Mgbe ị na-enye ndụmọdụ, ọ dị mkpa ịhọrọ okwu ndị ziri ezi. Nwoke amamihe ahụ bụ́ Solomọn kwuru, sị: “Mkpụrụ osisi apple ọlaedo n’ime nkata ọlaọcha ka okwu e kwuru na mgbe kwesịrị ya bụ.” (Ilu 25:11) Ọ pụrụ n’ezie ibuwo n’uche efere ọlaọcha a wụrụ awụ nke nwere ọmarịcha mkpụrụ osisi apple ọlaedo ndị a tụrụ nke ọma n’ime ya. Lee otú nke ahụ ga-esi dị mma n’anya, leekwa otú ị ga-esi nwee ekele ịnata ya dị ka onyinye! N’otu ụzọ ahụ, okwu ndị dị n’amara, a họọrọ nke ọma pụrụ inwe mkpali dị ike n’ebe onye ị na-agbalị inyere aka nọ.—Eklisiastis 12:9, 10.

Dị ka Solomọn kwuru, okwu ndụmọdụ kwesịrị ịbụ nke “e kwuru na mgbe kwesịrị ya.” Oge dị mkpa nke ukwuu ma ọ bụrụ na ndụmọdụ gaje ịga nke ọma! O doro anya na nri pụrụ ịbụ nke onye na-enwekwaghị agụụ iri ihe na-enweghị mmasị na ya. Ma eleghị anya o riwo nri buru ibu n’oge na-adịbeghị anya, ma ọ bụ ọ pụrụ ịbụ na ọ na-arịa ọrịa. Ịmanye onye na-achọghị iri nri ka o rie nri abụghị ihe ezi uche dị na ya, ọ bụghịkwa nke a na-anabata.