“Unu Abọrọla Onwe Unu Ọbọ”

15. Gịnị ka e kwuru ná Ndị Rom 12:19 nke ga-eme ka anyị hapụ ịbọ ọbọ?

¹⁵ Pọl kwuru ihe ọzọ mere anyị ekwesịghị imegwara ihe e mere anyị; ịghara imegwara na-egosi na anyị dị umeala n’obi. O kwuru, sị: “Ndị m hụrụ n’anya, unu abọrọla onwe unu ọbọ, kama nyenụ ọnụma ahụ ohere; n’ihi na e dere, sị: ‘Ịbọ ọbọ bụ nke m; m ga-akwụghachi, ka Jehova na-asị.’” (Ndị Rom 12:19) Onye Kraịst ọ bụla na-agbalị imegwara ihe ọjọọ e mere ya dị mpako. Ọ na-eweghara ọrụ dịịrị Chineke. (Matiu 7:1) Ọzọkwa, ọ bụrụ na mmadụ emegwara ihe ọjọọ e mere ya, ọ na-egosi na onye ahụ enweghị okwukwe na Jehova ga-emezu nkwa ahụ o kwere bụ́: “M ga-akwụghachi.” N’aka nke ọzọ, ezi Ndị Kraịst kwenyesiri ike na Jehova ‘ga-eme ka e kpeere ndị ọ họọrọ ikpe ziri ezi.’ (Luk 18:7, 8; 2 Ndị Tesalonaịka 1:6-8) Ha na-eji obi umeala ahapụ Chineke ka ọ bọọrọ ha ọbọ ihe ọjọọ ọ bụla e mere ha.—Jeremaịa 30:23, 24; Ndị Rom 1:18.

18. Gịnị mere mmadụ ịghara imegwara ihe e mere ya ji bụrụ ihe kwesịrị ekwesị na ihe na-egosipụta na ọ hụrụ ndị ọzọ n’anya ma dịrị umeala n’obi?

¹⁸ Site n’ịtụle Ndị Rom isi 12 ná mkpirikpi anyị ahụla ọtụtụ ihe dị mkpa mere anyị na-agaghị eji “ihe ọjọọ akwụghachi onye ọ bụla n’ọnọdụ ihe ọjọọ.” Nke mbụ bụ na ịghara imegwara bụ ihe kwesịrị ekwesị ime. N’ihi ọmịiko Chineke gosiri n’ebe anyị nọ, o kwesịrị ekwesị ma bụrụ ihe ezi uche dị na ya na anyị ga-enye Jehova onwe anyị ma jiri obi anyị nile na-erube isi n’iwu ya—nke gụnyere iwu o nyere anyị ka anyị hụ ndị iro anyị n’anya. Ihe nke abụọ mere anyị na-agaghị eji were ihe ọjọọ kwụghachi n’ọnọdụ ihe ọjọọ bụ na ọ na-egosipụta na anyị nwere ịhụnanya. Site n’ịghara imegwara ma nọgide na-eme udo, anyị na-egosi na anyị hụdịrị ndị na-emekpọ anyị ọnụ n’anya ma nwee olileanya inyere ha aka ịghọ ndị na-efe Jehova. Nke atọ bụ na izere imegwara ihe e mere anyị na-egosi na anyị dị umeala n’obi. Onye na-abọ ọbọ dị mpako, n’ihi na Jehova kwuru, sị: “Ịbọ ọbọ bụ nke m.” Okwu Chineke na-adọkwa anyị aka ná ntị, sị: “Nganga bịa, nlelị abịakwa: ma n’ebe ndị dị umeala n’obi nọ ka amamihe dị.” (Ilu 11:2) Iji amamihe hapụrụ Chineke ọbọ na-egosi na anyị dị umeala n’obi.