Ìhè Dị Ebube nke Nnwapụta Chineke

27. Ìhè dị aṅaa nke na-enwu mgbe nile na-amụkwasị “nwanyị” Jehova?

²⁷ Jehova kọwara otú ìhè ahụ na-amụkwasị Jerusalem si enwusi ike mgbe o kwuru, sị: “Anyanwụ agaghị abụkwara gị ìhè ọzọ n’ehihie; ma n’onwu maramara ọnwa agaghị enye gị ìhè: ma Jehova ga-aghọrọ gị ìhè ebighị ebi, Chineke gị ga-aghọkwara gị ịma mma gị. Anyanwụ gị agaghị adakwa ọzọ, ọnwa gị agaghị ewepụkwa onwe ya: n’ihi na Jehova ga-aghọrọ gị ìhè ebighị ebi, ụbọchị nile nke iru újú gị ewee zuo ezuo.” (Aịsaịa 60:19, 20) Jehova ga-anọgide na-abụrụ “nwanyị” ya “ìhè ebighị ebi.” Ọ gaghị ‘ada’ ma ọlị dị ka anyanwụ ma ọ bụ ‘wepụ onwe ya’ dị ka ọnwa.d Ìhè nke nnwapụta ya nke na-enwu mgbe nile na-amụkwasị ndị Kraịst e tere mmanụ, bụ́ ndị nnọchiteanya bụ́ mmadụ nke “nwanyị” Chineke. Ha na oké ìgwè mmadụ ahụ na-enweta oké ìhè ime mmụọ dị otú ahụ nke na ọ dịghị ọchịchịrị dị na ndọrọ ndọrọ ọchịchị ma ọ bụ ọnọdụ akụ̀ na ụba nke ụwa nke pụrụ ime ka ọ nyụlata. Obi sikwara ha ike banyere ọdịnihu dị mma nke Jehova setịpụwooro ha.—Ndị Rom 2:7; Mkpughe 21:3-5.