Iji Ihe Ọma Na-emeri Ihe Ọjọọ

13, 14. (a) Olee ihe mere na mkpagbu ndị iro na-akpagbu anyị anaghị atụ anyị n’anya? (b) Olee otú anyị nwere ike isi na-agọzi ndị na-akpagbu anyị?

¹³ Gụọ Ndị Rom 12:14, 21. Ebe ọ bụ na obi siri anyị nnọọ ike na Jehova ga-emezu ihe niile bụ́ nzube ya, anyị kwesịrị ịna-arụsi ọrụ o nyere anyị ike, ya bụ, izisa ozi ọma “alaeze n’elu ụwa dum mmadụ bi.” (Mat. 24:14) Anyị ma na ọrụ a anyị na-arụ ga-akpasu ndị iro anyị iwe, n’ihi na Jizọs dọrọ anyị aka ná ntị, sị: “Mba niile ga-akpọkwa unu asị n’ihi aha m.” (Mat. 24:9) Ya mere, ọ naghị atụ anyị n’anya na a na-akpagbu anyị, anyị anaghịkwanụ ada mba n’ihi ya. Pita onyeozi dere, sị: “Ndị m hụrụ n’anya, ka ọkụ nke na-ere n’etiti unu, nke na-ere ịbụrụ unu ọnwụnwa, ghara iju unu anya, dị ka à ga-asị na ọ bụ ihe a na-ahụtụbeghị na-adakwasị unu. Kama nke ahụ, na-aṅụrịnụ ọṅụ, ebe unu bụ ndị na-eketa òkè n’ahụhụ nke Kraịst.”—1 Pita 4:12, 13.

15. Olee ụzọ kacha mma anyị ga-esi jiri ihe ọma na-emeri ihe ọjọọ?

¹⁵ Ya mere, ezigbo Onye Kraịst kwesịrị ịna-eme ihe amaokwu ikpeazụ dị ná Ndị Rom isi iri na abụọ kwuru. Ọ sịrị: “Ekwela ka ihe ọjọọ merie gị, kama jiri ihe ọma na-emeri ihe ọjọọ.” Ọ bụ Setan bụ́ Ekwensu kpatara ihe ọjọọ niile. (Jọn 8:44; 1 Jọn 5:19) N’ọhụụ e mere ka Jọn hụ, Jizọs kwuru na ụmụnna ya e tere mmanụ ‘meriri Setan n’ihi ọbara Nwa Atụrụ ahụ, na n’ihi okwu ha gbara àmà ya.’ (Mkp. 12:11) Nke a na-egosi na ụzọ kacha mma anyị ga-esi merie Setan na ihe ọjọọ niile ọ na-akpatara anyị n’ụwa a bụ ime ihe ọma site n’ikwusa ozi ọma nke Alaeze Chineke.