13. N’oge a, olee ndị bụ ‘ụmụ ndị ikom’ na ‘ụmụ ndị inyom,’ olee ndị bụkwa “akụ̀ nke mba dị iche iche”?

¹³ Lee nkọwa doro anya Aịsaịa 60:4-9 nyere banyere mgbasa zuru ụwa ọnụ nke werewooro ọnọdụ kemgbe “nwanyị” Jehova malitere ime ka ìhè nwuo n’ime ọchịchịrị nke ụwa a! ‘Ụmụ ndị ikom’ na ‘ụmụ ndị inyom’ nke Zaịọn nke eluigwe bu ụzọ bịa, bụ́ ndị ghọrọ ndị Kraịst e tere mmanụ. Na 1931, ndị a kọwara onwe ha n’ihu ọha dị ka Ndịàmà Jehova. Mgbe ahụzi, ìgwè ndị dị nwayọọ n’obi, bụ́ “akụ̀ nke mba dị iche iche,” na “ihe bara ụba nke oké osimiri,” mere ngwa ngwa isonyere ihe fọdụrụ n’ụmụnna Kraịst.b Taa, ndị ohu Jehova nile a, bụ́ ndị si n’akụkụ anọ nke ụwa na n’ọkwá dị iche iche na-abịa, na-esonyere Israel nke Chineke n’ito Eze Onyenwe ha, bụ́ Jehova, na n’ibuli aha ya elu dị ka aha kasị ukwuu n’eluigwe na ala.