ỤFỌDỤ ndị kweere n’ozizi ọkụ ala mmụọ na-arụtụ aka n’ihe Jizọs kwuru bụ́ nke e dekọrọ na Mak 9:48 (ma ọ bụ n’amaokwu nke 44, 46) iji kwadoo ozizi a. O kwuru okwu banyere ikpuru na-adịghị anwụ anwụ na ọkụ a na-adịghị emenyụ emenyụ. Ọ bụrụ na mmadụ ajụọ gị ihe okwu ndị ahụ pụtara, gịnị ka ị ga-agwa ya?

Dabere na Baịbụl onye ahụ ji, o nwere ike ịgụ amaokwu nke 44, nke 46, ma ọ bụ nke 48, n’ihi na ọ bụ otu ihe ahụ ka e dere n’amaokwu atọ a ná nsụgharị ụfọdụ.a Nsụgharị Ụwa Ọhụrụ na-agụ, sị: “Ọ bụrụkwa na anya gị emee ka ị sụọ ngọngọ, tụfuo ya, ọ kaara gị mma ibu otu anya banye n’alaeze Chineke kama inwe anya abụọ e wee tụba gị n’ime Gehena, bụ́ ebe ikpuru ha na-adịghị anwụ anwụ, a dịghị emenyụkwa ọkụ ya emenyụ.”—Mak 9:47, 48.