A kọwara nzube nke akwụkwọ Ilu n’okwu mmalite ya bụ́: “Ilu dị iche iche nke Solomọn nwa Devid, bụ́ eze Israel: ịma amamihe na ịdọ aka ná ntị; ịghọta okwu ọnụ nile nke nghọta; ịnara ịdọ aka ná ntị nke inwe uche, na ezi omume na ikpe na izi ezi; inye ndị na-enweghị uche ezi uche, inye nwa okorobịa ihe ọmụma na izuzu.”—Ilu 1:1-4.

Amamihe bụ ihe ọtụtụ ihe mejupụtara, nke gụnyere nghọta, ezi uche, na izuzu. Nghọta bụ ikike nke ileba anya n’okwu ma ghọta ihe ndị mejupụtara ya site n’ịghọta njikọ ndị e nwere n’akụkụ ya nile na okwu ahụ n’ozuzu ya, si otú a na-aghọta ya nke ọma. Ezi uche na-achọ ịmara ihe ndị kpatara ihe na ịghọta ihe mere otu ụzọ ji zie ezie ma ọ bụ dị njọ. Dị ka ihe atụ, onye nwere nghọta pụrụ ịghọta mgbe mmadụ na-etinye isi n’ụzọ na-ezighị ezi, ọ pụkwara ịdọ ya aka ná ntị ozugbo banyere ihe ize ndụ dị na ya. Ma ọ na-achọ ezi uche n’aka ya iji ghọta ihe mere onye ahụ ji na-etinye isi n’ụzọ ahụ ma chọọ ụzọ kasị dị irè isi zọpụta ya.