NDỊ NA-ETO ETO NA-AJỤ, SỊ

M̀ Kwesịrị Ime Baptizim?—Nke 1: Ihe Baptizim Pụtara

Kwa afọ, a na-eme ọtụtụ ndị na-eto eto nne na nna ha zụrụ ka ha bụrụ Ndịama Jehova baptizim. Ì chewala echiche ime baptizim? Ọ bụrụ otú ahụ, ihe mbụ i kwesịrị ime bụ ịghọta ihe inyefe Chineke onwe gị na ime baptizim pụtara.

Gịnị bụ baptizim?

Baptizim e kwuru okwu ya na Baịbụl bụ imikpu mmadụ ná mmiri, ọ bụghị ifesa mmadụ mmiri n’isi. Imikpu mmadụ na mmiri nwekwaranụ ezigbo ihe ọ pụtara.

Imikpu gị ná mmiri n’oge a na-eme gị baptizim na-egosi ọhaneze na ị gaghịzi na-ebi ndụ otú dị gị mma.
Isi ná mmiri kulite gị na-egosi na ị malitela ibi ndụ ọhụrụ, nke ị ga na-emezi naanị ihe dị Chineke mma.

I mee baptizim, o gosiri na i kwetara n’ihu ọha na ọ bụ Jehova kwesịrị ịna-agwa gị ihe bụ́ ihe ọma na ihe ọjọọ nakwa na i kwela ya nkwa na ị ga na-eme ihe ọ bụla ọ chọrọ ka i mee.

Ihe ị ga-echebara echiche: Gịnị mere i kwesịrị iji nọrọ n’ihu ọha mmadụ kwe Jehova nkwa na ị ga na-erubere ya isi ná ndụ gị niile? Gụọ 1 Jọn 4:19 na Mkpughe 4:11.

Gịnị bụ inyefe Chineke onwe gị?

Tupu i mee baptizim, i kwesịrị inyefe Jehova onwe gị mgbe naanị gị nọ. Olee otú ị ga-esi eme ya?

Ị ga-ekpe ekpere gwa Jehova na ị na-ekwe ya nkwa na ị ga-efe ya ruo mgbe ebighị ebi nakwa na ị ga na-eme ihe ọ chọrọ n’agbanyeghị ihe ọ bụla merenụ nakwa n’agbanyeghị ihe ndị ọzọ kpebiri ime.

Ọ bụ baptizim ị ga-eme ga-eme ka ndị ọzọ mara na i nyefeela Chineke onwe gị. Ọ ga-eme ka ndị ọzọ mara na ọ bụghịzi gị nwe onwe gị, kama na ọ bụzi Jehova nwe gị.—Matiu 16:24.

Ihe ị ga-echebara echiche: Gịnị mere ndụ gị ga-eji ka mma ma ị bụrụ nke Jehova? Gụọ Aịzaya 48:17, 18 na Ndị Hibru 11:6.

Gịnị mere ime baptizim ji dị mkpa?

Jizọs kwuru na ndị na-eso ụzọ ya kwesịrị ime baptizim. (Matiu 28:19, 20) N’ihi ya, baptizim ka bụkwa ihe dị mkpa Ndị Kraịst ga-emerịrị. N’eziokwu, Baịbụl kwuru na mmadụ kwesịrị ime baptizim ka e wee zọpụta ya.—1 Pita 3:21.

Ma, ihe kwesịrị ime ka i kpebie ime baptizim bụ maka na ị hụrụ Jehova n’anya, jirikwa adịm ná mma gị na ya kpọrọ ihe. Obi kwesịrị ịdị gị otú ahụ ọ dị ọbụ abụ, onye dere, sị: ‘Gịnị ka m ga-eji kwụọ Jehova ụgwọ maka ihe ọma niile o meere m? M ga-akpọku aha Jehova. M ga-emezu nkwa m kwere Jehova.’—Abụ Ọma 116:12-14.

Ihe ị ga-echebara echiche: Olee ihe ọma Jehova meere gị, oleekwa otú ị ga-esi kwụghachi ya? Gụọ Diuterọnọmi 10:12, 13 na Ndị Rom 12:1.

