Solomọn na-ezo aka n’ịdị mkpa nke ezi omume. Ọ na-asị: “Akụ̀ nke ọgaranya bụ obodo ya siri ike: mbibi nke ndị na-enweghị ike bụ ogbenye ha bụ. Ọrụ onye ezi omume na-eduba ná ndụ; ihe omume nke onye na-emebi iwu na-eduba ná mmehie.”—Ilu 10:15, 16.

N’aka nke ọzọ, ma onye ezi omume ò nwere ihe onwunwe dị ukwuu ma ọ bụ nke dị nta, ihe omume ya ziri ezi na-eduba ná ndụ. N’ụzọ dị aṅaa? N’ụdị na ọ na-enwe afọ ojuju n’ihe o nwere. Ọ dịghị ekwe ka ọnọdụ akụ́ na ụba ya metụta aha ọma o nwere n’ebe Chineke nọ. Ma onye ezi omume ọ̀ bara ọgaranya ma ọ̀ dara ogbenye, ụzọ ndụ ya na-ewetara ya obi ụtọ ugbu a na olileanya nke ndụ ebighị ebi n’ọdịnihu. (Job 42:10-13) Onye na-emebi iwu adịghị erite uru ọbụna ma a sị na o nwere akụ̀. Kama inwe ekele maka uru akụ̀ ya bara n’ichebe ya ma na-ebi ndụ n’ụzọ kwekọrọ n’uche Chineke, ọ na-eji ya akwalite ndụ nke mmehie.