtụ ihe ọhụrụ n’aka Chineke anyị dị ebube, na-amụtakwukwa gbasara ya.​—Ekli. 3:11.