Ihe ndị na-eto eto ibe gị kwuru

“Mmadụ inyefe Jehova onwe ya bụ nkwa ka onye ahụ na-ekwe ya, ọ bụghịkwa ihe e ji egwu egwu. Ma, mmadụ nyefee Jehova onwe ya, ọ na-agọzi onye ahụ nke ukwuu. A sị ka e kwuwe, ọ ga-elekọtali anyị karịa otú anyị ga-elekọta onwe anyị.”—Mijin.

“Jehova ebula ụzọ gosi na ọ hụrụ gị n’anya. Ị ga-egosi ya na ị hụrụ ya n’anya nke ukwuu ma i mee baptizim. Mmadụ mee baptizim, ọ bụ nnukwu ihe ọma meere ya, a ga-agọzikwa ya mmaji kwuru mmaji maka ya.”—Ember.

“Ikpebi inyefe Chineke onwe gị na ime baptizim bụ mkpebi kacha mkpa i nwere ike ime. Ma, ụjọ ekwesịghị ịtụ gị ikpebi ya. Ọ bụrụ na i jikere maka ya, kpebiekwa ime ya maka na ị hụrụ Jehova n’anya, ọ ga-abụ mkpebi kacha mma ị ga-eme ná ndụ gị.”—Julian.

Ihe ndị bụ́ ụgha na ihe ndị bụ́ eziokwu

ỤGHA — Ọ bụ naanị ndị toro eto ruru eru ka e mee ha baptizim.

EZIOKWU — Ọ bụghị afọ ole mmadụ dị ka e ji ama ma ò ruru eru ime baptizim, kama ọ bụ ma onye ahụ ọ̀ hụrụ Jehova n’anya, dịkwa njikere irubere ya isi. Josef, Samuel, na Josaya mechara ihe dị mma mgbe ha ka dị obere. Ọtụtụ ndị na-eto eto na-emekwa otú ahụ taa.

Baịbụl kwuru, sị: “Ọ bụ ihe nwatakịrị na-eme ka e ji ama ma ọ̀ na-akpa ezigbo àgwà ma na-eme ihe dị mma.”—Ilu 20:11.

ỤGHA — Ọ bụrụ na ndị enyi gị emeela baptizim, gịnwa kwesịkwara ime baptizim.

EZIOKWU — Mmadụ inyefe Chineke onwe ya na ime baptizim bụ ihe mmadụ na-eji aka ya kpebie ime maka na ọ bụ ihe ọ chọrọ ime. Ọ bụghị ihe mmadụ na-eme maka afọ ole ọ dị ma ọ bụ maka na o toola, ọ bụghịkwa ihe mmadụ na-eme maka na ndị ọzọ na-eme ya ma ọ bụ maka na ndị ọzọ na-atụ anya ka o mee ya.

Baịbụl kwuru, sị: “Ndị [Chineke] ga-eji obi ha wepụta onwe ha.”—Abụ Ọma 110:3.

ỤGHA — Ọ bụrụ na i mebeghị baptizim, ị gaghị aza ajụjụ maka ihe ndị ị na-eme.

EZIOKWU — Ozugbo ị matara ihe bụ́ ihe ọma na ihe ọjọọ n’anya Jehova, ị ga-aza ya ajụjụ maka ihe ndị ị na-eme, ọ bụrụgodị na i mebeghị baptizim.

Baịbụl kwuru, sị: “Ọ bụrụ na mmadụ ma otú ọ ga-esi mee ihe dị mma ma o meghị ya, o mehiela.”—Jems 4:17.

IHE Ị GA-EME: Ọ bụrụ na ụjọ na-atụ gị inyefe Chineke onwe gị ma mee baptizim, ọ ga-adị mma ka i leruo onwe gị anya chọpụta ihe bụ ụjọ gị, meekwa ihe ndị ga-enyere gị aka ịkwụsị ịtụ ụjọ? Otu ihe ga-enyere gị aka bụ ịgụ Isi nke 37 n’akwụkwọ Ajụjụ Ndị Na-eto Eto Na-ajụ—Azịza Ndị Na-adị Irè, Nke 2.